''ഇത്​ ടെന്നീസ്​ കണ്ട ക്ലാസിക്​ പോര്​''- റൊളാങ്​ ഗാരോയിൽ നദാലിനെ വീഴ്​ത്തിയ ദ്യോകോയെ ആഘോഷിച്ച്​ കായിക ലോകം

പാരിസ്​: എട്ടുമാസത്തിനിടെ ഒരിക്കലൂടെ ​റൊളാങ്​ ഗാരോ കളിമൺ കോർട്ടിന്‍റെ മായികതയിലേക്ക്​ ലോക ഒന്നാം നമ്പർ താരത്തെ കൈകൊടുത്ത്​ സ്വീകരിക്കു​േമ്പാൾ സ്​പെയിനുകാരന്​ വലിയ ആധികളുണ്ടായിരുന്നോ ആവോ.. എതിരാളിയെ നിലംതൊടീക്കാതെ അഞ്ചു പോയിന്‍റ്​ തുടർച്ചയായി അടിച്ചെടുത്ത്​ ആദ്യ സെറ്റിൽ വരവറിയിക്കുകയും ചെയ്​തതായിരുന്നു. പക്ഷേ, ഇതെത്ര കണ്ടതാ എന്ന മട്ടിലായിരുന്നു ദ്യോകോ. അഞ്ചു പോയിന്‍റ്​ വിട്ടുനൽകിയ അതേ ലാഘവത്തിൽ അതിവേഗം​ മൂന്നു പോയിന്‍റ്​ തിരിച്ചുപിടിച്ച ശേഷം ആദ്യ സെറ്റ്​ വിട്ടുനൽകിയ താരം പിന്നീട്​ നടത്തിയത്​ മാന്ത്രിക ​കഥകളിൽ കേട്ടു പരിചയിച്ച പ്രകടനം.

കോവിഡിൽ തളർന്നുകിടക്കുന്ന കളിമുറ്റത്ത്​​ തീ പകർന്ന ഇതിഹാസ താരങ്ങൾ ഒന്നിനൊന്ന്​ മികവിന്‍റെ പുസ്​തകങ്ങളായി പുലർത്തിയായിരുന്നു റാ​ക്കറ്റേന്തിയത്​. അസാധ്യമായ റി​േട്ടണുകളും ഡ്രോപുകളുമായി നദാലും ഒന്നിലും വീഴാ​നില്ലെന്ന ആവേശവുമായി ദ്യോകോയും മൈതാനത്തു ജ്വലിച്ചുനിന്നപ്പോൾ മൈതാനത്തും ടെലിവിഷൻ സ്​ക്രീനുകൾക്ക്​ മുന്നിലും വാ പിളർന്ന്​ കാണികൾ ദൃശ്യവിരുന്ന്​ ആസ്വദിച്ചിരുന്നു. നദാൽ എതിരാളിയായിട്ടും ജയിച്ച മത്സരം റൊളാങ്​ ഗാരോയിൽ തന്‍റെ ഏറ്റവും മികച്ച കളിയാണെന്നും കരിയറിലെ മികച്ച മൂന്നിലൊന്നാണെന്നുമായിരുന്നു ദ്യോകോയുടെ പ്രതികരണം.

ഫ്രഞ്ച്​ ഓപണിൽ വീഴ്​ത്താനാകാത്ത അർമഡയാണ്​ എക്കാലത്തും നദാൽ. ഇവിടെ മാത്രം സ്വന്തമാക്കിയത്​ 13 കിരീടങ്ങൾ. വെള്ളിയാഴ്ചയും അതേ ​മാസ്​മരിക തുടക്കത്തിനാണ്​ മൈതാനം സാക്ഷിയായത്​. പക്ഷേ, പിന്നീട്​ എല്ലാം ദ്യോകോ പിടിച്ചു. പലവട്ടം പിന്നിലായിട്ടും മനോഹരമായി തിരികെയെത്തി. സ്​പ്രിന്‍ററുടെ വേഗവുമായി ​​േഡ്രാപുകൾ കോർട്ട്​ കടത്തി. അതിവേഗം സ്​മാഷുകൾ പായിച്ചു. എതിരാളിയെ ഇരുവശത്തേക്കും ഓടിച്ചുതളർത്തി. അവസാനം രാജാവിനെ പോലെ ജയവുമായി മടങ്ങി. നദാലിനെതിരെ കരിയറിലെ മൂന്നാം ജയം. സ്​പാനിഷ്​ താരത്തിനാക​ട്ടെ, റൊളാങ്​ ഗാരോയിൽ 106 കളികളിൽ മൂന്നാമത്തെ തോൽവിയും.

ഇതേ മൈതാനത്ത്​ ആദ്യ നാലുകളികളിലും ആദ്യ സെറ്റ്​ വിട്ടുനൽകിയ ശേഷമായിരുന്നു ദ്യോകോവിച്ച്​ ജയിച്ചുകയറിയത്​ എന്നതുകൂടി ചേർത്തുവായിക്കണം. ഇനി കലാശപ്പോരിൽ സിറ്റ്​സിപ്പാസിനെതിരെ ജയിക്കാനായാൽ 19ാം ഗ്രാന്‍റ്​സ്ലാം കിരീടം.

കളി കണ്ട കായിക ലോകം മുഴുവൻ ദ്യോകോ മാജികിന്​ കൈയടിക്കുന്നതും പിന്നീട്​ കണ്ടു. ഇത്​ ടെന്നിസ്​ മാത്രമല്ലെന്നും കളിയഴകിന്‍റെ അത്യൂനന്നതികൾ അടയാളപ്പെടുത്തലാണെന്നുമായിരുന്നു ഇന്ത്യൻ ക്രിക്കറ്റ്​ താരം അശ്വിന്‍റെ പ്രതികരണം. ഒരു സെറ്റ്​ മുന്നിൽനിന്നിട്ടും നദാൽ ​റൊളാങ്​ ഗാരോയിൽ നദാൽ തോൽവിയറിഞ്ഞെങ്കിൽ വല്ലാത്ത കാലമായിപ്പോയെന്ന്​ വാഷിങ്​ടൺ സുന്ദർ പറയുന്നു. അമാനുഷിക അധ്വാന​െമടുത്ത്​ ഓരോ പോയിന്‍റും സ്വന്തമാക്കിയ ദ്യോകോക്ക്​ 100 ​മാർക്ക്​ നൽകുന്നുവെന്നും താരം ട്വിറ്ററിൽ കുറിച്ചു.