'ആൻഡ്രോയ്​ഡിനോടും ഗുഡ്​ബൈ'; സ്വന്തം ഓപറേറ്റിങ് സിസ്റ്റമായ ഹാർമണി OS 2.0 ബീറ്റ റിലീസ്​ ചെയ്​ത്​ ഹ്വാവേ

അതെ..! ചൈനീസ്​ ടെക്​ ഭീമനായ ഹ്വാവേ, ഗൂഗ്​ളുമായുള്ള യുദ്ധത്തിലെ ഏറ്റവും മൂർച്ചയേറിയ ആയുധം പുറത്തെടുത്തിരിക്കുകയാണ്​. ആൻഡ്രോയ്​ഡ്​ ഒാപറേറ്റിങ്​ സിസ്റ്റം ഉപയോഗിക്കാനുള്ള ലൈസൻസും​ ഗൂഗ്​ൾ റദ്ദാക്കിയതോടെ സ്വന്തം ഒ.എസ്​ പ്രഖ്യാപിച്ച ഹ്വാവേ അതി​െൻറ ഏറ്റവും പുതിയ പതിപ്പ്​ ബീറ്റ വേർഷനായി അവതരിപ്പിച്ചിരിക്കുകയാണ്​. ഹാർമണി ഒ.എസ്​ 2.0 ഡെവലപ്പർ ബീറ്റയായി മൊബൈൽ ഡിവൈസുകൾക്കായാണ്​ റിലീസ്​ ചെയ്​തിരിക്കുന്നത്​.

പുതിയ ഒാപറേറ്റിങ്​ സിസ്റ്റം എത്തുന്നതോടെ ഗൂഗ്​ൾ മൊബൈൽ സർവീസസിൽ (ജി.എം.എസ്​) നിന്നും പുതിയ ഹ്വാവേ മൊബൈൽ സർവീസസ്​ (എച്ച്​.എം.എസ്​) എകോസിസ്റ്റത്തിലേക്ക്​ യൂസർമാർ മാറും. ഹ്വാവേയുടെ മറ്റ്​ സ്​മാർട്ട്​ ഗാഡ്​ജറ്റുകളെ കൂടി പരിഗണിച്ചുകൊണ്ടാണ്​ ഹാർമണി ഒ.എസി​െൻറ 2.0 വേർഷൻ കമ്പനി ഇറക്കിയിരിക്കുന്നത്​​.

#HarmonyOS 2.0 Beta is available for developers now! Dr. Wang Chenglu introduced the new #HarmonyOS 2.0, with support for over 15000 APIs and integrated development tools like DevEco Studio. pic.twitter.com/aSM21ifhMD

— Huawei Mobile (@HuaweiMobile) December 16, 2020

15,000-ത്തിലധികം എ.പി.ഐകളുടെ പിന്തുണയോടെയാണ് ഹാർമണി ഒഎസ് 2.0 എത്തുന്നത്​.​. ഒരേസമയം, സ്മാർട്ട്‌ഫോണുകൾ, സ്മാർട്ട് ഡിസ്‌പ്ലേകൾ, വാച്ചുകൾ എന്നിവയിലും മറ്റ്​ ഹ്വാവേ ഉപകരണങ്ങളിലും പ്രവർത്തിക്കാൻ കഴിയുന്ന ഒരൊറ്റ അപ്ലിക്കേഷൻ നിർമ്മിക്കാൻ ഇത്​ ഡെവലപ്പർമാരെ പ്രാപ്‌തമാക്കുമെന്നും കമ്പനി അവകാശപ്പെടുന്നു..

ഹാർമണി ഒ.എസ്​ 2.0 ബീറ്റ ഇൻസ്റ്റാൾ ചെയ്യാൻ സാധിക്കുന്ന ഹ്വാവേ സ്​മാർട്ട്​ഫോണുകൾ

• Huawei P40 (ANA-AN00)
• Huawei P40 Pro (ELS-AN00)
• Huawei Mate 30 (TAS-AL00 & TAS-AN00)
• Huawei Mate 30 Pro (LIO-AL00 & LIO-AN00)
• Huawei MatePad Pro (MRX-AL19, MRX-W09 & MRX-AN19)

നിലവിൽ അഞ്ച്​ മോഡലുകളിൽ മാത്രമാണ്​ ഒ.എസി​െൻറ ബീറ്റ വേർഷൻ ലഭിക്കുകയെങ്കിലും വൈകാതെ 100 മില്യൺ ഡിവൈസുകളിലേക്ക്​ അത്​ വ്യാപിപ്പിക്കാനും ഹ്വവേ ശ്രമിക്കുന്നുണ്ട്​.