മാനസിക സമ്മർദം; ജിംനാസ്റ്റിക്​സ്​ സൂപ്പർ താരം സിമോൺ ബൈൽസ്​ രണ്ട്​ ഫൈനലുകളിൽ നിന്ന്​ കൂടി പിൻമാറി

ടോക്യോ: ഒളിമ്പിക്​സിൽ ആർട്ടിസ്​റ്റിക്​ ജിംനാസ്റ്റിക്​സ്​ ടീം ഇനത്തിൽ നിന്ന്​ അമേരിക്കൻ സൂപ്പർ താരം സിമോൺ ബൈൽസ്​ പിൻമാറിയത്​ കായിക ലോകം ഞെട്ടലോടെയാണ്​ കേട്ടത്​. ഒളിമ്പിക്​സിൽ സ്വർണം വാരിക്കൂട്ടുമെന്ന്​ കരുതപ്പെട്ടടിരുന്ന താരം മാനസിക സമ്മർദത്തെ തുടർന്നാണ്​ പിൻവാങ്ങിയത്​.

മെഡിക്കൽ സംഘത്തിന്‍റെ നിർദേശ പ്രകാരം താരം രണ്ട്​ ഫൈനലുകളിൽ നിന്ന്​ കൂടി പിൻമാറിയതായി യു.എസ്​ ജിംനാസ്റ്റിക്​സ്​ അറിയിച്ചു. വോൾട്ട്​, അൺഈവൻ ബാർസ്​ എന്നീ ഇനങ്ങളുടെ ഫൈനൽസിൽ ബൈൽസ് പ​ങ്കെടുക്കില്ല. അവരെ ദിവസവും പരിശോധിക്കുന്നതായി ​ യു.എസ്​ ജിംനാസ്റ്റിക്​സ്​ അറിയിച്ചു.

ബൈല്‍സ് പിന്മാറിയതിനെത്തുടര്‍ന്ന് ആർട്ടിസ്​റ്റിക്​ ജിംനാസ്റ്റിക്​സ്​ ടീം ഇനത്തിൽ അമേരിക്കയെ പിന്തള്ളി റഷ്യ സ്വര്‍ണം നേടിയിരുന്നു. പിന്മാറാനുള്ള കാരണം സമ്മാനദാനവേളയില്‍ വ്യക്തമാക്കിയ താരം പൊട്ടിക്കരഞ്ഞു. റിയോ ഒളിമ്പിക്‌സില്‍ നാല് സ്വര്‍ണമെഡലുകളാണ്​ ബൈല്‍സ് വാരിക്കൂട്ടിയത്​.

പ്രായമേറെ ചെന്നില്ലെങ്കിലും ലോക ചാമ്പ്യൻഷിപ്പുകളിലും ഒളിമ്പിക്​സിലുമായി 30 മെഡലുകൾ സ്വന്തമാക്കിയ ബൈൽസ് ഇത്തവണയും അനായാസം സ്വർണമെഡലുകൾ വാരിക്കൂട്ടുമെന്ന്​ പ്രവചിക്കപ്പെട്ടിരുന്നു.