കുട്ടിയോട്​​​ ​'ഷോക്കടിപ്പിക്കുന്ന' ചലഞ്ച്​ ചെയ്യാനാവശ്യപ്പെട്ട്​​ ആമസോൺ അലക്സ; ഭീതി പങ്കുവെച്ച്​ അമ്മ

വിപണിയിലെ ഏറ്റവും ജനപ്രിയമായ വോയ്‌സ് അസിസ്റ്റന്റുകളിൽ ഒന്നാണ് ആമസോൺ അലക്‌സ. ചോദ്യങ്ങൾ ചോദിക്കാനും അലാറം വെക്കാനും പാട്ടുകൾ കേൾക്കാനുമടക്കം അലക്സയെ ഉപയോഗിക്കാം. എന്നാൽ, ഇപ്പോൾ പുറത്തുവന്ന ഞെട്ടിക്കുന്ന ഒരു സംഭവത്തോടെ, വെർച്വൽ അസിസ്റ്റന്‍റായ അലക്സയ്​ക്കെതിരെ തിരിഞ്ഞിരിക്കുകയാണ്​ നെറ്റിസൺസ്​.

10 വയസ്സുള്ള കുട്ടിയോട്​ അപകടകരമായ 'ടിക്​ടോക്​ ചലഞ്ച്​' ചെയ്യാൻ നിർദേശിച്ചതാണ്​ വിവാദത്തിന്​ കാരണമായത്​. അലക്‌സയോട് "ചെയ്യാൻ എന്തെങ്കിലും ചലഞ്ച്​ തരൂ" എന്ന്​ ആവശ്യപ്പെട്ടപ്പോഴാണ്​, ജീവൻ പോലും അപകടപ്പെടുത്തിയേക്കാവുന്ന ഒരു കാര്യം ചെയ്യാൻ വോയ്‌സ് അസിസ്റ്റന്റ് കുട്ടിയോട് പറഞ്ഞത്​. കുട്ടിയുടെ അമ്മ ക്രിസ്റ്റിൻ ലിവ്​ഡാലാണ്​ ഇത്​ ട്വിറ്ററിലൂടെ പുറംലോകത്തെ അറിയിച്ചത്​. അവർ അതിന്‍റെ സ്ക്രീൻഷോട്ടും പങ്കുവെച്ചിരുന്നു.

ആമസോണിന്‍റെ വോയ്‌സ് അസിസ്റ്റന്‍റ് ഉപകരണമായ​ 'എക്കോ' കുട്ടിയുടെ ചോദ്യത്തിന്​ മറുപടിയായി,​ വെബ്ബിൽ നിന്നുള്ള ഒരു വാർത്താ ലേഖനത്തിന്‍റെ ഭാഗമാണ്​ നൽകിയത്​​. ടിക്​ടോകിൽ വൈറലായ 'പെന്നി ചലഞ്ചി'ന്‍റെ (Penny Challenge) അപകടങ്ങൾ വിശദീകരിക്കുന്ന വാർത്തയിലെ ഒരു ഭാഗം മാത്രമാണ്​ പറഞ്ഞുകൊടുത്തത്​.

'പവർ ഔട്ട്​ലെറ്റിലേക്ക് പൂർണമായും കണക്ടാവാത്ത വിധം​ ഫോൺ ചാർജർ പ്ലഗ്​-ഇൻ ചെയ്യാനും ശേഷം ചാർജറിന്‍റെ കണക്ടിങ്​ പോയിന്‍റിൽ ഒരു ചില്ലറ പൈസകൊണ്ട്​ തൊട്ട്​ നോക്കാൻ' ആവശ്യപ്പെടുന്നതാണ്​ 'പെന്നി ചലഞ്ച്​'. ഇത്​ ടിക്​ടോക്കിൽ വലിയ രീതിയിൽ ഏറ്റെടുക്കപ്പെട്ട ചലഞ്ചുകളിൽ ഒന്നായിരുന്നു. വൈദ്യുതാഘാതമേൽക്കാനും ജീവൻ പോലും അപകടത്തിലാക്കാനും സാധ്യതയുള്ള ഈ മരണക്കളി 'സിംപിൾ വെല്ലുവിളി'യാണെന്ന്​ കാട്ടിയാണ്​ അലക്​സ​ ചെയ്തുനോക്കാൻ പറഞ്ഞത്​ എന്നതാണ്​ ഏറ്റവും​ വിചിത്രം.

സങ്കീർണമായ ചോദ്യങ്ങൾക്കുള്ള ഉത്തരങ്ങൾക്കായി അലക്സ​ സാധാരണയായി വെബ് സെർച്ച്​ ഫലങ്ങളെയാണ്​ ആശ്രയിക്കാറുള്ളത്​. എന്നാൽ, എളുപ്പമുള്ള മറ്റ്​ ചലഞ്ചുകൾക്ക്​ പകരം അലക്സ എന്തുകൊണ്ട്​​ അപകടം നിറഞ്ഞ കാര്യം കുട്ടിയോട്​ ചെയ്യാൻ ആവശ്യപ്പെട്ടു എന്നത്​ നിഗൂഢമാണ്​.

അതേസമയം, സംഭവത്തിൽ വിശദീകരണവുമായി ആമസോൺ രംഗത്തെത്തിയിട്ടുണ്ട്​. അലക്സയിൽ നിലനിൽക്കുന്ന ഒരു സോഫ്​റ്റ്​വെയർ പ്രശ്നം മൂലമാണ്​ അത്​ സംഭവിച്ചതെന്ന്​ ആമസോൺ പുറത്തുവിട്ട പ്രസ്താവനയിൽ പറഞ്ഞു. പ്രശ്നം പരിഹരിച്ചതായും അവർ ചൂണ്ടിക്കാട്ടി. ''ഉപഭോക്താക്കൾക്ക് കൃത്യവും പ്രസക്തവും സഹായകരവുമായ വിവരങ്ങൾ നൽകുന്നതിനാണ് അലക്‌സ രൂപകൽപ്പന ചെയ്‌തിരിക്കുന്നത്. ഈ പിശകിനെക്കുറിച്ച് ഞങ്ങൾ അറിഞ്ഞയുടനെ, അത് പരിഹരിക്കാൻ ദ്രുതഗതിയിലുള്ള നടപടി സ്വീകരിച്ചിട്ടുണ്ട്​. -അവർ കൂട്ടിച്ചേർത്തു.

കുട്ടിയുടെ മാതാവ്​ പങ്കുവെച്ച ട്വീറ്റ്​

OMFG My 10 year old just asked Alexa on our Echo for a challenge and this is what she said. pic.twitter.com/HgGgrLbdS8

— Kristin Livdahl (@klivdahl) December 26, 2021