അഞ്ച്​ വർഷം മുമ്പ്​ ബിൽ ഗേറ്റ്​സ്​ പറഞ്ഞു - "ലോകത്തെ കാർന്നുതിന്നുന്ന മഹാമാരി വരും"

കോവിഡ്​ 19 വൈറസ്​ ബാധ ലോകത്തെ ഭീതിയിലാഴ്​ത്തു​മ്പോൾ അതുമായി ബന്ധപ്പെട്ട്​ പല സംഭവങ്ങളും സമൂഹ മാധ്യമങ്ങളിൽ പ്രചരിക്കുന്നുണ്ട്​. കോവിഡ്​ 19 വൈറസ്​ താൻ മുൻകൂട്ടി പ്രവചിച്ചിരുന്നതായി ഒരു ആൾദൈവം ഇൗയിടെ പറഞ്ഞപ്പോൾ അത്​ വ ലിയ ട്രോൾ മെറ്റീരിയലായി മാറിയിരുന്നു. അതുപോലെ വൈറസ്​ ബാധയിൽ നിന്ന്​ മുക്​തിനേടാൻ ഒറ്റമൂലിയുമായി എത്തിയ വൈദ ്യന്മാരും സമൂഹ മാധ്യമങ്ങളിൽ വലിയ ചർച്ചക്ക്​ വഴിവെച്ചിട്ടുണ്ട്​.

വിഡിയോ സ്​ട്രീമിങ്​ പ്ലാറ്റ്​ഫോമായ നെ റ്റ്​ഫ്ലിക്​സിൽ 2018ൽ ഇറങ്ങിയ കൊറിയൻ വെബ്​ സീരീസിലെ കൊറോണ വൈറസി​ന്റെ രോഗലക്ഷണങ്ങളും മറ്റ്​ പ്രധാനവിവരങ്ങള ും പറയുന്ന ഭാഗങ്ങൾ സമൂഹമാധ്യമങ്ങളിൽ പ്രചരിച്ചത്​ ചിലരിലെങ്കിലും ഭീതി പടർത്തി. ദൃശ്യങ്ങൾ ട്വിറ്ററിൽ പങ്കുവെച്ചുകൊണ്ട്​ -എല്ലാം പ്ലാൻ ചെയ്​ത്​ നടത്തുന്നതാണോ..." എന്ന്​ ചോദിച്ചത്​ മറ്റാരുമല്ല, മുൻ ഇന്ത്യൻ ക്രിക്കറ്റ്​ താരം ഹർഭജൻ സിങ്​.

കോവിഡുമായി ബന്ധപ്പെട്ട്​ ഏറ്റവും ഒടുവിലായി പ്രചരിക്കുന്ന വിഡിയോ മൈക്രോസോഫ്​റ്റ് സ്ഥാപകനും ലോകസമ്പന്നനുമായ ബിൽഗേറ്റ്​സി​ന്റെതാണ്​​. എന്നാൽ, ബിൽഗേറ്റ്​സി​ന്റെ വിഡിയോ ഗൗരവത്തിലുള്ള ചർച്ചക്കാണ്​ വഴിവെച്ചിരിക്കുന്നത്​. അഞ്ച്​ വർഷം മുമ്പുള്ള വിഡിയോയിൽ അദ്ദേഹം ഭാവിയിൽ ലോകത്ത്​ ഭീതി പടർത്താൻ പോകുന്ന ഒരു മഹാമാരിയെ കുറിച്ചാണ് പറയുന്നത്.​ അതൊരു വൈറസായിരിക്കുമെന്നും അദ്ദേഹം എടുത്തുപറയുന്നു​. വൈറസിന്റെ വ്യാപനം നേരിടാൻ ലോകം പ്രാപ്​തമല്ലെന്നും അതിന്​ വേണ്ടി തയാറാവണമെന്നും അദ്ദേഹം വിശദീകരിക്കുന്നുണ്ട്​.

2015ൽ ബിൽഗേറ്റ്​സ്​ ടെഡ്​ ടാകിൽ സംസാരിക്കുന്ന വിഡിയോയാണ്​ യൂട്യൂബിൽ നിന്നെടുത്ത്​ ചിലർ സമൂഹമാധ്യമങ്ങളിലും മറ്റും വൈറലാക്കിയിരിക്കുന്നത്​. ബിൽഗേറ്റ്​സ്​ ഒരു ടൈംട്രാവലർ ആണെന്ന്​ പോലും ഇൻറർനെറ്റിൽ സംസാരം തുടങ്ങിയിട്ടുണ്ട്​.

അദ്ദേഹം പറയുന്നതിങ്ങനെ ----

"ഞങ്ങളുടെ കുട്ടിക്കാലത്ത്​ ജനങ്ങൾ ഭയന്നിരുന്നത്​ ന്യൂക്ലിയർ യുദ്ധമാണ്​. എന്നാൽ ഇപ്പോൾ കാലം മുന്നോട്ട്​ പോയിരിക്കുന്നു. അടുത്ത പതിറ്റാണ്ടുകളിൽ എന്തെങ്കിലും ഒരു സംഭവം ഒരു കോടിയിലധികം മനുഷ്യരുടെ ജീവഹാനിക്ക്​ കാരണമാവുന്നുണ്ടെങ്കിൽ അത്​, യുദ്ധമായിരിക്കില്ല. അപകടകാരിയായ ഒരു വൈറസായിരിക്കും. മിസൈലുകളല്ല... വിഷാണു....

ഇത്തരം വൈറസുകളുടെ അനിയന്ത്രിതമായ വ്യാപനം തടയാൻ സാധിക്കാത്തതിന്​ കാരണം അതിനുള്ള മികച്ച സംവിധാനങ്ങളില്ലാത്തതാണ്​. ന്യൂക്ലിയാർ വികസനത്തിന്​ കോടികൾ നിക്ഷേപിക്കുന്ന ലോകരാജ്യങ്ങൾ ആരോഗ്യ രംഗത്തിലേക്ക്​ കാര്യമായി ശ്രദ്ധചെലുത്തുന്നില്ല" - ബിൽ ഗേറ്റ്​സ് പറയുന്നു.

ആഫ്രിക്കയിൽ നാശം വിതച്ച എബോള വൈറസിനെ ഉദാഹരണമായി എടുത്തായിരുന്നു ബിൽ ഗേറ്റ്​സ്​ വിശദീകരിച്ചത്​. 2014ൽ എബോള ആഫ്രിക്കൻ രാജ്യങ്ങളിൽ പടർന്നുപിടിച്ചത്​ സിസ്റ്റം ശരിയായി പ്രവർത്തിക്കാത്തത്​ കൊണ്ടല്ല. മറിച്ച്​. അവിടെ ഇത്തരമൊരു മഹാമാരി നിയന്ത്രിക്കാനുള്ള സംവിധാനങ്ങൾ ഒന്നും തന്നെയുണ്ടായിരുന്നില്ല. അവിടുത്തെ ആരോഗ്യരംഗത്തുള്ളവർക്ക്​ നിസ്സഹായരായി നോക്കിനിൽക്കാൻ മാത്രമാണ്​ കഴിഞ്ഞതെന്നും അദ്ദേഹം ചൂണ്ടിക്കാട്ടി.

കോവിഡ്​ 19 വൈറസ്​ വ്യാപനത്തി​ന്റെ പശ്ചാത്തലത്തിൽ ലോകവ്യാപകമായി ചർച്ചയായ ‘കൊണ്ടാജിയൻ’ ചിത്രത്തെ കുറിച്ചും ബിൽ ഗേറ്റ്​സ്​ ടെഡ്​ ടാക്കിൽ പരാമർശിക്കുന്നുണ്ട്​. ചിത്രത്തിൽ വൈറസിനെ തുരത്തി ലോകത്തെ രക്ഷിക്കാൻ എപിഡമിയോളജിസ്റ്റുകൾ എത്തുന്നുണ്ട്​.‘‘ഇൗ ലോകവും ഹോളിവുഡ്​ ചിത്രവും തമ്മിൽ വലിയ വ്യത്യാസമുണ്ട്​.. സിനിമയിലുള്ളത്​ പോലെ മികച്ച രോഗപര്യവേക്ഷകൻ യഥാർഥ ജീവിതത്തിൽ ഇല്ല" - അദ്ദേഹം പറയുന്നു.

മഹാമാരി വരുന്ന സാഹചര്യത്തിൽ ലോകരാജ്യങ്ങൾ സ്വീകരിക്കേണ്ട മുൻകരുതലുകളെ കുറിച്ചും മൈക്രോസോഫ്​റ്റി​ന്റെ സ്ഥാപകൻ മുന്നറിയിപ്പ്​ നൽകുന്നുണ്ട്​. 1918ൽ ലോകത്തെ ഞെട്ടിച്ച ‘സ്​പാനിഷ്​ ഫ്ലൂ’ എടുത്തുപറഞ്ഞായിരുന്നു അദ്ദേഹം വിശദീകരിച്ചത്​. 3.3 കോടിയിലധികം ജനങ്ങളാണ്​ അന്ന്​ ആ രോഗം ബാധിച്ച്​ മരിച്ചത്​. ഇന്ന്​ അതുപോലൊരു രോഗം പിറവിയെടുത്താൽ ലോക ജനസംഖ്യ തന്നെ ഉന്മൂലനം ചെയ്യപ്പെടും. ലോകബാങ്ക്​ പുറത്തുവിട്ട ഒരു റിപ്പോർട്ടും അദ്ദേഹം പങ്കുവെച്ചു. ഒരു ആഗോള മഹാമാരി ഉണ്ടായാൽ ഇൗ ലോകം അതിന്​ വേണ്ടി ചിലവാക്കേണ്ടി വരിക മൂന്ന്​ ട്രില്ല്യൻ ഡോളറായിരിക്കും. എണ്ണിത്തിട്ടപ്പെടുത്താൻ ആവാത്ത നഷ്​ടമായിരിക്കുമെന്നർഥം.

അഞ്ച്​ വർഷം മുമ്പ്​ ബിൽഗേറ്റ്​സ്​ പറഞ്ഞ മഹാമാരിയാണോ ഇന്ന്​ ലോകം നേരിട്ടുകൊണ്ടിരിക്കുന്ന കൊറോണ വൈറസെന്നാണ്​ വിഡിയോക്ക്​ താഴെയും സമൂഹ മാധ്യമങ്ങളിലും പലരും ചോദിക്കുന്നത്​​. അദ്ദേഹം പറഞ്ഞ ഒരു കാര്യം എന്തായാലും സർവ്വരും അംഗീകരിച്ചിട്ടുണ്ട്​. ആയുധ ബലം വർധിപ്പിക്കാൻ മുടക്കുന്നതി​ന്റെ നാലിലൊന്ന്​ പോലും ലോകരാജ്യങ്ങൾ ആരോഗ്യ രംഗത്തിനായി ചിലവഴിക്കുന്നില്ല.

രോഗം ആദ്യം കണ്ടെത്തിയ ചൈനയും വൈറസ്​ ഏറ്റവും കൂടുതൽ പിടിമുറുക്കിയ ഇറ്റലിയും സ്​പെയിനും ഇപ്പോൾ അമേരിക്കയും വലിയ സാമ്പത്തിക ശക്​തികളാണ്​. മറ്റ്​ രാജ്യങ്ങളുമായി താരതമ്യം ചെയ്യു​മ്പോൾ ​മെച്ചപ്പെട്ട ആരോഗ്യ രംഗമുണ്ടായിരുന്നിട്ടുകൂടി അവരെല്ലാം പല ഘട്ടങ്ങളിലും നിസ്സഹായരായി വിറങ്ങലിച്ച്​ നിന്നു. കോവിഡിനെ ചൈനീസ്​ വൈറസ്​ എന്ന്​ വിളിച്ച ഡോണൾഡ്​ ട്രംപ്​ ഒടുവിൽ ഷി ജിൻ പിങ്ങിനെ വിളിച്ച്​ ചൈനയുടെ വിശേഷങ്ങൾ ചോദിച്ചറിഞ്ഞതായി ലോകമാധ്യമങ്ങൾ റിപ്പോർട്ട്​ ചെയ്​തു. അമേരിക്ക എന്നും ശത്രുപക്ഷത്ത്​ നിർത്തിയിരുന്ന ഉത്തര കൊറിയയുടെ പ്രസിഡൻറ്​ കിങ്​ ജോങ്​ ഉന്നിന്​ ട്രംപ്​ കത്തയച്ചതും വൈറസ്​ വ്യാപനം നിയന്ത്രിച്ചതിന്​ അഭിനന്ദിച്ചതുമൊക്കെ നാം ചർച്ച ചെയ്​തു.

ഒരു രക്ഷയുമില്ലാതെ വന്നപ്പോൾ പരസ്​പരം ആശ്രയിച്ച്​ വൈറസിനെ തുരത്താൻ ലോകനേതാക്കൾ തുനിഞ്ഞിറങ്ങിയ സാഹചര്യത്തിൽ ബിൽ ഗേറ്റ്​സ്​ അഞ്ച്​ വർഷം മുമ്പ്​ പറഞ്ഞ കാര്യങ്ങൾ ഇപ്പോഴും എപ്പോഴും തീർത്തും പ്രസ്​കതമാണെന്നാണ്​ സംസാരം.