ആഴ്​സനലിനെയും തോൽപിച്ച്​ മാഞ്ചസ്​റ്ററി​െൻറ കുതിപ്പ്​; പൊഗ്​ബക്ക് ചുവപ്പ് കാർഡ്

ലണ്ടൻ: ​ചുവപ്പു കാർഡ്​ ലഭിച്ച്​ ​ പോൾ പൊഗ്​ബ​ പുറത്തായിട്ടും മാഞ്ചസ്​റ്റർ യുനൈറ്റഡിനെ എമിറേറ്റ്​സ്​ സ്​റ്റേഡിയത്തിൽ തളക്കാൻ ആഴ്​സനലിനായില്ല. ഗണ്ണേഴ്​സിനെ 3-1ന്​ തോൽപിച്ച്​ പ്രീമിയർ ലീഗിൽ മാഞ്ചസ്​റ്റർ യുനൈറ്റഡ്​ കുതിപ്പു തുടരുന്നു. 90 മിനിറ്റും നിറഞ്ഞു കളിച്ചത്​ ആഴ്​സനലും ഗോളടിച്ചത്​ മാഞ്ചസ്​റ്റർ യുനൈറ്റഡുമായിരുന്നു.

ആദ്യ 11 മിനിറ്റിനിടെ രണ്ടു തവണ ഗണ്ണേഴ്​സി​​െൻറ വലകുലുങ്ങി. വലൻസി​യയും (4) പിന്നാലെ ജെസ്സി ലിൻഗാർഡുമാണ്​ (11) ആഴ്​സൻ വെങ്ങറി​​െൻറ കണക്കുകൂട്ടൽ തെറ്റിച്ചത്​. രണ്ടാം പകുതിയിൽ അലക്​സാണ്ടർ ലാകസെറ്റയിലൂടെ (49) തിരിച്ചുവരാ​ൻ ഗണ്ണേഴ്​സ്​ ഒരുങ്ങിയെങ്കിലും ലിൻഗാർഡ്​(63) എതിരാളികളുടെ പ്രതീക്ഷ വീണ്ടും തകർത്തു. രണ്ടു ഗോളിന്​ വഴിയൊരുക്കിയ പൊഗ്​ബ 74ാം മിനിറ്റിലാണ്​ ചുവപ്പുകാർഡ്​ കണ്ട്​ പുറത്തുപോവുന്നത്​. ഇതോടെ, യുനൈറ്റഡ്​ പൂർണമായി പ്രതിരോധത്തിലേക്ക്​ വലിഞ്ഞ്​ കോട്ടകെട്ടിയതോടെ സീസണിൽ ഗണ്ണേഴ്​സിന്​ അഞ്ചാം തോൽവിയായി. 35 പോയൻറുമായി രണ്ടാം സ്​ഥാനത്താണ്​ മാഞ്ചസ്​റ്റർ യുനൈറ്റഡ്​.