ടിക്​ടോകി​െൻറ യഥാർഥ പകരക്കാരനോ ? ഇൻസ്റ്റഗ്രാമി​െൻറ ‘റീൽസ്​’

രാജ്യത്ത്​ ടിക്​ടോക്​ നിരോധിച്ചതിന്​ പിന്നാലെ എത്രയും പെട്ടന്ന്​ പകരക്കാരനെ അവതരിപ്പിക്കാനുള്ള നെ​േട്ടാട്ടത്തിലാണ് ചില കമ്പനികൾ​. മിത്രോം, ചിങ്കാരി തുടങ്ങി ചില മെയ്​ഡ്​ ഇൻ ഇന്ത്യ ആപ്പുകൾ നിലവിൽ പ്ലേസ്​റ്റോറിൽ ഉണ്ടെങ്കിലും യഥാർഥ പകരക്കാരനായി ഇവരെയാരെയും ടിക്​ടോക്​ യൂസർമാർ കണ്ടുതുടങ്ങിയിട്ടില്ല.

ഫേസ്​ബുക്കി​​െൻറ കീഴിലുള്ള ഇമേജ്​ ഷെയറിങ്​ ആപ്പായ ഇൻസ്റ്റഗ്രാം​ നേരത്തെ തന്നെ സ്റ്റാറ്റസ്​ വിഡിയോയായും മറ്റും ടിക്​ടോകിന്​ സമാന രീതിയിലുള്ള വിഡിയോ ഷെയറിങ്​ സംവിധാനം പരീക്ഷിച്ചിരുന്നു. ദൈർഘ്യമേറിയ വിഡിയോ പോസ്റ്റ്​ ചെയ്യാനായി ​െഎ.ജി ടി.വി എന്ന പ്രത്യേക ആപ്പും ഇറക്കിയിരുന്നു. എന്നാൽ, 15 സെക്കൻറുകൾ മാത്രമുള്ള വിഡിയോ പങ്കുവെക്കാനുള്ള പുതിയ ഫീച്ചർ പരീക്ഷിച്ചിരിക്കുകയാണ്​ ഇൻസ്റ്റഗ്രാം. ടിക്​ടോക്​ പോലെ സംഗീതവും ഫിൽട്ടറുകളും കോർത്തിണക്കി വിഡിയോ ചെയ്യാനുള്ള പുതിയ സംവിധാനത്തിൻറെ പേര്​ ‘റീൽസ്’​ എന്നാണ്​.

റീൽസിൽ ഷെയർ ചെയ്യുന്ന വിഡിയോ ഫോളോ ചെയ്യുന്നവർക്ക്​ മാത്രമായി കാണാനുള്ളതല്ല. ടിക്​ടോക്​ പോലെ തന്നെ അവ പ്ലാറ്റ്​ഫോമിലുള്ള എല്ലാവരിലേക്കും​ പങ്കുവെക്കപ്പെടും. സിനിമകളിലെ ജനപ്രിയ സംഭാഷണങ്ങളും മറ്റും ഉൾപ്പെടുത്തി വിഡിയോ ചെയ്യാനും സാധിക്കും. ഫേസ്​ബുക്ക്​ ഇന്ത്യ വൈസ്​ പ്രസിഡൻറ്​ വിശാൽ ഷായാണ്​ റീൽസ്​ അവതരിപ്പിച്ച വിവരം പങ്കുവെച്ചത്​.

ഇൻസ്റ്റയിലുള്ള വിഡിയോകളിൽ 45 ശതമാനവും 15 സെക്കൻറിന്​ താഴെയുള്ളതാണ്​. സ്​റ്റോറികളിൽ മാത്രമായി വിഡിയോ ഒതുക്കാൻ ഞങ്ങളുടെ യൂസർമാർ ആഗ്രഹിക്കുന്നില്ല. അവ ദീർഘകാലത്തേക്ക്​ അവരുടെ പ്രൊഫൈലിൽ നിലനിൽക്കണമെന്നും ഫോളോ ചെയ്യാത്തവരിലേക്കും എത്തണമെന്നും അവർ ആഗ്രഹിക്കുന്നുണ്ട്​. ഇത്​ മനസിലാക്കിയതോടെയാണ്​ റീൽസ്​ എന്ന ഫീച്ചർ അവതരിപ്പിക്കാൻ ഞങ്ങൾ തയാറായത്​. -വിശാൽ ഷാ​ വിഡിയോ കോൺഫറൻസിങ്ങിലൂടെ അറിയിച്ചു.

ബ്രസീൽ,ജർമനി,ഫ്രാൻസ്​ എന്നീ രാജ്യങ്ങൾക്ക്​ പിന്നാലെ ഇന്ത്യയിലും റീൽസ് ഇന്ന്​ 7.30 മുതൽ പരീക്ഷിച്ച്​ തുടങ്ങും. ആപ്പിൽ മികച്ച സംഗീത ശേഖരം ഒരുക്കാനായി പ്രമുഖ മ്യൂസിക്​ ലേബൽസുമായി ഇൻസ്റ്റഗ്രാം ഡീലുണ്ടാക്കിയിട്ടുമുണ്ട്​. പ്രമുഖ ടിക്​ടോക്​, യൂട്യൂബ്​, സിനിമ സെലിബ്രിറ്റികളെയാണ്​ ജനപ്രീതിയേകാനായി ഫേസ്​ബുക്ക്​ റീൽസിലേക്ക്​ ക്ഷണിച്ചിരിക്കുന്നത്​. ഇന്ത്യയിൽ എന്നാണ്​ ഒൗദ്യോഗികമായി ലോഞ്ച്​ ചെയ്യുക എന്ന്​ ഇതുവരെ ഫേസ്​ബുക്ക്​ അധികൃതർ പുറത്തുവിട്ടിട്ടില്ല.

റീൽസ്​ ഉപയോഗിക്കുന്നത്​ എങ്ങനെ ??

ഇൻസ്റ്റഗ്രാം ആപ്പിലെ കാമറ ​െഎക്കൺ തന്നെയാണ്​ റീൽസിലേക്കുള്ള വാതിൽ തുറക്കുന്നത്​. നേരത്തെ അവതരിപ്പിച്ച ബൂമറാങ്​ എന്ന സംവിധാനത്തിനൊപ്പമായിരിക്കും റീൽസിനും സ്ഥാനം. 

കാമറയിൽ ക്ലിക്​ ചെയ്​ത്​ റീൽസ്​ സെലക്​ട്​ ചെയ്​താൽ 15 സെക്കൻറുകളുള്ള വിഡിയോ ചെയ്ത്​ തുടങ്ങാം. അതിലേക്ക്​ കണ്ണഞ്ചിപ്പിക്കുന്ന എഫക്​ടുകൾ നൽകാനും സംഗീതം ചേർക്കാനും സംവിധാനമുണ്ടാകും. കൂടെ സ്​പീഡ്​, ടൈമർ എന്നീ സെക്ഷനുകളും നൽകിയിട്ടുണ്ട്​. സ്വന്തം ശബ്​ദം ഉപയോഗിച്ചും വിഡിയോ റെക്കോർഡ്​ ചെയ്യാം.

വിഡിയോ തയാറാക്കിയതിന്​ ശേഷം ആരൊക്കെ അത്​ കാണണം എന്ന്​ യൂസേഴ്​സിന്​ തെരഞ്ഞെടുക്കാവുന്നതാണ്​. ഇൻസ്റ്റഗ്രാം സ്​റ്റോറി ഫോളോ ചെയ്യുന്നവർക്ക്​ മാത്രമേ കാണാൻ സാധിക്കുമായിരുന്നുള്ളൂ. അതേസമയം, റീൽസ്​ ‘എക്​സ്​പ്ലോർ സെക്ഷനിലേക്ക്​’ ഷെയർ ചെയ്​താൽ പ്ലാറ്റ്​ഫോമിലുള്ള എല്ലാവർക്കും കാണാനും ലൈക്​ ചെയ്യാനും കമൻറ്​ ചെയ്യാനും കഴിയും. 

ഒരേ സമയം  15 സെക്കൻറുകൾ ഉള്ള നിരവധി റീൽസ്​ യൂസർമാർക്ക്​ ഷൂട്ട് ചെയ്​ത്​ പങ്കുവെക്കാൻ സാധിക്കും. ഒാരോന്നിനും വ്യത്യസ്​ത എഫക്​ടുകളും നൽകി മനോഹരമാക്കുകയും ചെയ്യാം.