അപ്രതീക്ഷിതമായി ഡാറ്റ ഉപയോഗം കൂടുന്നോ, നിങ്ങളുടെ ഫോൺ ഹാക്ക്​ ചെയ്യുന്നുണ്ടാകാം

കോട്ടയം: അപ്രതീക്ഷിതമായി ഡാറ്റ ഉപയോഗം കൂടുന്നുണ്ടോ? എങ്കിൽ നിങ്ങളുടെ ഫോൺ ഹാക്ക്​ ചെയ്യപ്പെടുന്നുണ്ടാകാം. സൈബർ വിദഗ്​ധരും പൊലീസ്​ ഉൾപ്പെടെ സുരക്ഷാവിഭാഗങ്ങളും നൽകുന്ന മുന്നറിയിപ്പാണിത്​. ഇന്ത്യയിൽ ​ഭൂരിപക്ഷം പേരുടേയും ഫോൺ ഹാക്ക്​ ചെയ്യാനുള്ള സാധ്യത കൂടുതലെന്നാണ്​ വിദ്​ഗധരുടെ അഭിപ്രായം. രാജ്യത്തും, പ്രത്യേകിച്ച്​ കേരളത്തിലും കൂടുതലായി ഉപയോഗിക്കുന്നത്​ ആൻഡ്രോയ്​ഡ്​ ഫോണുകളാണ്​. അവ എളുപ്പം ഹാക്ക്​ ചെയ്യാൻ സാധിക്കുമെന്നും പൂർണമായും സുരക്ഷിതമല്ലെന്നുമാണ്​ ഇവർ ചൂണ്ടിക്കാട്ടുന്നത്​. ഫോൺ ഹാക്ക്​ ചെയ്യുന്നതിലൂടെ അതിലെ വിവരങ്ങൾ ചോർത്തി സാമ്പത്തിക തട്ടിപ്പുൾപ്പെടെ നടക്കുന്ന സാഹചര്യത്തിലാണ്​ ഈ മുന്നറിയിപ്പ്​.

ഫോണിലെ ഡാറ്റ ഉപയോഗത്തിന്‍റെ തോത്​ അപ്രതീക്ഷിതമായി വർധിക്കുകയാണെങ്കിൽ അത്​ ഫോൺ ഹാക്ക്​ ചെയ്യുന്നുണ്ടെന്ന സൂചന നൽകുന്നതാണ്​. ഹാക്ക്​ ചെയ്യപ്പെടുന്ന ഫോണിൽ പ്രവർത്തിക്കുന്ന മാൽവെയറാണ്​ ഡാറ്റ ഉപഭോഗത്തെ വർധിപ്പിക്കുന്നത്​. അതിനാൽ ഫോണിലെ ഡാറ്റ ഉപയോഗം ഇടക്കിടെ ശ്രദ്ധിക്കുന്നത്​ ഉചിതമാകുമെന്നും വിദഗ്​ധർ പറയുന്നു. സാധാരണ ഗതിയിൽ പാസ്​വേർഡ്​ ഉപയോഗിച്ച്​ ഫോൺ ലോക്ക്​ ചെയ്യുകയാണ്​ മിക്കയാളുകളും ചെയ്യുക. പാസ്​വേർഡ്​ പ്രവർത്തനം തെറ്റായി കാണുന്നുണ്ടെങ്കിലും അത്​ ഫോൺ ഹാക്കായതിന്‍റെ സൂചനയാകാം. നമുക്ക്​ അറിയാത്ത ആപ്പുകൾ ഫോണിൽ കണ്ടാൽ അതും ഫോൺ ഹാക്ക്​ ചെയ്തതിന്‍റെ ലക്ഷണമാകാമെന്നാണ്​ വിദഗ്​ധർ പറയുന്നത്​.

നമ്മുടെ അറിവിലില്ലാത്ത കോളുകൾ ഫോൺ ഹിസ്റ്ററിയിലുണ്ടെങ്കിൽ അതും ഇതിന്‍റെ സൂചനയാണ്​. അതിനാൽ ഇക്കാര്യങ്ങൾ ഇടക്കിടെ പരിശോധിക്കുന്നത്​ നന്നാകുമെന്നാണ്​ വിദഗ്​ധാഭിപ്രായം.

ലളിതമായ പാസ്​വേർഡുകൾ ഉപയോഗിക്കുന്ന രീതി മാറ്റുന്നതാണ്​ ഹാക്കിങ്ങിൽ നിന്നും ഫോണുകളെ രക്ഷിക്കാനുള്ള ​പ്രധാന മാർഗം. ഇടക്കിടെ പാസ്​വേർഡുകൾ മാറ്റുന്നതും നല്ലതായിരിക്കും. വൈഫൈ, ബ്ലൂടൂത്ത്​ എന്നിവ ഉപയോഗത്തിന്​ ശേഷം ഓഫ്​ ചെയ്യാൻ മറക്കരുത്​. പൊതുസ്ഥലങ്ങളിലെ വൈഫൈ ഉപയോഗത്തിലും ശ്രദ്ധിക്കുന്നത്​ നന്നായിരിക്കും. വിശ്വാസയോഗ്യമല്ലാത്ത ആപ്പുകൾ, സൈറ്റുകൾ, ലിങ്കുകളിൽ കയറുന്നതിലും ശ്രദ്ധിക്കണം. അപരിചിതമായ ലിങ്കുകളിൽ നിങ്ങളുടെ വ്യക്​തിപരമായ വിവരങ്ങൾ കൈമാറാതിരുന്നാലും ഫോൺ ഹാക്ക്​ ചെയ്യുന്നതിൽ നിന്നും ഒരു പരിധി വരെ രക്ഷപെടാമെന്ന മുന്നറിയിപ്പാണ്​ സൈബർ വിദഗ്​ധർ നൽകുന്നത്​.

സാമൂഹിക മാധ്യമങ്ങളിലെ ‘ബ്ലൂ ടിക്’ ശരിയാക്കലിനോട്​ പ്രതികരിക്കരു​തേ

‘ഫേസ്ബുക്ക്​, ഇൻസ്റ്റഗ്രാം തുടങ്ങിയ സാമൂഹിക മാധ്യമങ്ങളിലെ പ്രൊഫൈൽ വെരിഫൈ ചെയ്ത് ബ്ലൂ ടിക് വെരിഫിക്കേഷൻ സൗജന്യമായി ചെയ്തുനൽകുന്നെന്ന രീതിയിൽ നിങ്ങൾക്ക് സന്ദേശം ലഭിച്ചിട്ടുണ്ടോ? എങ്കിൽ പ്രതികരിക്കേണ്ട. സംഗതി തട്ടിപ്പാണെന്നാണ് കേരളാ പൊലീസ്​ നൽകുന്ന മുന്നറിയിപ്പ്​. ഇത്തരം തട്ടിപ്പിൽ കുടുങ്ങുന്നവരുടെയും എണ്ണം വർധിച്ച സാഹചര്യത്തിലാണ്​ ഈ മുന്നറിയിപ്പ്​.

വ്യാജലിങ്കുകൾ ഉൾപ്പെടുത്തിയ സന്ദേശം മെസ്സേജ് ആയോ നോട്ടിഫിക്കേഷനായോ ആവും വരിക. ഇത്തരം വ്യാജ വെബ്സൈറ്റുകൾ ഉപഭോക്​താവിന്‍റെ വിവരങ്ങൾ, ആക്റ്റീവ് സെഷൻ എന്നിവ ഹാക്ക് ചെയ്യുന്ന രീതിയിൽ നിർമിച്ചവയായിരിക്കും. ഇത്തരം സന്ദേശങ്ങളോട്​ പ്രതികരിച്ചാൽ നിങ്ങളുടെ സോഷ്യൽ മീഡിയ പ്രൊഫൈൽ ഹാക്ക് ചെയ്യപ്പെടാനുള്ള സാധ്യത കൂടുതലാണ്​. അതിനാൽ സോഷ്യൽ മീഡിയ ഉപഭോക്താക്കൾ ഇത്തരം വ്യാജ സന്ദേശങ്ങളോട്​ പ്രതികരിക്കാതിരിക്കാൻ പ്രത്യേകം ശ്രദ്ധിക്കണമെന്ന മുന്നറിയിപ്പാണ്​ പൊലീസ് നൽകുന്നത്​.