പിസ്സ ഓർഡർ ചെയ്യവേ 9,999 രൂപ നഷ്ടമായി, കസ്റ്റമർകെയറിൽ വിളിച്ചപ്പോൾ പോയത്​ 11 ലക്ഷം രൂപ, സംഭവമിങ്ങനെ....

മുംബൈ: മഹാരാഷ്​ട്രയിൽ സൈബർ കുറ്റകൃത്യങ്ങൾ തുടർക്കഥയാകുന്നു. കഴിഞ്ഞ ദിവസം ഇൻറർനാഷണൽ ക്രെഡിറ്റ്​ കാർഡ്​ വാഗ്ദാനം ചെയ്​ത്​ വ്യവസായിയുടെ ബാങ്ക്​ അക്കൗണ്ടിൽ നിന്ന്​ ലക്ഷങ്ങൾ കവർന്ന സംഭവത്തിന്​ പിന്നാലെ, മുംബൈ സ്വദേശിനിയിൽ നിന്ന്​ സൈബർ കുറ്റവാളികൾ കവർന്നത്​ 11 ലക്ഷം രൂപയാണ്​.

സംഭവത്തെ കുറിച്ച്​ പൊലീസ്​ വിവരിക്കുന്നത്​ ഇങ്ങനെ :- ഒാൺലൈനായി പിസ്സയും ഡ്രൈ ഫ്രൂട്ട്​സും ഒാർഡർ ചെയ്യുന്നതിനിടെ നഷ്​ടമായ തുക തിരിച്ചുപിടിക്കാൻ ശ്രമിച്ച വയോധിയുടെ അക്കൗണ്ടിൽ നിന്നാണ്​​​ 11 ലക്ഷം രൂപ പോയത്​​. അടുത്തിടെ ബികെസി സൈബർ പോലീസ് സ്റ്റേഷനിൽ അവർ പരാതിയുമായി എത്തിയപ്പോഴാണ് തട്ടിപ്പ് പുറംലോകമറിയുന്നത്​.

അന്ധേരിയിൽ താമസിക്കുന്ന സ്​ത്രീ കഴിഞ്ഞ വർഷം ജൂലൈയിലാണ് ഒാൺലൈനിൽ​ പിസ്സ ഒാർഡർ ചെയ്​തത്​. എന്നാൽ, പേയ്​മെൻറ്​ വിവരങ്ങൾ നൽകിയതിന്​ പിന്നാലെ 9,999 രൂപ അക്കൗണ്ടിൽ നിന്ന്​ നഷ്ടമായി​. അതുപോലെ, ഒക്ടോബർ 29 ന് ഓൺലൈനിൽ ഡ്രൈ ഫ്രൂട്ട്‌സിന് ഓർഡർ നൽകുന്നതിനിടെ പരാതിക്കാരിക്ക്​ 1,496 രൂപ കൂടി നഷ്ടപ്പെട്ടു.

ഈ രണ്ട് സംഭവങ്ങളിലും തനിക്ക് നഷ്ടപ്പെട്ട പണം വീണ്ടെടുക്കാനുള്ള ശ്രമത്തിൽ, ഗൂഗിളിൽ തിരഞ്ഞപ്പോൾ കണ്ടെത്തിയ ഒരു ഫോൺ നമ്പറിൽ യുവതി ബന്ധപ്പെട്ടു. കസ്റ്റമർ കെയർ എന്ന്​ കരുതി വിളിച്ച ഫോൺ കോൾ, തട്ടിപ്പുകാരനായിരുന്നു എടുത്തത്​. അയാൾ എത്രയും പെട്ടന്ന്​ പണം തിരികെ ലഭിക്കുമെന്ന് പരാതിക്കാരിയോട്​​ പറയുകയും, പിന്നാലെ ഫോണിൽ ഒരു ആപ്ലിക്കേഷൻ ഡൗൺലോഡ്​ ചെയ്യാനും ആവശ്യപ്പെട്ടു. അങ്ങനെ ചെയ്​തതോടെ അവരുടെ ഫോണി​െൻറ നിയന്ത്രണം സൈബർ കുറ്റവാളിക്ക്​ ലഭിച്ചു. 2021 നവംബർ 14 മുതൽ ഡിസംബർ ഒന്ന്​ വരെ പല സമയങ്ങളിലായി 11.78 ലക്ഷം രൂപയാണ്​ സൈബർ കുറ്റവാളി സ്ത്രീയുടെ അക്കൗണ്ടിൽ നിന്ന്​ ട്രാൻസ്​ഫർ ചെയ്​തത്​.

ഒരു മാസത്തിന്​ ശേഷമാണ്​​ വയോധിക സൈബർ പൊലീസിന്​ പരാതി നൽകിയത്​. പരാതിയുടെ അടിസ്ഥാനത്തിൽ, ഐപിസി, ഇൻഫർമേഷൻ ടെക്നോളജി ആക്ടിലെ സെക്ഷൻ 420 (വഞ്ചന), മറ്റ് പ്രസക്തമായ വകുപ്പുകൾ എന്നിവ പ്രകാരം കുറ്റവാളികൾക്കെതിരെ എഫ്ഐആർ രജിസ്റ്റർ ചെയ്തിട്ടുണ്ടെന്ന്​ പൊലീസ്​ ഉദ്യോഗസ്ഥർ പറഞ്ഞു.