ഇന്ത്യയിൽ ഏറ്റവുംകൂടുതൽ പേർ ഉപയോഗിക്കുന്ന സമൂഹമാധ്യമം ഇതാണ്​, കണക്കുകൾ​ പുറത്തുവിട്ട്​ കേന്ദ്രം

ഇന്ത്യയിലെ സമൂഹമാധ്യമ അകൗണ്ടുകളുടെ കണക്കുകൾ പുറത്തുവിട്ട്​ കേന്ദ്ര സർക്കാർ. വാട്​സ്​ ആപ്പ്​, യൂട്യൂബ്​, ഫേസ്​ബുക്ക്​, ഇൻസ്റ്റഗ്രാം, ട്വിറ്റർ അകൗണ്ടുകളുടെ എണ്ണമാണ്​ പുറത്തുവന്നിരിക്കുന്നത്​. ഏറ്റവും കൂടുതൽപേർ ഉപയോഗിക്കുന്ന സമൂഹമാധ്യമം വാട്​സ്​ആപ്പാണ്​, 53 കോടി. 44.8കോടിയുമായി യൂട്യൂബും 41 കോടിയുമായി ഫേസ്​ബുക്കും രണ്ടും മൂന്നും സ്​ഥാനങ്ങളിലുണ്ട്​. നാലാം സ്​ഥാനത്തുള്ള ഇൻസ്റ്റഗ്രാമിന്​ 21 കോടി അകൗണ്ടുകളാണുള്ളത്​.

ഏറ്റവും കുറവ്​ ഉപഭോക്​താക്കളുള്ള ട്വിറ്ററിന്​ വെറും 1.75 കോടി അകൗണ്ടുകൾ മാത്രമാണുള്ളത്​. രാജ്യത്ത്​ സോഷ്യൽ മീഡിയ, ഒടിടി പ്ലാറ്റ്‌ഫോമുകൾക്കുള്ള പുതിയ മാർഗ്ഗനിർദ്ദേശങ്ങൾ പ്രഖ്യാപിക്കുന്നതിന്‍റെ ഭാഗമായാണ്​ കേന്ദ്രം വ്യാഴാഴ്ച കണക്കുകൾ പുറത്തുവിട്ടത്​. ഐടി മന്ത്രി രവിശങ്കർ പ്രസാദും വാർത്താവിതരണ പ്രക്ഷേപണ മന്ത്രി പ്രകാശ് ജാവദേക്കറും സംയുക്തമായിട്ടാണ് ഇക്കാര്യം അറിയിച്ചത്. വ്യാജ വാർത്തകൾ, വിദ്വേഷ ഭാഷണം, സിനിമയിലെ ഗ്രാഫിക് ഇമേജറി മുതലായവയെ നേരിടുക എന്ന ലക്ഷ്യത്തോടെയാണ്​ പ്രധാനപ്പെട്ട സോഷ്യൽ മീഡിയകൾക്കും ഒടിടി പ്ലാറ്റ്ഫോമുകൾക്കും നിയ​ന്ത്രണങ്ങൾ ഏർപ്പെടുത്തുന്നത്​. സോഷ്യൽ മീഡിയ പ്ലാറ്റ്‌ഫോമുകൾ വ്യാപകമായി ദുരുപയോഗം ചെയ്യുന്നതിനെക്കുറിച്ചും വ്യാജ വാർത്തകൾ പ്രചരിപ്പിക്കുന്നതിനെക്കുറിച്ചും ആശങ്കകൾ ഉയർന്നതായി പുതിയ മാർഗ്ഗനിർദ്ദേശങ്ങൾ പ്രഖ്യാപിക്കുന്നതിനിടെ മന്ത്രി രവിശങ്കർ പ്രസാദ് പറഞ്ഞു.

പുതിയ സ്​ഥിതിവിവര കണക്കുകൾ പുറത്തുവന്നതോടെ​ രസകരമായൊരു വിവരവും പ്രചരിക്കുന്നുണ്ട്​​. ട്വിറ്ററിലെ പ്രധാനമന്ത്രി നരേന്ദ്ര മോദിയുടെ ഫോളോവേഴ്​സിന്‍റെ എണ്ണമാണ്​ സംശയങ്ങൾക്ക്​ ഇടയാക്കുന്നത്​. 1.75 കോടി ഇന്ത്യക്കാർ മാത്രമാണ് ട്വിറ്റർ ഉപയോഗിക്കുന്നതെങ്കിൽ മോദിക്ക് 6.6 കോടി ഫോളോവേഴ്‌സ് എങ്ങിനെ വന്നു എന്നതാണ്​ സംശയത്തിന്​ ഇടയാക്കുന്നത്​. ഇതോടെ ട്വിറ്ററാറ്റികൾ ആശയക്കുഴപ്പത്തിലായി. മോദിയുടെ 4.85 കോടിവരുന്ന ഫോളോവേഴ്‌സ് ആരാണെന്നാണ്​ അവർ ചോദിക്കുന്നു. ധാരാളം ആളുകൾ ഈ വിഷയത്തിൽ സംശയം ഉന്നയിച്ച്​ രംഗത്ത്​ വന്നിട്ടുണ്ട്. മോദിയെ പിന്തുടരുന്നവർ വിദേശികളാണോ വ്യാജ അക്കൗണ്ടുകളാണോ എന്നാണ്​ അവർ ചോദിക്കുന്നത്​. സർക്കാർ നൽകിയ വിവരം തെറ്റാകാൻ സാധ്യതയുണ്ടെന്നും ചൂണ്ടിക്കാട്ടുന്നവരുണ്ട്​. മറ്റൊരു സാധ്യത ബോട്ടുകളുടെ സാന്നിധ്യമാണ്​.

But @narendramodi himself has 66 million (6.6 crore) followers?

So, almost 4.85 crore people following the PM on Twitter are fake or foreigners? https://t.co/G9ylfdS31r

— Ankit Lal 🏹 (@AnkitLal) February 25, 2021

സോഷ്യൽ മീഡിയ ബോട്ട്​

സോഷ്യൽ മീഡിയയിൽ ഏർപ്പെടാൻ ഉപയോഗിക്കുന്ന ഓട്ടോമേറ്റഡ് പ്രോഗ്രാമുകളാണ് സോഷ്യൽ മീഡിയ ബോട്ടുകൾ. ഈ ബോട്ടുകൾ ഭാഗികമായോ പൂർണ്ണമായോ സ്വയംഭരണാധികാരത്തോടെയാണ് പ്രവർത്തിക്കുന്നത്. അവ പലപ്പോഴും മനുഷ്യ ഉപയോക്താക്കളെ അനുകരിക്കാൻ രൂപകൽപ്പന ചെയ്തിട്ടുള്ളതാണ്. കൂടുതലും നെഗറ്റീവായ കാര്യങ്ങൾക്കാണ്​ ബോട്ടുകൾ ഉപയോഗിക്കുന്നത്​. സോഷ്യൽ മീഡിയയിലെ എല്ലാ അകൗണ്ടുകളുടെയും ഗണ്യമായ ശതമാനം ഇത്തരം ക്ഷുദ്ര ബോട്ടുകളാണെന്ന് ചില കണക്കുകൾ സൂചിപ്പിക്കുന്നു. കൃത്രിമമായി ഫോളോവേഴ്​സിനെ ഉണ്ടാക്കുക ലൈക്​​ വർധിപ്പിക്കുക തുടങ്ങിയ ലളിതകാര്യങ്ങൾക്കാണ്​ ബോട്ടുകൾ ഉപയോഗിക്കുക.