ഭാരതമേ നന്ദി...​ മെഡൽ രാജ്യത്തിന്​ സമർപ്പിച്ച്​​ മീരഭായി ചാനു

ടോക്യോ: ഒളിമ്പിക്സിൽ ഭാരോദ്വഹനത്തിൽ വെള്ളി നേടി ഇന്ത്യയുടെ അഭിമാനമായി മാറിയ മീരഭായി ചാനു മെഡൽ സ്വന്തം ജനതക്ക്​ സമർപ്പിച്ചു. പ്രാർഥനകൾക്കും ആശംസകൾക്കും കൃതജ്ഞത രേഖപ്പെടുത്തുന്നതായി ചാനു ട്വിറ്ററിൽ കുറിച്ചു. തന്‍റെ മെഡൽ എല്ലാ ഭാരതീയർക്കും സമർപ്പിക്കുന്നതായും 22 സെക്കൻഡ്​ ദൈർഘ്യമുള്ള വിഡിയോ സ​ന്ദേശത്തിൽ ചാനു പറഞ്ഞു.

വനിതകളുടെ ഭാരോദ്വഹനത്തിൽ 49 കിലോ വിഭാഗത്തിലാണ്​ മീര ​രാജ്യത്തിനായി വെള്ളി മെഡൽ നേടിയത്​​. സ്​നാച്ചിൽ മീര 87 കിലോഗ്രാം ഉയർത്തി. ഇന്ത്യക്കായി ഭാരോദ്വഹനത്തിൽ ഒളിമ്പിക്​ മെഡൽ സ്വന്തമാക്കുന്ന രണ്ടാമത്തെ ഇന്ത്യക്കാരിയാണ്​ ചാനു. 2000 സിഡ്​നി ഒളിമ്പിക്​സിൽ 69 കിലോ വിഭാഗത്തിൽ കർണം മല്ലേശ്വരി വെങ്കലം നേടിയിരുന്നു.

ചൈനയുടെ സിഹിഹു ഹൂവാണ്​ സ്വർണം നേടിയത്​. 84, 87 കിലോഗ്രാം ഉയർത്തിയ ചാനു 89 കിലോ ഉയർത്തുന്നതിൽ പരാജയപ്പെട്ടു. അതേ സമയം 94 കിലോ ഉയർത്തിയാണ്​ ചൈനീസ്​ താരം ഒളിമ്പിക്​ റെക്കോഡോടെ സ്വർണം നേടിയത്​. ഇന്തോനേഷ്യയുടെ കാൻഡിക്​ വിൻഡി ഐഷക്കാണ്​ വെങ്കലം.