യു.എസ് ഓപൺ: ഖചനോവ്, റൂഡ്, ഗാർസിയ, ജാബിയർ സെമിയിൽ

ന്യൂയോർക്: റഷ്യയുടെ കാരൻ ഖചനോവ്, നോർവേക്കാരൻ കാസ്പർ റൂഡ്, ഫ്രഞ്ച് താരം കരോലിൻ ഗാർസിയ, തുനീഷ്യക്കാരി ഒൻസ് ജാബിയർ എന്നിവർ യു.എസ് ഓപൺ സെമിഫൈനലിൽ പ്രവേശിച്ചു. അഞ്ചു സെറ്റ് നീണ്ട പുരുഷ സിംഗ്ൾസ് ക്വാർട്ടർ ഫൈനൽ പോരാട്ടത്തിൽ ആസ്ട്രേലിയയുടെ നിക് കിർഗിയോസിനെ 7-5, 4-6, 7-5, 6-7 (3/7), 6-4 സ്കോറിനാണ് ഖചനോവ് വീഴ്ത്തിയത്. സെമിയിൽ റൂഡുമായി ഏറ്റുമുട്ടും. ഇറ്റലിയുടെ മറ്റേയേ ബെരേറ്റിനിയെ 6-1, 6-4, 7-6 (7/4)നാണ് റൂഡ് തോൽപിച്ചത്.

വനിത സിംഗ്ൾസിൽ ആതിഥേയ താരം കോകോ ഗോഫിന്റെ വിജയയാത്രക്ക് ഗാർസിയ ക്വാർട്ടറിൽ അന്ത്യമിട്ടു. 6-3, 6-4 സ്കോറിനാണ് അമേരിക്കക്കാരി വീണത്. സെമിയിൽ ഒൻസ് ജാബിയറിനെ നേരിടും. ഓസീസ് താരം അജില തോംലിജാനോവികിനെ 6-4, 7-6(4) നെ തോൽപിച്ചാണ് ജാബിയർ യു.എസ് ഓപൺ അവസാന നാലിൽ ഇടംകണ്ടെത്തുന്ന ആദ്യ അറബ് വനിതയായത്.