ആളില്ലാ ചെറുവിമാനവുമായി അജ്​മാന്‍ നഗരസഭ

വിദൂര ദൃശ്യങ്ങള്‍ ശേഖരിക്കുന്നതിന് വ്യോമ സംവിധാനങ്ങള്‍ ഉപയോഗപ്പെടുത്തുകയാണ് ആധുനിക ലോകം. ഉയരങ്ങളില്‍ നിന്ന്​ കൃത്യതയോടെ ഭൂപ്രദേശങ്ങളുടെ ചിത്രങ്ങള്‍ പകര്‍ത്താന്‍ സാധിക്കുന്ന ആധുനിക സാങ്കേതിക വിദ്യ പരിചയപ്പെടുത്തുകയാണ് അജ്​മാന്‍. വൈമാനികനില്ലാത്ത ചെറുവിമാനം പശ്​ചിമേഷ്യയില്‍ ആദ്യമായി പുറത്തിറക്കിയ നേട്ടവും ​ അജ്​മാന്‍ നഗരസഭ ആസൂത്രണ വകുപ്പിന്​ സ്വന്തം.

നഗര വികസനം രൂപകൽപന ചെയ്യുന്നതിനും വിലയിരുത്തുന്നതിനും അടിസ്ഥാന വിവരങ്ങള്‍ ശേഖരിക്കുന്നതിനും പങ്കുവെക്കുന്നതിനും ഈ ചെറു വിമാനം സഹായിക്കും. മികച്ച നിലവാരം കാത്തു സൂക്ഷിക്കുന്നതിനായി ഉന്നത സാങ്കേതിക വിദ്യയുടെ സഹായത്താല്‍ ഈ ചെറു വിമാനത്തില്‍ സാധ്യമായ എല്ലാ സൗകര്യങ്ങളും ഒരുക്കിയിട്ടുണ്ട്. സാങ്കേതികവിദഗ്​ധരുടെ സഹായത്തോടെ അജ്​മാനിലെ പ്രധാന ഭൂപ്രദേശങ്ങളുടെ ചിത്രങ്ങള്‍ ഈ ആളില്ലാ വിമാനം ഉപയോഗിച്ചാണ് ഇപ്പോള്‍ ശേഖരിക്കുന്നത്.

ത്രിമാന ചിത്രങ്ങള്‍ എടുക്കാനാവുന്നതി​െനാപ്പം ഇൻഫ്രാറെഡ് രശ്​മികൾ വഴി 20കിലോമീറ്റര്‍ ദൂരപരിധിയുള്ള പാരിസ്ഥിതിക പ്രതിഭാസങ്ങളെക്കുറിച്ച്​ വിവരങ്ങള്‍ ശേഖരിക്കാന്‍ കഴിയുമെന്നതും ഈ വിമാനത്തിന്‍റെ പ്രത്യേകതയാണ്. ഉന്നത ഗുണനിലവാരമുള്ള രീതിയിലാണ് ഇതി​ന്‍റെ രൂപകൽപന. വിമാന ഭാഗങ്ങള്‍ അഴിച്ചു മാറ്റുന്നതിനും സംയോജിപ്പിക്കുന്നതിനും എളുപ്പം സാധിക്കും. ടേക്ക് ഓഫിലും ലാൻഡിംഗിനും ഉയര്‍ന്ന കൃത്യതയുള്ള വിമാനത്തിന്​ രണ്ടര മണിക്കൂര്‍ പ്രവര്‍ത്തിക്കാനുള്ള ബാറ്ററി സംവിധാനവുമുണ്ട്.