കുട്ടികളുടെ വിവരങ്ങൾ ഉപയോഗിച്ചു; ടിക്​ ടോകിനെതിരെ ശതകോടികളുടെ കേസ്​

ലണ്ടൻ: ഇന്ത്യയിൽ നിരോധനമുള്ള ജനപ്രിയ ഹ്രസ്വവിഡിയോ ആപ്പായ ടിക്​​ ടോകിനെതിരെ ശതകോടികൾ നഷ്​ടപരിഹാരം ആവശ്യപ്പെട്ട്​ കേസ്​. യു.കെയും യൂറോപ്യൻ യൂനിയനും ചേർന്നാണ്​ ചൈനീസ്​ ആപ്പിനെതിരെ കോടതി കയറിയത്​. കുട്ടികളുടെ വ്യക്​തിഗത വിവരങ്ങൾ കമ്പനി ദുരുപയോഗം ചെയ്​തുവെന്നാണ്​ കേസ്​. ഫോൺ നമ്പറുകൾ, വിഡിയോകൾ, ബയോമെട്രിക്​ വിവരങ്ങൾ, സ്​ഥലം തുടങ്ങിയവയാണ്​ കുട്ടികളോ അവരുടെ രക്ഷിതാക്കളോ അറിയാതെയും അറിയിക്കാതെയും ഉപയോഗിച്ചത്​.

ലോകത്തുടനീളം 80 ​കോടി പേർ ടിക്​ ടോക്​ ഉപയോഗിക്കുന്നുണ്ട്​. ആപ്പ്​ കൊണ്ട്​ കഴിഞ്ഞ വർഷം മാതൃകമ്പനിയായ ചൈനയിലെ ബൈറ്റ്​ ഡാൻസ്​ ഉണ്ടാക്കിയത്​ ശതകോടിക്കണക്കിന്​ ഡോളറാണ്​, ഏറെയും പരസ്യവരുമാനമാണ്​.

2018നു ശേഷം ടിക്​ടോക്കിലെത്തിയ കുട്ടികളുടെ വിവരങ്ങളണ്​ കമ്പനി ഉപയോഗിച്ചത്​. 'സമൂഹ മാധ്യമമെന്ന പേരിൽ വിവര ശേഖരണ സേവനമാണ്​ കമ്പനി നടത്തിയതെന്ന്'​ ഇംഗ്ലണ്ടിലെ മുൻ ചൈൽഡ്​ കമീഷണർ ആനി ലോങ്​ഫീൽഡ്​ കുറ്റപ്പെടുത്തി. വിവരം മോഷണം പോയ ഓരോ കുട്ടിക്കും കമ്പനി ആയിരക്കണക്കിന്​ പൗണ്ട്​ നഷ്​ടപരിഹാരം നൽകേണ്ടിവരുമെന്നും അവർ പറഞ്ഞു.

എന്നാൽ, അനാവശ്യ വിവാദമാണിതെന്നും കേസിനെതിരെ കോടതിയിൽ പൊരുതുമെന്നും ടിക്​ടോക്​ പറഞ്ഞു.

2019ലും ഇതേ ചൈനീസ്​ കമ്പനിക്കെതിരെ 57 ലക്ഷം ഡോളർ ഫെഡറൽ ട്രേഡ്​ കമീഷൻ പിഴ ചുമത്തിയിരുന്നു. ദക്ഷിണ കൊറിയയിലും നടപടി നേരിട്ടതാണ്​.

ടിക്​ടോകി​െൻറ ഭാഗമായ 'മ്യൂസിക്കലി'യുമായി ചുറ്റിപ്പറ്റിയാണ്​ കേസ്​.