ചൊവ്വയുടെ മനോഹര ദൃശ്യങ്ങൾ സമ്മാനിച്ച്​ ചൈനയുടെ സ്വന്തം ടിയാൻവെൻ-1

ചൈനയുടെ ബഹിരാകാശ പേടകം ടിയാൻവെൻ-1 ചൊവ്വയുടെ ഭ്രമണപദത്തിലെത്തിയതോടെ ആദ്യ​ത്തെ വിഡിയോ പങ്കുവെച്ച്​ ചൈന. ചൈനീസ്​ പേടകം കറുത്ത ആകാശത്തിന്‍റെ പശ്ചാത്തലത്തിലുള്ള ചൊവ്വയുടെ മനോഹരമായ ഭൂപ്രകൃതിയും അന്തരീക്ഷവും പകർത്തിയിട്ടുണ്ട്​.

2020 ജൂലൈ 23ന്​ ചൊവ്വ ലക്ഷ്യമാക്കി വെൻചെൻ സ്​പേസ്​ സെന്‍ററിൽ നിന്നാണ്​ ലോങ്​ മാർച്ച്​ 5 റോക്കറ്റിൽ 'സ്വർഗത്തിലേക്കുള്ള ചോദ്യങ്ങൾ' എന്നർഥമാക്കുന്ന ചൈനയുടെ സ്വന്തം ടിയാൻവെൻ-1 പേടകം യാത്ര തുടങ്ങിയത്​. 50 കോടി കിലോമീറ്റർ പിന്നിട്ട്​ ഭ്രമണപദത്തിലെത്തിയതോടെ ഇന്ത്യക്കും യു.എ.ഇക്കും ശേഷം ചൊവ്വാദൗത്യം വിജയിപ്പിച്ച മൂന്നാമത്തെ ഏഷ്യൻ രാജ്യമായി ചൈനമാറി. ഓർബിറ്ററും ലാൻഡറും റോവറും അടങ്ങുന്നതാണ്​ ചൈനയുടെ പേടകം. ചൊവ്വയിലെ മണ്ണിന്‍റെ ഘടനയും അതിന്‍റെ സാധ്യതകളും പഠിക്കുകയാണു പ്രധാന ലക്ഷ്യം.