തുടർച്ചയായ നാലാംവർഷവും ഇറ്റാലിയൻ കപ്പ്​ യുവൻറസിന്​​

റോം: ആഭ്യന്തര മത്സരങ്ങളിൽ തങ്ങളെ വെല്ലാൻ ആരുമില്ലെന്നറിയിച്ച്​ യുവൻറസി​​െൻറ പടയോട്ടം. സീരി ‘എ’ കപ്പിനരികെയിരിക്കുന്ന ചാമ്പ്യന്മാർ, തുടർച്ചയായ നാലാംവർഷവും ഇറ്റാലിയൻ കപ്പും സ്വന്തമാക്കി. ഫൈനലിൽ എ.സി മിലാനെ 4-0ത്തിന്​ തകർത്താണ്​ യുവൻറസ്​ 13ാം തവണയും ഇറ്റാലിയൻ കപ്പിൽ മുത്തമിട്ടത്​. ഒരുപോയൻറ്​ അകലെ സീരി ‘എ’യും സ്വന്തമാക്കാനിരിക്കെ തുടർച്ചയായി നാലുവർഷം രണ്ടു കപ്പും സ്വന്തമാക്കു​ന്ന ആദ്യ ക്ലബ്​ എന്ന റെക്കോഡ്​ യുവൻറസ്​ സ്വന്തം പേരിലാക്കാനിരിക്കുകയാണ്​. 

സീസണിൽ ഒരു കിരീടമെങ്കിലും നേടണ​മെന്ന സ്വപ്​നവുമായി ഫൈനൽ പോരിനെത്തിയ എ.സി മിലാനെ യുവൻറസ്​ തരിപ്പണമാക്കുകയായിരുന്നു. ഒരു ഗോൾ പോലും വഴങ്ങാതെ ആദ്യ പകുതി മിലാൻ പിടിച്ചുനിന്നെങ്കിലും രണ്ടാം പകുതി കളിമാറി. 56ാം മിനിറ്റിൽ മെഹ്​ദി ബെനാഷ്യയാണ്​ ആദ്യം അക്കൗണ്ട്​ തുറന്നത്​. പിന്നാലെ, ബ്രസീൽ താരം ഡഗ്ലസ്​ കോസ്​റ്റയും (61) ഗോൾ നേടി. തിരിച്ചടിക്കാൻ മിലാൻ താരങ്ങൾ പൊരുതുന്നതിനിടെ,​  കൗണ്ടർ അറ്റാക്കിൽ യുവൻറസ്​ വീണ്ടും ലക്ഷ്യം കണ്ടതോടെ മിലാൻ തോൽവിയുറപ്പിച്ചു.

ഇത്തവണയും ബെനാഷ്യയാണ് (64)​ സ്​കോറർ. അവസാനം ഒരു സെൽഫ്​ ഗോളും (നികോള കാലിനിച്ച്​^76) യുവൻറസി​​െൻറ അക്കൗണ്ടിലെത്തിയതോടെ മിലാ​​െൻറ തോൽവി പൂർണമായി. സീരി എയിൽ യുവൻറസിന്​ 91ഉം രണ്ടാമതുള്ള നാപോളിക്ക്​ 85ഉം പോയൻറാണ്​ നിലവിൽ. രണ്ടു മത്സരം ബാക്കിയിരിക്കെ ഇനി ഒരു പോയൻറ്​ മാത്രം മതി യുവൻറസിന്​ കിരീടം ചൂടാൻ.