യൂട്യൂബും ഫേസ്​ബുക്കും പോലെ ഇനി ട്വിറ്ററിൽ നിന്നും വരുമാനമുണ്ടാക്കാം; സൂപ്പർ ഫോളോ ഫീച്ചർ അവതരിപ്പിച്ചു

വരുമാനം നേടാൻ കഴിയുന്നത്​ കാരണം നെറ്റിസൺസ്​ ഏറ്റവും കൂടുതൽ അവരുടെ സമയം ചിലവിടുന്ന രണ്ട് സമൂഹ മാധ്യമ പ്ലാറ്റ്​ഫോമുകളാണ്​​ യൂട്യൂബും ഫേസ്ബുക്കും. എന്നാൽ, അതേ നിരയിലേക്ക്​ വരാനുള്ള പുറപ്പാടിലാണ്​ അമേരിക്കൻ മൈക്രോ ബ്ലോഗിങ്​ സൈറ്റായ ട്വിറ്ററും. ഇനി മുതൽ ട്വിറ്ററില്‍ നിന്നും വരുമാനം നേടാൻ കഴിയും.

സൂപ്പര്‍ ഫോളോസ് എന്ന പുതിയ ഫീച്ചറിലൂടെയാണ് ട്വിറ്റർ പുതിയ പണം സമ്പാദിക്കൽ സേവനം സ്വന്തം പ്ലാറ്റ്​ഫോമിൽ അവതരിപ്പിച്ചത്. സബ്‌സ്‌ക്രൈബർമാർക്ക് മാത്രമായുള്ള ഉള്ളടക്കം പങ്കുവെക്കുന്നതിലൂടെ പ്രതിമാസം വരുമാനം നേടാന്‍ കഴിയുമെന്നതാണ്​ സൂപ്പർ ഫോളോസി​െൻറ പ്രത്യേകത. കണ്ടന്‍റ് ക്രിയേറ്റര്‍മാര്‍ക്കും ഇൻഫ്ലുവൻസർമാർക്കും 2.99 ഡോളര്‍, 4.99 ഡോളര്‍, 9.99 ഡോളര്‍ എന്നിങ്ങനെ പ്രതിമാസ സബ്‌സ്‌ക്രിപ്ഷന്‍ നിരക്ക് നിശ്ചയിക്കാം.

എക്സ്ക്ലൂസീവ് കണ്ടന്‍റുകളായിരിക്കും സൂപ്പര്‍ ഫോളോവേഴ്സിനായി പങ്കുവെയ്ക്കുക. ഈ ഓപ്ഷന്‍ ലഭ്യമായ ട്വിറ്റര്‍ അക്കൗണ്ടുകള്‍ ഫോളോ ചെയ്യുന്നവര്‍ക്ക് സൂപ്പർ ഫോളോ എന്ന ബട്ടൺ കാണാന്‍ സാധിക്കും. സൂപ്പര്‍ ഫോളോ ചെയ്യാനുള്ള തുക എത്രയെന്നും എങ്ങനെയാണ് പണം അടയ്ക്കേണ്ടതെന്നും അവിടെ വിവരം ലഭിക്കും. നിലവില്‍ കാനഡയിലും അമേരിക്കയിലുമുള്ള ​െഎ.ഒ.എസ്​ യൂസർമാർക്ക്​ മാത്രമാണ്​ ഈ സൗകര്യം ലഭ്യമായിട്ടുള്ളത്​. വൈകാതെ എല്ലാ രാജ്യങ്ങളിലേക്കും സൂപ്പർ ഫോളോ സേവനം ലഭ്യമാക്കുമെന്ന് ട്വിറ്റര്‍ വ്യക്​തമാക്കി.

introducing Super Follows—a paid monthly subscription that supports your favorite people on Twitter AND gets you access to ::puts sunglasses on:: super Tweets

rolling out in US and Canada on iOS only … 😏 for now pic.twitter.com/Mb9sgxbw5F

— Super Follows (@SuperFollows) September 1, 2021

അതേസമയം, സൂപ്പര്‍ ഫോളോയിലൂടെ വരുമാനം നേടണമെങ്കിൽ ചില നിബന്ധനകൾ പാലിക്കേണ്ടതുണ്ട്​. അതിലൊന്ന്​, അക്കൗണ്ടിന്​ കുറഞ്ഞത് 10000 ഫോളോവേഴ്​സുണ്ടാവണം എന്നതാണ്​. ഒരു മാസത്തിൽ 25 തവണയെങ്കിലും അക്കൗണ്ടിൽ ട്വീറ്റുകളിട്ടിരിക്കണം. 18 വയസ് തികയണം തുടങ്ങിയവയാണ്​ നിബന്ധനകള്‍.

സൂപ്പര്‍ ഫോളോസ് ഓപ്ഷന്‍ വേണ്ടവര്‍‌ ഹോം ടൈംലൈനിലെ സൈഡ്‌ബാറില്‍ മോണിറ്റൈസേഷനില്‍ സൂപ്പര്‍ ഫോളോസ് സെലക്റ്റ് ചെയ്യണം. ആരോഗ്യപ്രവര്‍ത്തകര്‍, മാധ്യമ പ്രവർത്തകർ, സംഗീതജ്ഞർ, എഴുത്തുകാർ, ഗെയിമർമാർ, ജ്യോതിഷികള്‍, സൗന്ദര്യ വിദഗ്ധർ, കൊമേഡിയന്‍സ്, കായിക വിദഗ്ധര്‍ തുടങ്ങിയവര്‍ക്കെല്ലാം ഈ ഫീച്ചര്‍ കാര്യമായി ഉപയോഗപ്പെടുമെന്നും ട്വിറ്റര്‍ കൂട്ടിച്ചേർത്തു.