'59,350 ഉള്ളടക്കങ്ങൾ നീക്കം ചെയ്​തു'; ഇന്ത്യയുടെ ഐടി നിയമത്തിന്​ വഴങ്ങി, ആദ്യ റിപ്പോർട്ടുമായി ഗൂഗ്​ൾ

പുതിയ ഐടി നിയമങ്ങളുമായി ബന്ധപ്പെട്ട് ഗൂഗ്​ളിനെതിരെ ഇന്ത്യ നിലപാട് ശക്തമാക്കവേ, കമ്പനിയുടെ സുതാര്യത റിപ്പോർട്ട് പുറത്തുവിട്ടിരിക്കുകയാണ്​ അമേരിക്കൻ ടെക്​ ഭീമൻ. അഞ്ച്​ ദശലക്ഷത്തിലധികം ഉപയോക്താക്കളുള്ള പ്രധാനപ്പെട്ട ഡിജിറ്റൽ പ്ലാറ്റ്ഫോമുകൾ പുതിയ ഐടി നിയമങ്ങൾ അനുസരിച്ച്, ഓരോ മാസവും റിപ്പോർട്ടുകൾ പ്രസിദ്ധീകരിക്കേണ്ടതുണ്ട്.

അത്തരത്തിൽ ഗൂഗ്​ൾ പ്രസിദ്ധീകരിച്ച സുതാര്യത റിപ്പോർട്ടിൽ ഏപ്രിൽ മാസത്തിൽ 59,350 ഉള്ളടക്കങ്ങൾ പ്ലാറ്റ്​ഫോമിൽ നിന്ന്​ നീക്കം ചെയ്​തതായി വ്യക്​തമാക്കുന്നു. ആകെ 27,762 പരാതികളാണ്​ ലഭിച്ചത്​. അതിൽ 96 ശതമാനവും പകർപ്പവകാശ ലംഘനവുമായി ബന്ധപ്പെട്ടുള്ളളതാണ്​. ട്രേഡ്​ മാർക്ക്​, മാനനഷ്ടം, കൃത്രിമത്വം, വഞ്ചന, മറ്റ് നിയമപരമായ അഭ്യർത്ഥനകൾ എന്നിവയുമായി ബന്ധപ്പെട്ടതാണ് ശേഷിക്കുന്ന പരാതികൾ.

പുതിയ ഇൻഫർമേഷൻ ടെക്നോളജി (ഐടി) ചട്ടങ്ങൾക്ക്​ അനുസൃതമായി സുതാര്യത റിപ്പോർട്ട് പ്രസിദ്ധീകരിച്ച ആദ്യത്തെ ആഗോള ടെക് കമ്പനിയാണ്​ ഗൂഗിൾ. ''ലോകത്തി​െൻറ പല ഭാഗങ്ങളിൽ നിന്നായി വരുന്ന വിവിധ തരത്തിലുള്ള അഭ്യർഥനകൾ മാനിച്ചുകൊണ്ട്​ സുതാര്യത നൽകുന്നതിലും അതിൽ നടപടി സ്വീകരിക്കുന്നതിലും ഞങ്ങൾക്ക്​ ഒരു നീണ്ട ചരിത്രം തന്നെയുണ്ട്​. ഈ അഭ്യർത്ഥനകളെല്ലാം ട്രാക്കുചെയ്ത് 2010 മുതൽ നിലവിലുള്ള ഞങ്ങളുടെ സുതാര്യത റിപ്പോർട്ടിൽ ഉൾപ്പെടുത്തിയിട്ടുണ്ട്, " -ഗൂഗ്​ൾ വക്താവ് പ്രസ്താവനയിൽ പറഞ്ഞു.

''പുതിയ ഐടി നിയമങ്ങൾക്കനുസൃതമായി ഇതാദ്യമായാണ് ഞങ്ങൾ പ്രതിമാസ സുതാര്യത റിപ്പോർട്ട് പ്രസിദ്ധീകരിക്കുന്നത്, ഇന്ത്യയെക്കുറിച്ചുള്ള ഞങ്ങളുടെ റിപ്പോർട്ടിങ്​ പ്രക്രിയകൾ പരിഷ്കരിക്കുമ്പോൾ കൂടുതൽ വിശദാംശങ്ങൾ പ്രസിദ്ധീകരിക്കുന്നതായിരിക്കുമെന്നും വക്താവ് അറിയിച്ചു. ഡാറ്റാ പ്രോസസ്സിങ്ങിനും സാധുവാക്കുന്നതിനും മതിയായ സമയം അനുവദിക്കേണ്ടതിനാൽ റിപ്പോർട്ടിങ്ങിന് രണ്ട് മാസത്തെ കാലതാമസം ഉണ്ടാകുമെന്നും കമ്പനി വ്യക്തമാക്കി.