ചാറ്റ്ജിപിടി മുതൽ കോൾ റെക്കോഡിങ് വരെ; അടിമുടി മാറാൻ ആപ്പിൾ

ആപ്പിൾ വേൾവൈഡ് ഡെവലപ്പർ കോൺഫറൻസിൽ വലിയ മാറ്റങ്ങളാണ് ആപ്പിൾ പ്രഖ്യാപിച്ചത്. ആർട്ടിഫിഷ്യൽ ഇന്റലിജൻസിൽ തുടങ്ങി കമ്പനിയുടെ വോയ്സ് അസിസ്റ്റ് സിസ്റ്റമായ സിരിയിൽ വരെ ആപ്പിൾ മാറ്റത്തിന് ഒരുങ്ങുകയാണ്. ഉപകരണങ്ങ​ളെ അടിമുടി പരിഷ്‍കരിക്കാൻ തന്നെയാണ് ആപ്പിളിന്റെ ഒരുക്കം. കഴിഞ്ഞ ദിവസം നടന്ന ഡെപലപ്പർ കോൺഫറൻസിൽ ആപ്പിൾ പ്രഖ്യാപിച്ച പ്രധാന മാറ്റങ്ങൾ ഇവയാണ്.

1.ചാറ്റ്ജിപിടി: ഐ.ഒ.എസ് 18, ഐപാഡ് ഒ.എസ് 18, മാക് ഒ.എസ് സ്വികിയ എന്നിവയിലെല്ലാം ആപ്പിൾ ചാറ്റ്ജിപിടി ഇണക്കി ചേർക്കുകയാണ്. ഇതിലൂടെ സിരിക്ക് ചാറ്റ്ജിപിടിയുടെ സഹായത്തോടെ കൂടുതൽ മെച്ചപ്പെട്ട പ്രതികരണങ്ങൾ നൽകാനാവും.

2. സിരി: സിരിയിലെ ഭാഷ ഉൾപ്പടെ ആപ്പിൾ മെച്ചപ്പെടുത്തിയിരിക്കുകയാണ്. ഇനി നമ്മൾ പറയുന്ന കാര്യങ്ങൾ സിരിക്ക് കൂടുതൽ കൃത്യതയോടെ മനസിലാക്കാനാവും. ഇതിന് അനുസരിച്ചുള്ള മറുപടികളും സിരിയിൽ നിന്നും പ്രതീക്ഷിക്കാം.

3.വിഷൻഒ.എസ് 2: വിഷൻപ്രോയുടെ രണ്ടാം ഓപ്പറേറ്റിങ് സിസ്റ്റം ആപ്പിൾ കഴിഞ്ഞ ദിവസം പ്രഖ്യാപിച്ചിട്ടുണ്ട്. ഡിസ്‍പ്ലേയിലെ മാറ്റങ്ങൾക്കൊപ്പം ഫോട്ടോ ആപ്പ് ഫീച്ചറുകളും വിഷൻഒ.എസ് 2 എത്തുമ്പോൾ മെച്ചപ്പെടുമെന്നാണ് ആപ്പിളിന്റെ അവകാശവാദം.

4.ഐ.ഒ.എസ് 18: ഐഫോൺ ഒ.എസിന്റെ പുതിയ പതിപ്പിൽ ഹോം സ്ക്രീൻ കസ്റ്റമൈസേഷനാണ് പ്രധാനമാറ്റം. ഐഫോൺ ഹോം സ്ക്രീനിലെ ആപുകൾ സ്ക്രീനിന്റെ ഏത് ഭാഗത്തേക്കും ഇഷ്ടാനുസരണം നീക്കിവെക്കാനാവും. വാൾപേപ്പറുകൾക്ക് അനുയോജ്യമായി ആപ് ​ഐക്കണുകളുടെ നിറവും മാറ്റാനാവും. തേഡ് പാർട്ടി ആപുകളുടെ ബട്ടണുകൾ കൺട്രോൾ സെന്ററിൽ ഉൾപ്പെടുത്താൻ കഴിയുന്നതാണ് മറ്റൊരു ഫീച്ചർ. ആപുകൾ ഫേസ്ഐഡിയോ പാസ്​വേഡോ ഉപയോഗിച്ച് ലോക്ക് ചെയ്യാൻ സാധിക്കുന്ന സംവിധാനവും ഐ.ഒ.എസ് 18ലുണ്ടാവും.

5.വാച്ച് ഒ.എസ് 11: പരിഷ്‍കരിച്ച വാച്ച് ഒ.എസിൽ ഉപഭോക്താക്കളുടെ ആവശ്യത്തിനനുസരിച്ച് ഓട്ടോമാറ്റികായി വിഡ്ജെറ്റുകൾ ചേർക്കാനുള്ള സംവിധാനമാണ് പ്രധാനമാറ്റം. കൂടുതൽ ഹെൽത്ത് ഫീച്ചറുകൾ ഒ.എസിനൊപ്പം ചേർത്തുവെന്നതാണ് മറ്റൊരു പ്രത്യേകത.

6. കോൾ റെക്കോഡിങ്: ആപ്പിൾ ഉപഭോക്താക്കൾ വർഷങ്ങളായി കാത്തിരിക്കുന്ന കോൾ റെക്കോഡിങ് ഫീച്ചർ ഇക്കുറി ഐ.ഒ.എസ് 18ലുണ്ടാവുമെന്നാണ് ആപ്പിൾ അറിയിച്ചിരിക്കുന്നത്. കോളുകൾ റെക്കോഡ് ചെയ്യാനും പിന്നീട് സംഭാഷണം ടെക്സ്റ്റ് രൂപത്തിലേക്ക് മാറ്റാനും സാധിക്കുന്ന രീതിയിലായിരിക്കും ആപ്പിളിന്റെ കോൾ റെക്കോഡിങ്. ഗൂഗിളി​ന് സമാനമായി കോൾ റെക്കോഡിങ്ങിന് മുമ്പ് മറുതലക്കലുള്ള ആളിനോട് കോൾ റെക്കോഡ് ചെയ്യുകയാണെന്ന് ആപ്പിളിലും പറയും.