'ശീതയുദ്ധം' ആകാശത്തേക്കും; യു.എസ്​ പങ്കാളിയായ അന്താരാഷ്​ട്ര ബഹിരാകാശ നിലയം വിടാൻ റഷ്യ

മോസ്​കോ: റഷ്യക്കും യു.എസിനുമിടയിൽ അടുത്തിടെ വീണ്ടും ശക്​തിയാർജിച്ച പോര്​ പുതിയ തല​ങ്ങളിലേക്ക്​. രണ്ടു പതിറ്റാണ്ടിലേറെയായി ഇരു രാജ്യങ്ങളും സംയുക്​തമായി നടത്തുന്ന ബഹിരാകാശ ദൗത്യമായ അന്താരാഷ്​ട്ര ബഹിരാകാശ നിലയ (​െഎ.എസ്​.എസ്​) വുമായി ബന്ധം പതിയെ വിടാൻ റഷ്യ തീരുമാനിച്ചു. ഇതിന്‍റെ ഭാഗമായി സ്വന്തമായി ബഹിരാകാശ നിലയം സ്​ഥാപിക്കാൻ റഷ്യൻ പ്രസിഡന്‍റ്​ വ്ലാഡ്​മിർ പുടിൻ അനുമതി നൽകി. 2030 ഓടെ പൂർത്തിയാക്കാനാകുമെന്നാണ്​ പ്രതീക്ഷയെന്ന്​ റോസ്​കോസ്​മോസ്​ ബഹിരാകാശ ഏജൻസി അറിയിച്ചു.

1998ൽ ബഹിരാകാശത്തെത്തിയ ഐ.എസ്​.എസിൽ റഷ്യ- യു.എസ്​ രാഷ്​ട്രങ്ങൾക്കു പുറമെ മറ്റു 16 രാജ്യങ്ങളിൽനിന്നുള്ള ബഹിരാകാശ ശാസ്​ത്രജ്​ഞരും പ്രവർത്തിച്ചിട്ടുണ്ട്​. ഇരുരാജ്യങ്ങൾക്കുമിടയിൽ ഏറ്റവുമടുത്ത സൗഹൃദം നിലനിൽക്കുന്ന ഏക മേഖലയാണിത്​. 2025ഓടെ ഐ.എസ്​.എസ്​ വിടാനാണ്​ റഷ്യൻ തീരുമാനം. പങ്കാളി രാഷ്​ട്രങ്ങൾക്ക്​ ഇതുസംബന്ധിച്ച്​ നോട്ടീസ്​ നൽകുമെന്ന്​ റഷ്യൻ ​ഉപപ്രധാനമന്ത്രി യൂറി ബോറിസോവ്​ വ്യക്​തമാക്കി.

സ്​ഥിരമായി ആളുകളെ വെച്ചുള്ള നിലയമല്ല, റഷ്യ നിർമിക്കുക. ഇടവിട്ട്​ സന്ദർശനം നടത്തുക മാത്രമാകും ചെയ്യുക. പകരം നിർമിത ബുദ്ധിയും റൊബോട്ടുകളുമാകും പതിവു ജോലികൾ പൂർത്തിയാക്കുക. 600 കോടി ഡോളറാണ്​ നിർമാണ തുക കണക്കാക്കുന്നത്​.