ഗൂഗ്​ളിനോട്​ പരസ്യവരുമാനം പങ്കുവെക്കാൻ ആവശ്യപ്പെട്ട്​​ വാർത്താ ചാനലുകളും

പ്രാദേശിക മാധ്യമങ്ങളുടെ ഉള്ളടക്കത്തിന്​​​ പണം നൽകുന്നതുമായി ബന്ധപ്പെട്ട്​ ആസ്​ട്രേലിയയിൽ അമേരിക്കൻ ടെക്​ഭീമൻ ഗൂഗ്​ൾ നേരിട്ടത്​ വലിയ പ്രതിസന്ധിയായിരുന്നു. അതിന്​ പിന്നാലെ, ഇന്ത്യൻ ന്യൂസ്​ പേപ്പർ സൊസൈറ്റിയും പരസ്യവരുമാനം പത്രങ്ങളുമായി അർഹമായ രീതിയിൽ പങ്കുവെക്കണമെന്ന ആവശ്യവുമായി എത്തുകയുണ്ടായി. എന്നാൽ, ഏറ്റവും ഒടുവിൽ ഗൂഗ്​ളിനോട്​ അതേ ആവശ്യമുന്നയിച്ച്​ എത്തിയത്​ ടെലിവിഷൻ ചാനലുകളുടെ കൂട്ടായ്​മയായ ന്യൂസ്​ ബ്രോഡ്​കാസ്​റ്റേഴ്​സ്​ അസോസിയേഷനാണ് (എൻ.ബി.ഐ)​. അതുമായി ബന്ധപ്പെട്ട്​ എൻ.ബി.ഐ ഗൂഗ്​ളിന്​ കത്തയക്കുകയും ചെയ്​തിട്ടുണ്ട്​.

വാർത്തകൾക്കായി ഗൂഗിൾ, യുട്യൂബ്, ഫെയ്‌സ്ബുക്ക് പോലുള്ള ടെക്‌ പ്ലാറ്റ്​ഫോമുകളെ ആളുകൾ കൂടുതലായും ആശ്രയിക്കുന്ന ഈ കാലത്ത് പരമ്പരാഗത മാധ്യമ, വാർത്താസ്ഥാപനങ്ങൾ ബുദ്ധിമുട്ടിലാണെന്ന്​ എൻ.ബി.എ. അധ്യക്ഷൻ രജത് ശർമ ഗൂഗിളിനയച്ച കത്തിൽ പറഞ്ഞു. പരസ്യവരുമാനത്തിന്‍റെ വലിയൊരു പങ്ക് ഡിജിറ്റൽ ടെക്‌നോളജി ഭീമൻമാർക്കാണ് ലഭിക്കുന്നത്. ടി.വി.ചാനലുകൾക്ക് ഈ വകയിലുണ്ടാവുന്ന നഷ്ടം നികത്തപ്പെടേണ്ടതാണെന്നും കത്തിൽ പറയുന്നു. വാർത്താശേഖരണം, സംപ്രേഷണം അതുമായി ബന്ധപ്പെട്ട പ്രവർത്തനങ്ങൾക്ക്​ വൻ തുകയാണ്​ വാർത്താചാനലുകൾ ചെലവഴിക്കുന്നത്​. വാർത്തകളുടെ ഉടമകൾക്ക് അർഹമായ പ്രതിഫലം നൽകാതെയാണ് ടെക്‌നോളജി ഭീമന്മാരുടെ പ്ലാറ്റ്‌ഫോമുകളിലൂടെ അത് വിതരണം ചെയ്യുന്നത്. ഇതിൽ ഗൂഗിൾ ആണ് ഇടനിലക്കാരായി പ്രധാന പങ്കുവഹിക്കുന്നതെന്ന് എൻ.ബി.ഐ.