1,995 രൂപക്ക് സ്മാർട്ട് വാച്ചുമായി ഫാസ്ട്രാക്ക്; ലിമിറ്റ്‌ലെസ് എഫ്‌.എസ് 1 അവതരിപ്പിച്ചു

പ്രമുഖ വാച്ച് ബ്രാൻഡായ ഫാസ്‌ട്രാക്ക് അവരുടെ പുതിയ സ്മാർട്ട് വാച്ചായ ലിമിറ്റ്‌ലെസ് എഫ്‌.എസ് 1 ഇന്ത്യയിൽ അവതരിപ്പിച്ചു. താങ്ങാനാവുന്ന വിലയിൽ മികച്ച ഫീച്ചറുകളോടെയാണ് എഫ്.എസ് 1-നെ ഇന്ത്യയിലെത്തിച്ചിരിക്കുന്നത്. ഫാസ്‌ട്രാക്കും ആമസോൺ ഫാഷനും തമ്മിലുള്ള പ്രത്യേക സഹകരണത്തിന്റെ ഭാഗമായി അവതരിപ്പിച്ച പുതിയ ലിമിറ്റ്‌ലെസ് ലൈനപ്പിന്റെ ഭാഗമാണ് വാച്ച്.

ഫാസ്‌ട്രാക്ക് ലിമിറ്റ്‌ലെസ് എഫ്‌.എസ് 1 ഫീച്ചറുകൾ

500 നിറ്റ്സ് ബ്രൈറ്റ്നസും 240×296 പിക്സൽ സ്‌ക്രീൻ റെസല്യൂഷനുമുള്ള ചതുരാകൃതിയിലുള്ള 1.95 ഇഞ്ച് ഹൊറൈസൺ കർവ്ഡ് ഡിസ്‌പ്ലേയാണ് ലിമിറ്റ്‌ലെസ്സ് എഫ്എസ്1 സ്മാർട്ട് വാച്ചിന് നൽകിയിരിക്കുന്നത്. 150-ലധികം വാച്ച് ഫെയ്‌സുകളുടെ പിന്തുണയുണ്ട്.

മികച്ച പ്രകടനത്തിനായി വാച്ചിൽ എ.ടി.എസ് ചിപ്‌സെറ്റ് നൽകിയിട്ടുണ്ട്. ഇൻബിൽറ്റ് മൈക്രോഫോണും സ്പീക്കറും വഴി ബ്ലൂടൂത്ത് കോളിങ് പ്രവർത്തനക്ഷമമാക്കുന്നതിനായി SingleSync സാങ്കേതികവിദ്യയും വാച്ചിലുണ്ട്. ബ്ലൂടൂത്ത് പതിപ്പ് 5.3-യുടെ പിന്തുണയുമുണ്ട്.

നടത്തം, സ്‌പ്രിന്റിങ് അടക്കമുള്ള ശാരീരിക പ്രവർത്തനങ്ങൾ തിരിച്ചറിയാനും അവ ട്രാക്ക് ചെയ്യാനും സ്മാർട്ട് വാച്ചിൽ നൂറിലധികം സ്‌പോർട്‌സ് മോഡുകളും മൾട്ടിസ്‌പോർട്ട് ഓട്ടോ റെക്കഗ്നിഷനും നൽകിയിട്ടുണ്ട്. ആരോഗ്യ ട്രാക്കിങ്ങിനായി, 24×7 ഹൃദയമിടിപ്പ് സെൻസർ, സ്ലീപ്പ് ട്രാക്കർ, സ്ട്രെസ് മാനേജർ, പിരീഡ് ട്രാക്കർ എന്നിവയുണ്ട്. ആരോഗ്യകരമായ ജീവിതശൈലി നിലനിർത്താൻ നിങ്ങൾക്ക് റിമൈൻഡറുകളും വാച്ചിലൂടെ ലഭിക്കും. ഫാസ്‌ട്രാക്ക് ലിമിറ്റ്‌ലെസ് എഫ്എസ്1-ന് 300എംഎഎച്ച് ബാറ്ററിയുണ്ട്, ഒറ്റത്തവണ ചാർജിൽ 10 ദിവസം വരെ പ്രവർത്തിക്കും.

കൂടാതെ, ഇത് സ്‌മാർട്ട് നോട്ടിഫിക്കേഷനുകൾ, ഫാസ്‌ട്രാക്ക് റിഫ്‌ലെക്‌സ് വേൾഡ് ആപ്പ്, ഇൻബിൽറ്റ് അലക്‌സ എന്നിവയും വാച്ചിനൊപ്പമുണ്ടാകും. പുതിയ ലിമിറ്റ്‌ലെസ് സീരീസിന്റെ ഭാഗമായി ഫാസ്‌ട്രാക്ക് മൊത്തം 5 സ്മാർട്ട് വാച്ചുകൾ അവതരിപ്പിക്കുമെന്ന് പ്രതീക്ഷിക്കുന്നു.

വില വിവരങ്ങൾ

പ്രത്യേക ലോഞ്ച് വിലയായി പുതിയ ഫാസ്‌ട്രാക്ക് ലിമിറ്റ്‌ലെസ് എഫ്‌എസ്1-ന് 1,995 രൂപക്ക് സ്വന്തമാക്കാം, ഏപ്രിൽ 11-ന് ആമസോൺ വഴി ലഭ്യമാകും. ഫയർ-ബോൾട്ട് റോക്കറ്റ്, ബോട്ട് വേവ് സ്‌റ്റൈൽ തുടങ്ങിയ സ്‌മാർട്ട് വാച്ചുകളാണ് ഫാസ്ട്രാക് ലിമിറ്റ്‌ലെസ് എഫ്‌എസ്1-ന്റെ എതിരാളികൾ.