ടെ​സ്​റ്റ്​ ചാമ്പ്യൻഷിപ്പിൽ മൂന്നാം സ്ഥാനം; ​ഇംഗ്ലണ്ടിനെ സൂക്ഷിക്കുക

ഇംഗ്ലീഷുകാർ ഇക്കുറിയും പതിവ്​ തെറ്റിച്ചില്ല. ആദ്യകളി തോറ്റ ശേഷം, വർധിത വീര്യത്തോടെ തിരികെയെത്തി എതിരാളിയെ നാണംകെടുത്തി പരമ്പര വിജയം നേടുക. കഴിഞ്ഞ അഞ്ചുവർഷമായി സ്വന്തം മണ്ണിൽ ഇംഗ്ലീഷുകാരുടെ ശൈലിയായി മാറിയിരിക്കുകയാണ്​ ഇൗ തിരിച്ചുവരവും വിജയ പരമ്പരയും.
വെസ്​റ്റിൻഡീസിനെതിരായ മൂന്ന്​ ടെസ്​റ്റുകളടങ്ങിയ പരമ്പര 2-1ന്​ ജയിച്ച ഇംഗ്ലണ്ട്​​ ​െഎ.സി.സി വേൾഡ്​ ടെസ്​റ്റ്​ സിരീസിൽ നിർണായക മുന്നേറ്റവും നടത്തി. രണ്ടു​ ​ജയത്തോടെ 80 പോയൻറ്​ നേടിയ ഇംഗ്ലീഷുകാർ ടെസ്​റ്റ്​ ചാമ്പ്യൻഷിപ്​ പട്ടികയിൽ മൂന്നാം സ്ഥാനത്തേക്ക്​ കയറി. 226 പോയൻറുള്ള ഇംഗ്ലണ്ടിന്​ മുന്നിൽ രണ്ടാം സ്ഥാനക്കാരായി ആസ്​ട്രേലിയയും (296), ഒന്നാം സ്ഥാനത്ത്​ ഇന്ത്യയുമാണുള്ളത്​ (360).

ഇംഗ്ലണ്ട്​ ഫാസ്​റ്റ്​

കോവിഡ്​ ഇടവേളയും കഴിഞ്ഞ്​ ഇന്ത്യയും ആസ്​ട്രേലിയയും പാഡ്​കെട്ടും മു​േമ്പ ഇംഗ്ലീഷുകാർ മുന്നിലെത്തുമോ. ഡിസംബറിലാണ്​ ഇന്ത്യ-ആസ്​ട്രേലിയ ടെസ്​റ്റ്​ പരമ്പര ആരംഭിക്കുന്നത്​. അതിനു​ മു​േമ്പ ഇംഗ്ലീഷുകാർക്ക്​ അങ്കം ഇനിയുമുണ്ട്​. പാകിസ്​താനെതിരായ മൂന്ന്​ ടെസ്​റ്റുകളടങ്ങിയ പരമ്പരക്ക്​ ആഗസ്​റ്റ്​ അഞ്ചിന്​ തുടക്കമാവും. നിലവിൽ ഉജ്ജ്വല ഫോമിലുള്ള ഇംഗ്ലണ്ടിന്​ മൂന്നുകളിയും ജയിക്കാനായാൽ 120 പോയൻറ്​ പോക്കറ്റിലാക്കാം. അതോടെ ആസ്​ട്രേലിയയെ മറികടന്ന്​ രണ്ടാം സ്ഥാനത്തും എത്തിച്ചേരാം. നാല്​ പരമ്പര കളിച്ചാണ്​ ഇന്ത്യ ഒന്നാമതെത്തിയത്​. അതാവ​െട്ട മൂന്നു​ ജയവും ഒരു തോൽവിയും.
മൂന്നു​ പരമ്പര മാത്രം പൂർത്തിയാക്കിയ ഇംഗ്ലണ്ട്​ സ്​ട്രോങ്ങാണ്​. രണ്ടെണ്ണത്തിൽ ജയിച്ചപ്പോൾ ആസ്​ട്രേലിയക്കെതിരായ ആഷസ്​ സമനിലയിൽ പിരിഞ്ഞു. വിൻഡീസിന്​ പുറമെ, ദക്ഷിണാഫ്രിക്കയെയും അവർ എവേമാച്ചിൽ തോൽപിച്ചു. ആകെ 12 ടെസ്​റ്റിൽ ഏഴു ജയവും, നാലു തോൽവിയും.

ഒന്നു​ സമനിലയിൽ പിരിഞ്ഞു. ബാറ്റിലും ബൗളിലും മിന്നും ഫോമിലേക്കുയർന്ന ഇംഗ്ലണ്ടി​െന ഭയക്കണമെന്ന്​ ചുരുക്കം. ബെൻ സ്​റ്റോക്​സ്​, ജോ റൂട്ട്​, റോറി​ ബേൺസ്​, ഒലി പോപ്​, ജോസ്​ ബട്​ലർ ബാറ്റിങ്​ ലൈനപ്പും, സ്​റ്റുവർട്ട്​ ബ്രോഡ്​, ജയിംസ്​ ആൻഡേഴ്​സൻ, ക്രിസ്​ വോക്​സ്​, ജൊഫ്ര ആർച്ചർ എന്നിവരുടെ ബൗളിങ്​ ലൈനപ്പും ​മുനചെത്തിയൊതുക്കിയാണ്​ കോവിഡ്​ ലോക്​ഡൗണിന്​ ശേഷം ക്രീസിലെത്തുന്നത്​. ഇൗ മികവ്​, വിൻഡീസിനെതിരായ ടെസ്​റ്റ്​ പരമ്പരയിലും കണ്ടു. അങ്ങനെയെങ്കിൽ, ടെസ്​റ്റ്​ ചാമ്പ്യൻഷിപ്പ്​ കുതിപ്പിൽ ഒാസീസിനെ മറികടന്ന്​ മുന്നിലെത്തുമെന്നതിലും സംശയമില്ല.