നാല്​ ബോളിൽ നാല്​ വിക്കറ്റ്​; ടി20 ലോകകപ്പിൽ ചരിത്ര നേട്ടം കുറിച്ച്​ ഐറിഷ് ബൗളർ -വിഡിയോ

ഇത്തവണത്തെ ഐസിസി ടി20 ലോകകപ്പിലെ ആദ്യത്തെ ഹാട്രിക്ക്​ നേട്ടം സ്വന്തമാക്കിയിരിക്കുകയാണ്​ അയർലൻഡ്​ പേസ്​ ബൗളറായ കേർട്ടിസ്​ കാംപർ. നെതര്‍ലാന്‍ഡ്‌സിനെതിരായ ലോകകപ്പ് യോഗ്യതാ മല്‍സസരത്തിലായിരുന്നു താരം നേട്ടം സ്വന്തമാക്കിയത്​. 10ാം ഓവർ എറിയാനെത്തിയ കാംപർ തുടർച്ചയായി നാല്​ ബോളുകളിലും വിക്കറ്റുകളെടുക്കുകയായിരുന്നു​.

ടി20 ലോകകപ്പ്​ ചരിത്രത്തിൽ ആദ്യമായാണ്​ ഒരു ബൗളർ ഒരോവറിൽ തുടരെ നാല്​ വിക്കറ്റുകൾ വീഴ്​ത്തുന്നത്​. 2007ലെ പ്രഥമ ടി20 ലോകകപ്പിൽ ബംഗ്ലാദേശിനെതിരെ നടന്ന മത്സരത്തിൽ ആസ്​ട്രേലിയൻ ഇതിഹാസ ബൗളർ ബ്രെറ്റ്​ലീ ഹാട്രിക് വിക്കറ്റുകൾ വീഴ്​ത്തിയിരുന്നു. അതേസമയം, അന്താരാഷ്​ട്ര ടി20 ക്രിക്കറ്റിൽ രണ്ട്​ ബൗളർമാർ ഒരോവറിൽ തുടരെ നാല്​ വിക്കറ്റുകൾ വീഴ്​ത്തിയിട്ടുണ്ട്​. 2019ൽ ന്യൂസിലാൻഡിനെതിരെ ശ്രീലങ്കയുടെ അപകടകാരിയായ ബൗളർ ലസിത്​ മലിംഗ, അയർലൻഡിനെതിരെ അഫ്​ഗാൻ താരം റാഷിദ്​ ഖാനുമാണ്​ നേട്ടം കുറിച്ചത്​.

പത്തോവറിൽ രണ്ട്​ വിക്കറ്റിന്​ 50 റൺസ്​ എന്ന നിലയിലായിരുന്ന നെതർലാൻഡ്​സിനെ കാംപർ 50/6 എന്ന പരിതാപകരമായ നിലയിലേക്ക്​ എത്തിക്കുകയായിരുന്നു. വൈഡ്​ ബോൾ എറിഞ്ഞുകൊണ്ടായിരുന്നു താരത്തി​െൻറ തുടക്കം. രണ്ടാമത്തെ ബോൾ ഡോട്ട്​ ബോളായും മാറി. എന്നാൽ, മൂന്നാമത്തെ ബോളിൽ കോളിൻ അക്കർമാനെ (11) വിക്കറ്റ്​ കീപ്പറുടെ കൈകളിലെത്തിച്ച് കാംപർ​ ആദ്യം വിക്കറ്റ്​ നേട്ടം കുറിച്ചു. ഔട്ട് വിളിക്കാൻ അംപയർ വിസമ്മതിച്ചതോടെ അയർലൻഡിന്​ ഡി.ആർ.എസിനെ ആശ്രയിക്കേണ്ടതായി വന്നു.

നാലാമത്തെ ബോളിൽ മുൻ ഐപിഎല്‍ താരം കൂടിയായ റയാൻ ടൻ ഡുഷാറ്റയെ റൺസെടുക്കാൻ അനുവദിക്കാതെ കാംപർ മടക്കിയയച്ചു. സ്‌കോട്ട് എഡ്വാര്‍ഡ്‌സും ഗോൾഡൻ ഡെക്കായി മടങ്ങിപ്പോയി. അവസാന പന്തിൽ റോള്‍ഫ് വാന്‍ഡര്‍ മെര്‍വിനെ ക്ലീൻ ബൗൾഡാക്കിക്കൊണ്ടാണ്​ കാംപർ ചരിത്രം നേട്ടം പൂർത്തിയാക്കിയത്​.