സർക്കാർ ഇളവില്ലെങ്കിൽ വോഡഫോൺ-ഐഡിയ പൂ​ട്ടേണ്ടി വരും -കെ.എം ബിർള

ന്യൂഡൽഹി: സർക്കാറിന്​ നൽകേണ്ട കുടിശ്ശികയിൽ ഇളവ്​ നൽകിയില്ലെങ്കിൽ വോഡഫോൺ-ഐഡിയ പൂ​ട്ടേണ്ടി വരുമെന്ന്​ ചെയർമാൻ കുമാർ മംഗലം ബിർള. സർക്കാറിൻെറ ഇളവില്ലെങ്കിൽ അത്​ വോഡഫോൺ-ഐഡിയയുടെ അന്ത്യത്തിന്​ കാരണമാവുമെന്നും അദ്ദേഹം പറഞ്ഞു. ഹിന്ദുസ്ഥാൻ ടൈംസ്​ സംഘടിപ്പിച്ച ലീഡർഷിപ്പ്​ സമ്മേളനത്തിലായിരുന്നു പരാമർശം.

ടെലികോം ലൈസൻസ്​ ഫീസ്​, സ്​പെക്​ട്രം യൂസേജ്​ ചാർജ്​ എന്നീ ഇനങ്ങളിൽ കേന്ദ്രസർക്കാറിന്​ 1.47 ലക്ഷം കോടി നൽകാൻ ടെലികോം കമ്പനികളോട്​ സുപ്രീംകോടതി ഉത്തരവിട്ടിരുന്നു. 14 വർഷത്തെ ചാർജുകളും പലിശയും നൽകാനായിരുന്നു കോടതി ഉത്തരവ്​. ഇതിൽ ഇളവ്​ വേണമെന്നാണ്​ കമ്പനിയുടെ ആവശ്യം.

സുപ്രീംകോടതി ഉത്തരവ്​ പ്രകാരം ഏകദേശം 53,038 കോടി രൂപ​ വോഡഫോൺ-ഐഡിയ കേന്ദ്രസർക്കാറിന്​ നൽകേണ്ടി വരും. ചുരുങ്ങിയ കാലയളവിനുള്ളിൽ ഇത്രയും തുക നൽകാൻ ഒരു കമ്പനിക്കും കഴിയില്ലെന്നാണ്​ വോഡ​ഫോൺ-ഐഡിയയുടെ പ്രതികരണം. നേരത്തെ ഇന്ത്യയിലെ പ്രമുഖ മൊബൈൽ സേവനദാതാക്കളെല്ലാം നിരക്കുകൾ കുത്തനെ ഉയർത്തിയിരുന്നു.