ലുകാക​ുവിനും മാറ്റിച്ചിനും ഗോൾ; മാഞ്ചസ്​റ്റർ യുനൈറ്റഡ്​ എഫ്​.എ കപ്പ് സെമിയിൽ

ലണ്ടൻ: ബ്രൈറ്റൻ ഹോവ്​ ആൽബിയോണിനെ തോൽപിച്ച്​ മാഞ്ചസ്​റ്റർ യുനൈറ്റഡ്​ ​എഫ്​.എ കപ്പ്​ സെമിയിൽ. ചാമ്പ്യൻസ്​ ലീഗിൽ സെവിയ്യയോട്​ തോറ്റു പുറത്തായത്​ മറക്കാൻ ജയം അനിവാര്യമായിരുന്ന മത്സരത്തിൽ 2^0ത്തിന്​ ജയിച്ചാണ്​ മൗറീന്യോയുടെ പടയാളികൾ അവസാന നാലിൽ ഇടം കണ്ടെത്തിയത്​. ഇരുപകുതികളിലായിരുന്നു യുനൈറ്റഡി​​െൻറ രണ്ടു ഗോളുകൾ. 

മുഴുവൻ താരനിരകളുമായി കളത്തിലിറങ്ങിയിട്ടും ബ്രൈറ്റനെതിരെ ആദ്യ ഗോളിനായി 37ാം മിനിറ്റുവരെ യുനൈറ്റഡിന്​ കാത്തിരിക്കേണ്ടിവന്നു. പ്രതിരോധക്കോട്ട പിളർത്തി മുന്നേറാൻ കഴിയാതിരുന്ന​പ്പോൾ മധ്യനിരയിലെ തന്ത്രശാലിയായ നമാൻജ മാറ്റിച്ചി​​െൻറ ദീർഘവീക്ഷണമാണ്​ ഗോളിന്​ വഴിയൊരുക്കിയത്​. പെനാൽറ്റി മാർക്കിന്​ മുന്നിലായുണ്ടായിരുന്ന ​ലുകാകുവിനെ ലക്ഷ്യമാക്കി വാരകൾ അകലെനിന്ന്​ പോസ്​റ്റി​​െൻറ വലതുമൂലയിലേക്ക്​ ഉയർത്തിനൽകിയ പന്താണ്​ ഗോളിൽ കലാശിച്ചത്​.

ഒാഫ്​ സൈഡിൽ കുരുങ്ങാതെ ലുകാകു ഹെഡറിൽ വലയിലേക്ക്​ പന്ത്​ തിരിച്ചുവിട്ടു. സീസണിൽ മാഞ്ചസ്​റ്റർ യുനൈറ്റഡിനായി ബെൽജിയം താരത്തി​​െൻറ 25ാം ഗോളാണിത്​. 83ാം മിനിറ്റിലായിരുന്നു​ രണ്ടാം ഗോൾ. ഇത്തവണ ആഷ്​ലി യങ്ങി​​െൻറ ഫ്രീകിക്ക്​ മാറ്റിച്ച്​ ത​െന്ന ​ഹെഡറിൽ ഗോളാക്കുകയായിരുന്നു. കഴിഞ്ഞ ദിവസം നടന്ന മറ്റൊരു മത്സരത്തിൽ സ്വാൻസീ സിറ്റിയെ 3^0ത്തിന്​ തോൽപിച്ച്​ ടോട്ടൻഹാം ഹോട്​സ്​പർ സെമിയിൽ പ്രവേശിച്ചു. ക്രിസ്​റ്റ്യൻ എറിക്​സൺ (11, 62), എറിക്​ ലെമേല (45) എന്നിവരാണ് ഗോൾ നേടിയത്​.