ഞെട്ടലില്‍ അര്‍ജന്‍റീന, വെനിസ്വേല ടീമുകള്‍

സാവോപോളോ: ബ്രസീല്‍ ക്ളബായ ചാപ്പെകോയ്ന്‍സ് താരങ്ങളുമായി സഞ്ചരിച്ച വിമാനം തകര്‍ന്നുവീണതിന്‍െറ ഞെട്ടലിലാണ് ലയണല്‍ മെസ്സിയും സംഘവും. കൃത്യം 20 ദിവസം മുമ്പായിരുന്നു അര്‍ജന്‍റീന ദേശീയ ടീം ഇതേ വിമാനത്തില്‍ ബ്രസീലിലേക്ക് പറന്നത്. തെക്കനമേരിക്കന്‍ ലോകകപ്പ് യോഗ്യത റൗണ്ടില്‍ ബ്രസീലിനെ നേരിടാനായി ബ്വേനസ് ഐറിസില്‍ നിന്നാണ് ചാര്‍ട്ടര്‍ ചെയ്ത ‘ലാമിയ ബി.എ.ഇ 146’ വിമാനത്തില്‍ ദേശീയ ടീം ബെലോഹൊറിസോണ്ടയിലേക്ക് പറന്നത്. നവംബര്‍ പത്തിനായിരുന്നു മത്സരം. ടേക്കോഫിന് തൊട്ടുമുമ്പ് ഹാവിയര്‍ മഷറാനോക്കും വിമാനജീവനക്കാര്‍ക്കുമൊപ്പം മെസ്സിയെടുത്ത സെല്‍ഫി സാമൂഹിക മാധ്യമങ്ങളില്‍ പോസ്റ്റുചെയ്തിരുന്നു. അര്‍ജന്‍റീന ടീമിന്‍െറ യാത്രക്ക് മുമ്പ് വെനിസ്വേല ദേശീയ ടീമും ഇതേ വിമാനത്തില്‍ യാത്രചെയ്തിരുന്നതായി വാര്‍ത്ത ഏജന്‍സികള്‍ റിപ്പോര്‍ട്ട് ചെയ്തു.