പ്രശാന്തിന്റെ ആകാശയാത്ര എപ്പോൾ?

ഇന്ത്യയുടെ പ്രഥമ ബഹിരാകാശ ദൗത്യമാണ് ഗഗൻയാൻ. ഏതാനും മാസങ്ങൾക്ക് മുമ്പ് ഗഗൻയാത്രികരെ പ്രധാനമന്ത്രി മോദി പ്രഖ്യാപിച്ചപ്പോൾ മലയാളികൾ അത് ഏറെ ആഹ്ലാദത്തോടെയാണ് കേട്ടത്. കാരണം, യാത്രക്കായി ഐ.എസ്.ആർ.ഒ തെരഞ്ഞെടുത്ത നാല് യാത്രികരിലൊരാളും സംഘത്തിന്റെ ക്യാപ്റ്റനും ഒരു മലയാളിയാണ് -പ്രശാന്ത് ബാലകൃഷ്ണൻ നായർ. ഇന്ത്യൻ എയർഫോഴ്സിൽ പൈലറ്റായ പ്രശാന്ത് പാലക്കാട് സ്വദേശിയാണ്. പ്രമുഖ ചലച്ചിത്ര നടി ലെനയുടെ ഭർത്താവുമാണ്. പ്രശാന്ത് അടക്കം നാലുപേരും ഗഗൻയാത്രക്കുള്ള പരിശീലനത്തിലാണിപ്പോൾ. അതോടൊപ്പം, ഗഗൻയാൻ യാഥാർഥ്യമാക്കാൻ ഈ വർഷം നാല് സുപ്രധാന പരീക്ഷണങ്ങളും ഐ.എസ്.ആർ.ഒ നടത്തുന്നുണ്ട്.

ഇതിനിടയിൽ മറ്റൊരു വാർത്ത വന്നിരിക്കുന്നു: യാത്രികരിൽ രണ്ടുപേരെ പ്രത്യേക പരിശീലനത്തിനായി നാസയിലേക്ക് അയക്കാൻ ഐ.എസ്.ആർ.ഒക്ക് പരിപാടിയുണ്ടത്രെ. അതിൽ ഒരാളെ നാസ അന്താരാഷ്ട്ര ബഹിരാകാശ നിലയത്തിലേക്കും (ഐ.എസ്.എസ്) പറഞ്ഞയക്കും. ആരായിരിക്കും ആ യാത്രികൻ? അക്കാര്യം ഐ.എസ്.ആർ.ഒ വെളിപ്പെടുത്തിയിട്ടില്ല. ഗ്രൂപ് ക്യാപ്റ്റൻ എന്ന നിലയിൽ പ്രശാന്തിനാണ് ഏറ്റവും സാധ്യതയെന്നാണ് ഈ മേഖലയിലുള്ളവരുടെ അഭിപ്രായം. അതെന്തായാലും, ഒക്ടോബറിനുള്ളിൽ ഒരു ഇന്ത്യൻ യാത്രികൻ ഐ.എസ്.എസിലേക്ക് കുതിക്കുമെന്ന് ഉറപ്പാണ്.