ഒളിമ്പിക്​സ്​ ഫുട്​ബാൾ; ഈജിപ്​തിനെ വീഴ്​ത്തി അർജന്‍റീനക്ക്​ ആദ്യ ജയം, പൊരുതി ജയിച്ച്​ ഫ്രാൻസ്​

ടോക്യോ: ആഫ്രിക്കൻ കരുത്തരായ ഈജിപ്​തിനെ ഏകപക്ഷീയമായ ഒരു ഗോളിന്​ വീഴ്​ത്തി അർജന്‍റീന ഒളിമ്പിക്സ്​​ പ്രതീക്ഷകൾ നിലനിർത്തി. 52ാം മിനിറ്റിൽ ഫെക്കുണ്ടോ മെദിന നേടിയ ഗോളാണ്​ അർജന്‍റീനയെ വിജയത്തിലെത്തിച്ചത്​. ഇരുടീമുകളും മത്സരത്തിൽ തുല്യനിലയിലുള്ള പ്രകടനമാണ്​​ കാഴ്ച വെച്ചത്​. ആദ്യ മത്സരത്തിൽ ആസ്​ട്രേലിയയോട്​ പരാജയപ്പെട്ട അർജന്‍റീനക്ക്​ ജയം ആശ്വാസമായി. സ്​പെയിനുമായാണ്​ അർജൻറീനയുടെ അടുത്ത മത്സരം.

അതേസമയം കടുത്ത പോരാട്ടത്തിനൊടുവിൽ ദക്ഷിണാഫ്രിക്ക ഉയർത്തിയ വെല്ലുവിളി ഫ്രാൻസ്​ മറികടന്നു. ഇരു ടീമുകളും കൊണ്ടും കൊടുത്തും മുന്നേറിയ മത്സരത്തിൽ പിന്നിൽ നിന്നും പൊരുതിക്കയറിയാണ്​ ഫ്രാൻസ്​ ജയം സ്വന്തമാക്കിയത്​്​​. 86 മിനിറ്റുവരെ രണ്ടിനെതിരെ മൂന്നുഗോളുകൾക്ക്​ ദക്ഷിണാഫ്രിക്ക മുന്നിലായിരുന്നെങ്കിലും 86ാം മിനിറ്റിൽ പെനൽറ്റി​യിലൂടെ ആന്ദ്രേ പിയേർ ഫ്രഞ്ചുപടയെ ഒപ്പമെത്തിച്ചു. 92ാം മിനിറ്റിൽ തെജി സവാനിയറുടെ ഇടം കാലൻ ഷോട്ട്​ ദക്ഷിണാഫ്രിക്കൻ വലകുലുക്കിയതോടെയാണ്​ ഫ്രഞ്ചുപട വിജയം സ്വന്തമാക്കിയത്​.

വിവിധ മേഖലക​ളിലായി നടന്ന യോഗ്യത മത്സരങ്ങൾ വിജയിച്ചെത്തുന്ന 16 ടീമുകളാണ്​ ഒളിമ്പിക്​സിൽ പ​ങ്കെടുക്കുന്നത്​. 23 വയസ്സിന്​ താഴെയുള്ള കളിക്കാരാണ്​ വിവിധ രാജ്യങ്ങൾക്കായി കളിക്കുന്നത്​. ഇതിന്​ മുകളിൽ പ്രായമുള്ള 3 പേർക്കും ടീമിലിടം നേടാം. എന്നാൽ ക്ലബുകൾ ഒളിമ്പിക്​സിനായി താരങ്ങളെ റിലീസ്​ ചെയ്യണമെന്ന്​ നിയമമില്ലാത്തതിനാൽ തന്നെ സൂപ്പർ താരങ്ങളിലധികവും പ​ങ്കെടുക്കുന്നില്ല. വനിത ഫുട്​ബാളിൽ ഇത്തരം നിബന്ധനകളില്ല.