ഫോണിനൊപ്പം ചാർജർ നൽകാത്തതിന് ആപ്പിളിന്​​ ഭീമൻതുക പിഴയീടാക്കി ഈ രാജ്യം

അമേരിക്കൻ സ്​മാർട്ട്​ഫോൺ നിർമാതാക്കളായ ആപ്പിൾ അവരുടെ ഏറ്റവും പുതിയ ഐഫോൺ 12 സീരീസിലൂടെ നടപ്പാക്കിയ വിവാദപരമായ തീരുമാനമായിരുന്നു 'ബോക്​സിൽ നിന്നും ചാർജിങ്​ അഡാപ്​റ്റർ ഒഴിവാക്കൽ'. പല കാരണങ്ങൾ ചൂണ്ടിക്കാട്ടിയാണ്​ അവർ ഫാൻസിനെയടക്കം പ്രകോപിതരാക്കിയ നീക്കത്തിന്​ മുതിർന്നത്​. അഡാപ്റ്റർ ഒഴിവാക്കുക വഴി പ്ലാസ്റ്റിക്​ ഉപയോഗം കുറച്ച്​ പ്രകൃതിയെ സംരക്ഷിക്കാൻ കഴിയുമെന്നും മുൻ ഐഫോൺ മോഡലുകൾ കൈയ്യിലുള്ളവർക്ക്​​ അതിന്‍റെ ചാർജർ ഉപയോഗിക്കാമെന്നുമൊക്കെ കമ്പനി ന്യായം പറഞ്ഞു. എന്നാൽ, പുതുതായി ഐഫോൺ വാങ്ങുന്നവർക്ക്​ ആയിരങ്ങൾ നൽകി ചാർജർ വേറെ വാങ്ങേണ്ടിവരുന്ന കാരണങ്ങൾ ചൂണ്ടിക്കാട്ടി പലരും ആപ്പിളിനെതിരെ തിരിഞ്ഞു. ആപ്പിളിന്‍റെ പാത പിൻതുടർന്ന്​ സാംസങ്ങും ഷവോമിയുമടക്കമുള്ള പ്രമുഖ കമ്പനികൾ ഫോൺ ബോക്​സുകളിൽ ചാർജർ ഒഴിവാക്കാൻ തുടങ്ങിയതും യൂസർമാരെ പ്രകോപിതരാക്കി.

എന്നാൽ, ചാർജറില്ലാതെ ഐഫോൺ 12 സീരീസ്​ ഫോണുകൾ വിറ്റതിന്​ ബ്രസീലിൽ ആപ്പിളിന്​ ഭീമൻതുക പിഴയീടാക്കിയിരിക്കുകയാണ്​. രണ്ട്​ മില്യൺ ഡോളറാണ് (15 കോടി രൂപയോളം)​ ലാറ്റിനമേരിക്കൻ രാജ്യം പിഴ വിധിച്ചത്​. ബ്രസീലിയൻ മാധ്യമങ്ങളുടെ റിപ്പോർട്ടുകൾ പ്രകാരം, സാവോ പോളോയിലെ ഉപഭോക്തൃ സംരക്ഷണ ഏജൻസിയായ പ്രോകോൺ-എസ്പി, ബോക്സിൽ ചാർജർ ഉൾപ്പെടുത്താത്തതിന് ഏകദേശം രണ്ട്​ മില്യൺ ഡോളർ പിഴയായി നൽകണമെന്ന് ആപ്പിളിനോട് നിർദ്ദേശിച്ചിരിക്കുകയാണ്​. ചാർജറില്ലാതെ ഐഫോൺ വിൽക്കുന്നത് ബ്രസീലിലെ ഉപഭോക്തൃ പ്രതിരോധ കോഡിന്‍റെ ലംഘനമാണെന്ന് ബ്രസീൽ ഏജൻസി ആപ്പിളിനെ അറിയിച്ചതിന്​ പിന്നാലെയാണ്​ പിഴയൊടുക്കാനുള്ള നിർദേശം വരുന്നത്​.

ബ്രസീലിയൻ ഉപഭോക്തൃ നിയമങ്ങളെയും സ്ഥാപനങ്ങളെയും ആപ്പിൾ ബഹുമാനിക്കുകയും മനസ്സിലാക്കുകയും ചെയ്യേണ്ടതുണ്ടെന്ന് പ്രോകോൺ-എസ്പിയുടെ എക്സിക്യൂട്ടീവ് ഡയറക്ടർ ഫെർണാണ്ടോ കാപ്പസ് മുന്നറിയിപ്പ്​ നൽകി. ചാർജർ ബോക്​സിനുള്ളിലോ, അല്ലെങ്കിൽ, പ്രത്യേക ബോക്​സിലാക്കിയോ ഉപയോക്​താക്കൾക്ക്​ നൽകണമെന്നും അദ്ദേഹം നിർദേശിച്ചു. (ഫ്രാൻസിൽ കഴിഞ്ഞ വർഷം ഇയർഫോണുകൾ സമാനരീതിയിൽ ആപ്പിളിന്​ നൽകേണ്ടതായി വന്നിരുന്നു).

കഴിഞ്ഞ ഡിസംബറിൽ ഏജൻസി, ഇതുമായി ബന്ധപ്പെട്ട്​ ആപ്പിളിന്​ മുന്നറിയിപ്പ്​ നൽകിയിട്ടുണ്ട്​. അതിന്​ മറുപടിയായി ആപ്പിൾ പറഞ്ഞത്​, കൂടുതൽ ഉപയോക്​താക്കളുടെ കൈയ്യിലും ചാർജറുകൾ ഉണ്ടെന്നാണ്​. അതുകൊണ്ട്​ ഫോണിൽ മറ്റൊന്ന്​ ഉൾപ്പെടുത്തേണ്ടതില്ലെന്നും അവർ വിശദീകരിച്ചു. എന്നാൽ, ഏറ്റവും കൂടുതൽ വിലയീടാക്കി ഐഫോൺ വിൽക്കപ്പെടുന്ന രാജ്യമാണ്​ ബ്രസീൽ, അതുകൊണ്ട്​ തന്നെ ചാർജർ കൂടെ നൽകാത്തത്​ നീതികേടാണെന്നാണ് യൂസർമാരുടേയും അഭിപ്രായം.

ചാർജർ നൽകാത്ത വിഷയം കൂടാതെ, വാട്ടർ റെസിസ്റ്റന്‍റ്​ എന്ന്​ അവകാശപ്പെടുന്ന ആപ്പിളിന്‍റെ ഡിവൈസുകൾ, വാറന്‍റി പിരീഡിൽ പോലും സൗജന്യമായി റിപ്പയർ ചെയ്യാൻ ആപ്പിൾ വിസമ്മതിക്കുന്നതായി ബ്രസീലിയൻ ഏജൻസി ചൂണ്ടിക്കാട്ടുന്നുണ്ട്​. അതിനോടൊപ്പം, പഴയ ഐഫോൺ മോഡലുകൾ കമ്പനി അപ്​ഡേറ്റുകൾ നൽകി നശിപ്പിക്കുന്നതായുള്ള ആരോപണങ്ങളും അവർ ഉയർത്തിക്കാട്ടി. അതേസമയം, ഏജൻസിയുടെ ആരോപണങ്ങളിൽ പ്രതികരണമറിയിക്കാൻ ആപ്പിളിന്​ അവസരം നൽകിയിട്ടുണ്ട്​.