കാമറയിൽ മാജിക്കൊളിപ്പിച്ച​ ഐഫോൺ എത്തി​; 13 സീരിസിലെ ഫീച്ചറുകളറിയാം

ടെക്​ ലോകത്തിന്‍റെ കാത്തിരിപ്പിന്​ വിരാമമിട്ട്​ പുതിയ ഉൽപന്നങ്ങൾ പുറത്തിറക്കി ആപ്പിൾ. ഐപാഡ്​, ഐഫോൺ, ആപ്പിൾ വാച്ച്​ എന്നിവയാണ്​ വിർച്വൽ ഇവന്‍റിൽ ആപ്പിൾ പുറത്തിറക്കിയത്​.

ഐപാഡ്​

ഐപാഡ്​, ഐപാഡ്​ മിനി എന്നിവയുടെ അപ്​ഡേറ്റ്​ വേർഷനാണ്​ ആപ്പിൾ ഇന്ന്​ പുറത്തിറക്കിയത്​. മുൻ മോഡലുമായി താരതമ്യം ചെയ്യു​േമ്പാൾ ഐപാഡിന്​ കരുത്ത്​ കൂടിയിട്ടുണ്ട്​. എ 13 ബയോനിക്​ ചിപ്​സെറ്റിന്‍റെ കരുത്തിലാണ്​ ഐപാഡ്​ എത്തുന്നത്​. 12 മെഗാപിക്​സൽ കാമറക്കൊപ്പം സെന്‍റർ സ്​റ്റേജ്​ മുൻ കാമറയുമുണ്ട്​. ഐപാഡ്​ ഒ.എസ്​ 15 ആണ്​ ഓപ്പറേറ്റിങ്​ സിസ്റ്റം. 8.3 ഇഞ്ച്​ സൈസിൽ ടച്ച്​ ഐഡിയോടെയാണ്​ ഐപാഡ്​ മിനി എത്തുന്നത്​. മിനിയുടെ സി.പി.യു പെർഫോമൻസ്​ 40 ശതമാനം വർധിപ്പിച്ചിട്ടുണ്ട്​. യു.എസ്​.ബി സി പോർട്ടും 5ജിയും മിനിക്കൊപ്പം എത്തി.

ആപ്പിൾ വാച്ച്​

ഡിസ്​പ്ലേയുടെ വലിപ്പവും ബ്രൈറ്റ്​നെസും കൂടിയതാണ്​ ആപ്പിൾ വാച്ചിന്‍റെ സവിശേഷത. ഡിസ്​പ്ലേ വലിപ്പം കൂടിയപ്പോൾ സ്​ക്രീനിൽ ഫുൾ കീബോർഡ്​ കാണാം. ആപ്പിൾ വാച്ച്​ സീരിസ്​ 7നിലേക്ക്​ എത്തിയപ്പോൾ ചാർജിങ്​ വേഗവും കൂടി. 45 മിനിറ്റിനുള്ളിൽ വാച്ചിന്‍റെ 80 ശതമാനവും ചാർജ്​ ആവും.

ഐഫോൺ

കാമറയിൽ മാജിക്ക്​ ഒളിപ്പിച്ചാണ്​ ഇക്കുറി ഐഫോണുമായി ആപ്പിളെത്തുന്നത്​. ഡിസ്​പ്ലേയിലെ നോച്ചിന്‍റെ വലിപ്പം കുറച്ചതാണ്​ ഐഫോൺ 13​ന്‍റെ പ്രധാന സവിശേഷതകളിലൊന്ന്​. ഐഫോൺ 13, 13 മിനി എന്നിവക്ക്​ എക്​സ്​.ഡി.ആർ ഡിസ്​പ്ലേയാണ്​ ആപ്പിൾ നൽകിയിരിക്കുന്നത്​. 6.1 ഇഞ്ച്​, 5.4 ഇഞ്ച്​ എന്നിവയാണ്​ ഡിസ്​പ്ലേ വലിപ്പം. എ 15 ബയോനിക്​ ചിപ്​സെറ്റ്​ ഫോണുകൾക്ക്​ കരുത്ത്​ പകരുന്നു. ഇരു മോഡലുകളിലും ലോ ലൈറ്റ്​ കാമറ പെർഫോമൻസ്​ വർധിപ്പിച്ചിട്ടുണ്ട്​. വിഡിയോയിൽ പോർട്രെയിറ്റ്​ മോഡിൽ ദൃശ്യങ്ങൾ ചിത്രീകരിക്കാൻ കഴിയുന്ന സിനിമാറ്റിക്​ മോഡാണ്​ മറ്റൊരു സവിശേഷത. ഡോൾബി വിഷൻ എച്ച്​.ഡി.ആർ കണ്ടന്‍റ്​ ചിത്രീകരിക്കാൻ സിനിമാറ്റിക്​ മോഡിലൂടെ സാധിക്കും. മുൻ മോഡലുകളുമായി താരതമ്യം ചെയ്യു​േമ്പാൾ ഐഫോൺ 13, 13 മിനി ഫോണുകളിൽ ആപ്പിൾ കരുത്തും ബാറ്ററി ലൈഫും വർധിപ്പിച്ചിട്ടുണ്ട്​.

120 ജിഗാഹെഡ്​സ്​ റിഫ്രഷ്​ റേറ്റുമായാണ്​ ഐഫോൺ 13 പ്രോ സീരിസ്​ വിപണിയിലേക്ക്​ എത്തുന്നത്​. ഐഫോൺ 13 പ്രോയിലും കാമറയിൽ തന്നെയാണ്​ ആപ്പിൾ വലിയ മാറ്റങ്ങൾ വരുത്തിയിരിക്കുന്നത്​. ടെലിഫോ​ട്ടോ കാമറ, അൾട്രാ വൈഡ്​, വൈഡ്​ ആംഗിൾ കാമറകളിൽ അപ്​ഗ്രേഡ്​ ആപ്പിൾ വരുത്തിയിട്ടുണ്ട്​. ഇതിനൊപ്പം സിനിമാറ്റിക്​ മോഡ്​, മാക്രോഫോ​ട്ടോഗ്രഫി എന്നിവ സവിശേഷതയാണ്​. ഒരു വസ്​തുവിനെ കൂടുതൽ സൂം ചെയ്​ത്​ ഫോ​ട്ടോ​യെടുക്കാൻ സഹായിക്കുന്ന ഫീച്ചറാണ്​ മാക്രോ ഫോ​ട്ടോഗ്രഫി. മൂന്ന്​ കാമറക്കൊപ്പവും നൈറ്റ്​ മോഡ്​ നൽകിയിട്ടുണ്ട്​.

ഡിസ്​പ്ലേ സൈസിൽ ആപ്പിൾ മാറ്റമൊന്നും വരുത്തിയിട്ടില്ല. 6.1 ഇഞ്ച്​, 6.7 ഇഞ്ച്​ വലിപ്പത്തിൽ ഐഫോൺ 13 പ്രോ, പ്രോ മാക്​സ്​ ഫോണുകളെത്തും. എന്നാൽ പുതുതായി 1 ടി.ബി സ്​റ്റോറേജ്​ സംവിധാനം കൂട്ടിച്ചേർത്തിട്ടുണ്ട്​.

വില

• ഐഫോൺ 13-79,990, ഐഫോൺ 3 മിനി -69,990
• ഐഫോൺ 13 പ്രോ-1,19,900, ഐഫോൺ 13 പ്രോ മാക്​സ്​ -1,29,900
  
• ഐപാഡ്​ മിനി-46,900,ഐപാഡ്​-30,900