നിങ്ങൾക്ക്​ ഈ ആപ്പുകളിൽ അക്കൗണ്ടുണ്ടോ? എങ്കിൽ പണിവരുന്നുണ്ടോന്ന്​ സൂക്ഷിക്കണം

ലോകത്ത്​ ഏറ്റവും കൂടുതൽ ഉപയോക്​താക്കൾ ഉള്ള പ്രമുഖ സോഷ്യൽ മീഡിയ ആപ്പുകളിലും ഓൺലൈൻ പ​ർച്ചേസിങ്ങ്​ ആപ്പുകളിലും വൻ വിവരച്ചോർച്ചകളാണ്​ കഴിഞ്ഞ ആറ്​ മാസത്തിനുള്ളിലുണ്ടായത്​. സൈബർ ആക്രമണത്തിൽ ആപ്പുകൾ പലതും പതറുന്ന കാഴ്​ചയായിരുന്നു ടെക്​ലോകത്ത്​. ആപ്പുകളെ വിശ്വസിച്ച്​ ഉപയോഗിച്ച കോടിക്കണക്കിന്​ ഉപയോക്​താക്കളുടെ ബാങ്കിങ്ങ്​, മൊബൈൽ, ലൊക്കേഷൻ അടക്കമുള്ള സ്വകാര്യവിവരങ്ങളാണ്​ ചോർന്നത്​. ഹാക്കർമാർ ചോർത്തിയെടുത്ത വിവരങ്ങൾ ലക്ഷങ്ങൾ വിലയിട്ട്​ ഡാർക്​വെബിൽ വിൽപ്പനക്കുവെച്ചു.അങ്ങനെ വിവരങ്ങൾ ചോർന്ന ആപ്പുകളിൽ ചിലത്​ പരിചയപ്പെടാം

ഫേസ്​ബുക്കിൽ നിന്ന് ചോർന്നത്​​ 53.3 കോടി പേരുടെ വ്യക്തിഗത വിവരങ്ങൾ

ഏറ്റവും വലിയ വിവരചോർച്ച നടന്നത്​ ​പ്രമുഖ സോഷ്യൽമീഡിയ ആപ്പായ ​േഫസ്​ബുക്കിൽ നിന്നാണ്​. 106 രാജ്യങ്ങളിൽ നിന്നുള്ള ​53.3 കോടി കോടി ഫേസ്‌ബുക്ക് ഉപഭോക്താക്കളുടെ വ്യക്​തിപരമായ വിവരങ്ങളാണ്​ ചോർന്നത്​. ഇ മെയിൽ ഐ.ഡി,പൂർണമായ പേര്​, മൊബൈൽ നമ്പരുകൾ, ജനനത്തിയതി, ലൊക്കേഷൻ ഹിസ്റ്ററി എന്നിവയാണ്​ ചോർന്നത്​. ഇന്ത്യയിൽ നിന്നുള്ള 61 ലക്ഷം പേരുടെ വിവരങ്ങളും ചോർന്നതിൽ പെടുന്നു.​

ബിഗ്​ബാസ്​ക്കറ്റിൽ നിന്ന്​ ചോർന്നത്​ രണ്ടു കോടി യൂസർമാരുടെ വിവരങ്ങൾ

ഇന്ത്യയില്‍ ലക്ഷക്കണക്കിന് ഉപ​യോക്​താക്കളുള്ള ഓണ്‍ലൈന്‍ ഗ്രോസറി സ്ഥാപനമായ ബിഗ്ബാസ്‌കറ്റിലുണ്ടായ സുരക്ഷാ വീഴ്ചയിൽ രണ്ടു കോടിയോളം പേരുടെ വിവരങ്ങളാണ്​ ചോർന്നത്. ഈ വിവരങ്ങൾ ചോർത്തിയ ഹാക്കർമാർ 30 ലക്ഷം രൂപക്ക്​​ വിറ്റുവെന്നാണ്​ യ​ു.എസ്​ ആസ്ഥാനമായ സൈബർ ഇന്‍റലിജൻസ്​ സ്ഥാപനം പുറത്ത്​ വിട്ട റിപ്പോർട്ടിൽ പറയുന്നത്​. പേരുകള്‍, ഇ മെയില്‍ ഐഡി, ഒ.ടി.പി, പാസ്​വേർഡ്​, മൊബൈൽ നമ്പര്‍, വീടിന്‍റെ വിലാസം, ജനന തീയതി, സ്ഥലം, ലോഗിന്‍ ഐപി അഡ്രസ് എന്നിവയാണ്​ ചോർന്നത്​.

മൊബിക്വിക്കിൽ നിന്നും വിവരങ്ങൾ നഷ്​ടമായി

മൊബൈല്‍ പേയ്​മെന്‍റ്​ ആപ്പായ മൊബിക്വിക്കില്‍ നിന്നും 110 ദശലക്ഷം പേരുടെ വിവരങ്ങളാണ്​ ചോർന്നത്​. ബജാജ് ഫിനാന്‍സ്, സെക്യൂയോ ക്യാപിറ്റല്‍ തുടങ്ങിയവയുടെ പിന്തുണയോടെ പ്രവര്‍ത്തിക്കുന്ന ആപ്പിലെ ഉപയോക്താക്കളുടെ ക്രെഡിറ്റ് കാര്‍ഡ് വിവരങ്ങള്‍ അടക്കമാണ്​ ചോർന്നത്​.

ലിങ്കിഡ്​ ഇന്നിനും കിട്ടി മുട്ടൻ പണി

പ്രൊഫഷണൽ നെറ്റ്​വർക്കിങ്ങ്​ സൈറ്റായ ലിങ്കിഡ്​ ഇന്നിൽ നിന്നാണ്​ മറ്റൊരു ഗുരുതരമായ വിവരച്ചോർച്ചയുണ്ടായത്​. 50 കോടി പേരുടെ ഡേറ്റയാണ്​ ചോര്‍ന്നത്​. പേരുകള്‍, ഇ-മെയില്‍, ഫോണ്‍ നമ്പര്‍, ജോലിസ്ഥലം തുടങ്ങിയ വിവരങ്ങളാണ്​ ചോർന്നത്​.

ഡൊമിനോസിൽ നിന്ന്​ പത്തുലക്ഷം ക്രെഡിറ്റ്​ കാർഡ്​ വിവരങ്ങൾ

ഏറ്റവും അവസാനമായി വിവരചോർച്ച നടന്നത്​ പിസ വിൽപനക്കാരായ ഡൊമിനോസിൽ നിന്നാണ്. ഡൊമിനോസിൽ നിന്ന്​ ക്രെഡിറ്റ്​ കാർഡ്​ വഴിയും അല്ലാതെയും പർച്ചേസ്​ നടത്തിയവരുടെ വിവരങ്ങളാണ്​ ചോർന്നത്​.10 ലക്ഷം ഉപയോക്താക്കളുടെ ക്രഡിറ്റ് കാർഡ് വിവരങ്ങൾ​ ചോർന്നു​. ഇതിന്​ പുറമെ പേര്​, ഫോൺ നമ്പർ, ക്രഡിറ്റ് കാർഡ് ഉൾപ്പടെയുള്ള പണമിടപാട് വിവരങ്ങൾ എന്നിവയാണ് ചോർന്നത്.

ജസ്​പേ, അപ്​സ്​റ്റോക്​സ്​, ബൈയുകോയിൻ തുടങ്ങിയ നിരവധി ആപ്പുകളും സൈബർ ആക്രമണത്തിനിരയാവുകയും വിവരങ്ങൾ ചോരുകയും ചെയ്​തിട്ടുണ്ട്​. ആപ്പുകളിൽ സ്വകാര്യവിവരങ്ങൾ നൽകുന്നതിൽ ഒരു കരുതലുണ്ടാകുന്നത്​ നല്ലതാണെന്നാണ്​ ഇത്തരം സംഭവങ്ങൾ സൂചിപ്പിക്കുന്നത്​.