ഐ ഫോണ്‍ 13 സീരീസ് വിപണിയിൽ; മൂന്ന്​ മോഡലുകൾ ആപ്പിൾ ഓൺലൈൻ സ്​റ്റോറിൽ നിന്ന്​ ഔട്ടാകും

ന്യൂഡൽഹി: ആപ്പിൾ പ്രേമികള്‍ ഏറെ കാത്തിരുന്ന ഐ ഫോണ്‍ 13 സീരീസ് പുറത്തിറങ്ങിയിരിക്കുകയാണ്​. ഇതോടെ തങ്ങളുടെ ഓൺലൈൻ സ്​റ്റോറിലും മാറ്റങ്ങൾ വരുത്തിയിരിക്കുകയാണ്​ ആപ്പിൾ.

ഐ ഫോൺ 13, ഐ ഫോൺ 13 പ്രോ സീരിസ്​ എന്നിവ പ്രധാന ആകർഷണങ്ങളായി മാറുന്നതോടെ ചില മോഡലുകൾ​ ആപ്പിൾ ഓൺലൈൻ സ്​റ്റോറിൽ നിന്ന്​ ഔട്ടാവുകയാണ്​. ഐ ഫോൺ 12 പ്രോ, 12 പ്രോ മാക്​സ്​, ഐ ഫോൺ എക്​സ്​.ആർ എന്നീ മോഡലുകളെയാണ്​ ഓൺലൈൻ സ്​റ്റോറിൽ നിന്ന്​ പിൻവലിച്ചത്​. ഇന്ത്യയിലെ ആപ്പിൾ ഔദ്യോഗിക ഓൺലൈൻ സ്​റ്റോറിൽ നിന്ന്​ ഈ മൂന്ന്​ മോഡലുകൾ ഇനി വാങ്ങാൻ സാധിക്കില്ല.

ഐഫോൺ 13 സീരീസിന്​ പുറമേ ഐ ഫോൺ 12, ഐ ഫോൺ 12 മിനി, ഐ ഫേൺ 11, ഐ ഫോൺ എസ്​.ഇ എന്നീ മോഡലുകൾ മാത്രമാകും ഓൺലൈൻ സ്​റ്റോറിൽ ലഭ്യമാകുക. ഐഫേൺ 11, 12 സീരീസുകളുടെ വില കഴിഞ്ഞ ദിവസം ആപ്പിൾ കുറച്ചിരുന്നു. 65,900 രൂപ മുതൽ ഐഫോൺ 12 ലഭ്യമാകും. ​49,900 ആണ്​ ഐ ഫോൺ 11ന്‍റെ പ്രാരംഭ വില.

5ജി കരുത്തുമായാണ് പുതിയ ഐ ഫോണ്‍ 13 സീരീസ് പുറത്തിറങ്ങിയിരിക്കുന്നത്. സെറാമിക് ഷീല്‍ഡ്, ഫ്‌ലാറ്റ് എഡ്ജ് ഡിസൈനില്‍ പിങ്ക്, നീല, മിഡ്‌നൈറ്റ്, സ്റ്റാര്‍ലൈറ്റ്, പ്രൊഡക്ട് റെഡ് എന്നി നിറങ്ങളിലാണ് ഐ ഫോണ്‍ 13 സീരീസ് വിപണിയില്‍ എത്തുക. ട്വിന്‍ റിയര്‍ ക്യാമറയോടൊപ്പം മികച്ച വാട്ടര്‍ റെസിസ്റ്റ് പ്രത്യേകതയും കമ്പനി വാഗ്ദാനം ചെയ്യുന്നു.

ഐ ഫോണ്‍ 13 മിനി, ഐ ഫോണ്‍ 13 പ്രോ, ഐ ഫോണ്‍ 13 പ്രോ മാക്‌സ് എന്നിവയാണ് മോഡലുകള്‍. മിനിക്ക് 69,900 രൂപയും പ്രോക്ക് 1,19,900 രൂപയും മാക്‌സിന് 1,29,900 രൂപയുമായിരിക്കും വില. ഇന്ത്യയടക്കം 30 മേഖലകളിലെ കസ്റ്റമേഴ്​സിന്​ ബുധനാഴ്ച അഞ്ച്​ മണി മുതൽ പ്രീഓർഡർ ചെയ്യാനുള്ള സൗകര്യം കമ്പനി ഒരുക്കിയിട്ടുണ്ട്​.