ക്രിസ്​റ്റ്യാനോ റൊണാൾഡോ ഫുട്​ബാളിലെ രാജാവ്​- ഇഷ്​ടം പറഞ്ഞ്​ രോഹിത്​ ശർമ

മുംബൈ: സ്​പാനിഷ്​ ഫുട്​ബാൾ ക്ലബ്​ റയൽ മഡ്രിഡി​​െൻറ കടുത്ത ആരാധകനാണ്​ ഇന്ത്യൻ ക്രിക്കറ്റ്​ താരം രോഹിത്​ ശർമയെന്ന കാര്യം പരസ്യമാണ്​. റയലിനോടുള്ള ആരാധന മുത്ത്​ ഇൗയടുത്ത്​ നടന്ന റയലും ബാഴ്​സലോണയും തമ്മിലുള്ള ‘എൽക്ലാസികോ’ കാണാൻ വേണ്ടി താരം സ്​പെയിനിലേക്ക്​ പറന്നിരുന്നു. ഇപ്പോൾ റയലി​​െൻറ മുൻ സൂപ്പർ താരം ക്രിസ്​റ്റ്യാനോ റൊണാൾഡോയെ ഫുട്​ബാളിലെ രാജാവെന്ന്​ വിശേഷിപ്പിച്ചിരിക്കുകയാണ്​ രോഹിത്​. ബംഗ്ലാദേശ്​ ഓപണിങ്​ ബാറ്റ്​സ്​മാൻ തമീം ഇഖ്​ബാലുമായി നടത്തിയ ഇൻസ്​റ്റഗ്രാം ചാറ്റ്​ഷോക്കിടെയിലാണ്​ ത​​െൻറ റൊണാൾഡോ ആരാധന ഹിറ്റ്​മാൻ തുറന്നുപറഞ്ഞത്​. 

റൊണാൾഡോയെക്കുറിച്ച്​ ചോദിച്ചപ്പോൾ രോഹിത്​ വാചാലനായി ‘ആരാണ്​ റൊണാൾഡോയെ ഇഷടപ്പെടാത്തത്​. അദ്ദേഹം രാജാവാണ്​. ത​​െൻറ കരിയറിൽ അദ്ദേഹം എത്തിപ്പിടിച്ചതെല്ലാം അതുല്യമാണ്​. അദ്ദേഹത്തി​​െൻറ നേട്ടങ്ങളെ നാം അഭിനന്ദിച്ചേ മതിയാകൂ’ രോഹിത്​ പറഞ്ഞു. 

‘അത്തരമൊരു സാഹചര്യത്തിൽ നിന്നും ഉയർന്നുവരികയെന്നത്​ എളുപ്പമുള്ള കാര്യമല്ല. തുടക്ക കാലത്ത്​ റെണാൾഡോയുടെ പാത അത്യന്തം ദുഷ്​കരമായിരുന്നു. കരിയറി​​െൻറ തുടക്കത്തിൽ കഷ്​ടപ്പാടനുഭവിക്കുകയും അതി​​െൻറ അവസാനത്തിൽ കിട്ടിയ അവസരങ്ങൾ മുതലെടുത്ത്​ വലിയ നേട്ടങ്ങൾ സാധ്യമാക്കുകയും ചെയ്​ത ആളുകളെ ഞാനെന്നും അഭിനന്ദിക്കും’- രോഹിത്​ കൂട്ടിച്ചേർത്തു. നേരത്തെ മുൻ ഇംഗ്ലണ്ട്​ നായകൻ കെവിൻ പീറ്റേഴ്​സണുമായി നടത്തിയ സംഭാഷണത്തിനിടെ അർജൻറീന നായകൻ ലയണൽ മെസിയേക്കാൾ മികച്ച താരമായി റെണാൾഡോയെ ഹിറ്റ്​മാൻ തെരഞ്ഞെടുത്തിരുന്നു.   

2003ൽ പോർചുഗീസ്​ ക്ലബായ സ്​പോർടിങ്​ ലിസ്​ബണിൽ നിന്ന്​ ഒരുകൗമാരക്കാരന്​ ലഭിക്കുന്ന ഏറ്റവും വലിയ ട്രാൻസ്​ഫർ തുകക്ക്​ ഇംഗ്ലണ്ടിലെ മാഞ്ചസ്​റ്റർ യുനൈറ്റഡിൽ എത്തിയ അന്ന്​ മുതൽ ഫുട്​ബാൾ ലോകത്തെ വിസ്​മയിപ്പിക്കാൻ തുടങ്ങിയതാണ്​ ക്രിസ്​റ്റ്യാനോ.

ലോകത്തിലെ ഏറ്റവും മികച്ച ഫുട്​ബാൾ താരത്തിനുള്ള പുരസ്​കാരം അഞ്ചുതവണ സ്വന്തമാക്കിയ റൊണാൾഡോ അഞ്ച്​ ചാമ്പ്യൻസ്​ ലീഗ്​ കിരീടങ്ങൾ സ്വന്തമാക്കിയ ഏക താരം കൂടിയാണ്​. 2018ൽ റയലിനോടൊപ്പം വൻകര കീഴടക്കിയ ശേഷം ഇറ്റാലിയൻ ചാമ്പ്യൻമാരായ യുവൻറസിലേക്ക്​ കൂടുമാറിയിരിക്കുകയാണ്​ താരം. കരിയറിൽ മൂന്ന്​ പ്രീമിയർ ലീഗ്​, രണ്ട്​ ലാലിഗ, ഒരു സീരി ‘എ’ കിരീടവും പോർചുഗീസ്​ താരം സ്വന്തമാക്കി. 

ദേശീയ ജഴ്​സിയിലും മിന്നിത്തിളങ്ങുന്ന താരം ഇതുവരെ 99 അന്താരാഷ്​ട്ര ഗോളുകൾ നേടിയിട്ടുണ്ട്​. ഇറാ​​െൻറ ഇതിഹാസ താരം അലി ദായി (109 ഗോൾ) മാത്രമാണ്​ എക്കാലത്തെയും മികച്ച ഗോൾവേട്ടക്കാരുടെ പട്ടികയിൽ സൂപ്പർ താരത്തിന്​ മുന്നിലുള്ളത്​. ഈ സീസണിൽ സീരി എയിൽ മികച്ച ​ഗോൾവേട്ടക്കാരനായാൽ പ്രീമിയർ ലീഗ്​, ലാലിഗ, സീരി എ എന്നീ മൂന്ന്​ ലീഗുകളിലും ഈ നേട്ടം കൈവരിക്കുന്ന ആദ്യ താരമാകാനും താരത്തിനാകും.