'കുറഞ്ഞ വേഗത 512 കെ.ബി.പി.എസ്​ പോര'; മികച്ച ഇൻറർനെറ്റ്​ കണക്​ടിവിറ്റി പൗരൻമാരുടെ അവകാശം -ട്രായ്​

ന്യൂഡൽഹി: ബ്രോഡ്ബാൻഡ് കണക്ഷനുകളുടെ കുറഞ്ഞ ഡൗൺലോഡ് വേഗത നിലവിലുള്ള 512 കെബിപിഎസ്​ പരിധിയിൽ നിന്ന് രണ്ട്​ എംബിപിഎസ്​ ആയി നിശ്ചയിക്കാൻ ശുപാർശ ചെയ്ത്​ ടെലികോം റെഗുലേറ്ററി അതോറിറ്റി ഓഫ് ഇന്ത്യ (ട്രായ്). "ചില അടിസ്ഥാന ആപ്ലിക്കേഷനുകൾ പോലും പ്രവർത്തിപ്പിക്കുന്നതിന് 512Kbps അപര്യാപ്തമാണെന്നും," ട്രായ് പറഞ്ഞു.

കണക്ഷനുകൾ രണ്ട്​ എംബിപിഎസ്​ മുതൽ 50 എംബിപിഎസ്​ വരെയുള്ളത്​ ബേസിക്​, 50 മുതൽ 300 എംബിപിഎസ് വരെയുള്ളത്​ ഫാസ്റ്റ്​, 300 എംബിപിഎസിൽ കൂടുതലുള്ളത്​ സൂപ്പർ-ഫാസ്റ്റ് എന്നിങ്ങനെ മൂന്ന് വിഭാഗങ്ങളായി തരംതിരിക്കണമെന്നും ട്രായ് സർക്കാരിനോട്​​ അഭിപ്രായപ്പെട്ടു.

രാജ്യത്തെ ബ്രോഡ്ബാൻഡ് കണക്ടിവിറ്റി മെച്ചപ്പെടുത്തുന്നതിന്​ വേണ്ടി ട്രായ് 298 പേജുകളുള്ള വിശദമായ റിപ്പോർട്ട്​ തയ്യാറാക്കിയിട്ടുണ്ട്​. മികച്ച ഇൻറർനെറ്റ്​ കണക്​ടിവിറ്റി എല്ലാ പൗരൻമാരുടെയും അടിയന്തര ആവശ്യമാണെന്ന്​ ട്രായ്​ റിപ്പോർട്ടിൽ പറയുന്നു. അതിവേഗ ഇൻ്റർനെറ്റ് സേവനം നൽകുന്നതിനായി സേവനദാതാക്കളെ പ്രോത്സാഹിപ്പിക്കാൻ ലൈസൻസ് ഫീസ് ഇളവുകൾ പോലുള്ളവ നൽകണമെന്നും ട്രായ്​യുടെ ശുപാർശ ചെ​യ്യുന്നുണ്ട്​.

അതോടൊപ്പം പൈലറ്റ് പദ്ധതിയെന്ന നിലയിൽ ഗ്രാമീണ മേഖളകളിൽ ഫിക്സഡ് ലൈൻ ബ്രോഡ്ബാൻഡ് സേവനങ്ങൾ നൽകുന്നതിന് സർക്കാർ സഹായം നൽകണമെന്നും ട്രായ് നിർദ്ദേശിച്ചിട്ടുണ്ട്​. ഒരു ഉപഭോക്താവിന് പ്രതിമാസം പരമാവധി 200 രൂപ എന്ന നിലയിൽ സഹായം നൽകണമെന്നാണ്​ പറയുന്നത്​.