എസ്​.എഫ്​.​െഎ നേതാവി​െൻറ പേരിൽ നടത്തുന്ന കബഡി മത്സരത്തിൽ ഒന്നാം സമ്മാനം ‘നമോ ഫ്രണ്ട്​സ്’​ വക

കാസർകോട്​: എസ്​.എഫ്​.​െഎ നേതാവി​​െൻറ സ്​മരണാർഥം സി.പി.എം. നേതൃത്വത്തിലുള്ള ക്ലബ്ബ് നടത്തുന്ന കബഡി മത്സരത്തിൽ ഒന്നാം സമ്മാനം ‘നമോ ഫ്രണ്ട്​സ്​’ വക. മരണപ്പെട്ട എസ്​.എഫ്​.​െഎ കാസർകോട്​ ജില്ലാ സെക്രട്ടറിയറ്റ്​ അംഗം നുള്ളിപ്പാടി ചെന്നിക്കരയിലെ അഹമ്മദ്​ അഫ്​സലി​​െൻറ സ്​മരണക്കായി ​നുള്ളിപ്പാടി ചെന്നിക്കര ആർട്​സ്​ ആൻഡ്​ സ്​പോർട്​സ്​ ക്ലബ്ബ്​ ശനിയാഴ്​ച വൈകീട്ട്​ 6ന്​ നടത്തുന്ന കബഡി ടൂർണമ​െൻറിൽ ഒന്നാം സ്ഥാനക്കാർക്കായുള്ള ട്രോഫിയാണ്​ ‘നമോ ഫ്രണ്ട്​സ്​’ മായിപ്പാടി എന്ന പ്രത്യക്ഷത്തിൽതന്നെ ആർ.എസ്​.എസ്​ ആഭിമുഖ്യമുള്ള ഗ്രൂപ്പ്​ നൽകുന്നത്​. 

സി.പി.എം കാസർകോട്​ ​ലോക്കൽകമ്മറ്റി സെക്രട്ടറി അനിൽ ചെന്നിക്കരയാണ്​ നിലവിൽ ചെന്നിക്കര ആർട്​സ്​ ആൻഡ്​ സ്​പോർട്​സ്​ ക്ലബ്ബി​​െൻറ പ്രസിഡൻറ്​. കാസർകോട്​ നഗരസഭയിലെ ഏക സി.പി.എം അംഗം കെ. ദിനേഷാണ്​ ​ക്ലബ്ബി​​െൻറ രക്ഷാധികാരികളിലൊരാൾ. തീർത്തും ഇടതുപക്ഷ സ്വഭാവവും മതേതര കാഴ്​ചപ്പാടും പുലർത്തുന്ന ക്ലബ്ബ്​ നടത്തുന്ന കബഡി മത്സരത്തി​ൽ ഒന്നാം സ്ഥാനക്കാർക്കുള്ള ട്രോഫി ‘നമോ ഫ്രണ്ട്​സ്​’ പോലുള്ള തീവ്ര ഹൈന്ദവ കക്ഷികൾ നൽകുന്നത്​ ചർച്ചയായിട്ടുണ്ട്​. എന്നാൽ ഇതിനെക്കുറിച്ചുള്ള ചോദ്യങ്ങൾക്ക്​ ക്ലബ്ബ്​ ഭാരവാഹികൾക്ക്​ കൃത്യമായ മറുപടി നൽകാനുമാവുന്നുമില്ല. 

മുൻകാലങ്ങളിൽ ജീവകാരുണ്യ പ്രവർത്തനങ്ങളൊക്കെ നടത്തി ശ്രദ്ധ പിടിച്ചുപറ്റിയ ക്ലബ്ബി​​െൻറ സമീപനത്തിലുണ്ടായ ഇൗ മാറ്റം ഏറെ ഗൗരവത്തോടെയാണ്​ പൊതുസമൂഹം വീക്ഷിക്കുന്നത്​. സി.പി.എമ്മിനകത്തുതന്നെ ഇതു സംബന്ധിച്ച്​ വ്യത്യസ്​ത അഭിപ്രായം ഉയർന്നുകഴിഞ്ഞു. പാർട്ടി നേതൃത്വം അറിയാതെ ഇങ്ങനെയൊന്ന്​ സംഭവിക്കില്ലെന്നാണ്​ അനുഭാവികളും പറയുന്നത്​.