ആരാധകർക്കായി കിടിലൻ ആപ്പ്​ അവതരിപ്പിച്ച്​ കേരള ബ്ലാസ്​റ്റേഴ്​സ്​; ക്ലബ്ബുമായി ബന്ധപ്പെട്ട വിശേഷങ്ങൾ ഇനി വിരൽതുമ്പിൽ

കൊച്ചി: കേരള ബ്ലാസ്​റ്റേഴ്​സിന്​ ഇനി മൊബൈൽ ആപ്ലിക്കേഷനും. ടീമി​െൻറ ഔദ്യോഗിക മൊബൈല്‍ ആപ്ലിക്കേഷന്‍ വ്യാഴാഴ്​ച്ചയാണ്​​ അധികൃതർ അവതരിപ്പിച്ചത്​. ബ്ലാസ്​റ്റേഴ്​സുമായി ബന്ധപ്പെട്ട ഏറ്റവും പുതിയ വാർത്തകളും വിശേഷങ്ങളും ആരാധകരുടെ വിരൽതുമ്പിലെത്തിക്കാനാണ്​​ പുതിയ ആപ്പിലൂടെ ലക്ഷ്യമിടുന്നത്​.

'Kerala Blasters FC' എന്നാണ്​ ആപ്പി​െൻറ പേര്​. സ്വീഡിഷ് ആസ്ഥാനമായി പ്രവര്‍ത്തിക്കുന്ന സ്‌പോര്‍ട്‌സ് മാര്‍ക്കറ്റിങ് സ്ഥാപനമായ ഫോര്‍സ എഫ്‌സിയുമായി സഹകരിച്ചാണ് ആപ്പ്​ വികസിപ്പിച്ചിരിക്കുന്നത്​. ആപ്പിള്‍ - ആന്‍ഡ്രോയിഡ് സ്‌റ്റോറുകളിലൂടെ ആപ്പ്​ ഡൗൺലോഡ്​ ചെയ്യാം.

ക്ലബ്ബുമായി ബന്ധപ്പെട്ട ഏറ്റവും പുതിയ എക്​സ്​ക്ലൂസീവായ ഉള്ളടക്കങ്ങളും തത്സമയ മാച്ച് അപ്‌ഡേറ്റുകള്‍, പരിശീലന ദൃശ്യങ്ങള്‍, തിരശീലയ്ക്ക് പിന്നിലെ കവറേജ്, താരങ്ങളുടെയും പരിശീലകരുടെയും അഭിമുഖങ്ങള്‍ എന്നിവ ആപ്പിലൂടെ ആസ്വദിക്കാം. ആരാധകർക്ക്​ സംവദിക്കാനും ടീമിന്​ വേണ്ടിയുള്ള ആവേശം പ്രകടിപ്പിക്കാനമുമൊക്കെയുള്ള അവസരങ്ങളും ആപ്പിൽ ലഭ്യമായിരിക്കും. ആരാധകർക്ക് ബാഡ്ജുകളും ലോയല്‍റ്റി പോയിൻറുകളും സ്വന്തമാക്കാനും ആപ്പിലൂടെ കഴിയും. ക്ലബ്ബി​െൻറ കടുത്ത ആരാധകർക്ക്​ പ്രതിമാസം, അര്‍ധവാര്‍ഷികം അല്ലെങ്കില്‍ വാര്‍ഷിക അംഗത്വ പാക്കേജ്​ തെരഞ്ഞെടുത്ത്​ പ്രീമിയം മെമ്പറാവാനും അവസരമുണ്ട്​. വെല്‍ക്കം കിറ്റുകൾ അടങ്ങുന്നതാണ്​ വാര്‍ഷിക അംഗത്വ പാക്കേജ്​.