റയലിന്​ വീണ്ടും ജയം; മൂന്ന്​ പോയൻറ്​ അകലെ കിരീടം

ഗ്രനേഡ​: സ്​പാനിഷ്​ ലാ ലീഗിൽ റയൽ മാഡ്രിഡ്​ കിരീടത്തിനടുത്ത്​. തിങ്കളാഴ്​ച രാത്രി നടന്ന മത്സരത്തിൽ ഗ്രനേഡയെയാണ്​ സിദാനും കൂട്ടരും തകർത്തത് (1-2)​. ആദ്യ പകുതിയിലായിരുന്നു റയലി​​െൻറ രണ്ട്​ ഗോളുകളും​. 

ഫ്രഞ്ച്​ താരങ്ങളായ ഫെർലാൻഡ്​ മെൻഡിയും കരിം ബെൻസേമയുമാണ്​ ഗോളുകൾ നേടിയത്​. 10ാം മിനിറ്റിലായിരുന്നു ആദ്യ ഗോൾ പിറന്നത്​. കസെമിറയിൽനിന്ന്​ പന്ത്​ സ്വീകരിച്ച്​ ബോക്​സിലേക്ക്​ മുന്നേറിയ മെൻഡി ഇടത്​ മൂലയിൽനിന്ന്​ അതിമനോഹരമായി പോസ്​റ്റിലേക്ക്​ നിറയൊഴിക്കുകയായിരുന്നു. കഴിഞ്ഞവർഷം ടീമിലെത്തിയ ഈ പ്രതിരോധഭട​​െൻറ ആദ്യ ഗോളായിരുന്നവത്​. 

ആറ്​ മിനിറ്റിന്​ ശേഷം രണ്ടാമത്തെ ഗോളും വീണു. ലൂകോ മോഡ്രിച്ച്​ നൽകിയ പാസ്​ ബെൻസേമ നിഷ്​​്പ്രയാസം വലയിലെത്തിച്ചു. 50ാം മിനിറ്റിൽ മാച്ചിസാണ്​ ആതിഥേയരുടെ ആശ്വാസ ഗോൾ നേടിയത്​.

കോവിഡ്​ ലോക്ഡൗണിനുശേഷം ലാലിഗയിൽ റയലി​​െൻറ തുടർച്ചയായ ഒമ്പതാം വിജയമാണിത്​. 36 മത്സരങ്ങളിൽനിന്ന്​ 83 പോയൻറായി റയലിന്​. രണ്ട്​ മത്സരങ്ങൾ ബാക്കിയുള്ള റയലിന്​ മൂന്നു പോയൻറ്​ കൂടി ലഭിച്ചാൽ കിരീടം സ്വന്തമാക്കാം. രണ്ട്​ സീസണുകൾക്ക്​ ശേഷമാണ് മാഡ്രിഡുകാർ വീണ്ടും കിരീടം നേടാൻ ഒരുങ്ങുന്നത്​. 36 മത്സരങ്ങളിൽനിന്ന്​ 79 പോയിൻറാണ്​ രണ്ടാംസ്​ഥാനത്തുള്ള ബാഴ്​സലോണക്ക്​. ഹാട്രിക്​ കിരീടം തേടിയിറങ്ങിയ ബാഴ്​സയുടെ പ്രതീക്ഷകൾ ഏകദേശം അസ്​തമിച്ച മട്ടാണ്​.