കേന്ദ്രത്തിൻെറ പകപോക്കൽ; ആംനസ്​റ്റി ഇന്ത്യയിൽ പ്രവർത്തനം അവസാനിപ്പിച്ചു

ന്യൂഡൽഹി: അന്തരാഷ്​ട്ര മനുഷ്യാവകാശ സംഘടനയായ ആംനസ്​റ്റി ഇൻറർനാഷണൽ ഇന്ത്യയിലെ പ്രവർത്തനം അവസാനിപ്പിച്ചു. ബാങ്ക്​ അക്കൗണ്ടുകൾ കേന്ദ്ര സർക്കാർ മരവിപ്പിച്ചതോടെയാണ്​ പ്രവർത്തനം നിർത്തിയത്​.

സംഘടനക്കു​ നേരെ സർക്കാർ പ്രതികാര നടപടി സ്വീകരിക്കുകയാണെന്ന്​ നേരത്തെ തന്നെ മനുഷ്യാവകാശ പ്രവർത്തകർ ആരോപിച്ചിരുന്നു. ഈ മാസം പത്തിന്​ സംഘടനയുടെ അക്കൗണ്ടുകൾ പൂർണമായും മരിവിപ്പിച്ചു. വിദേശ ഫണ്ട്​ സ്വീകരിക്കുന്നതുമായി ബന്ധപ്പെട്ട്​ സംഘടന വിവിധ അന്വേഷണങ്ങളും നേരിടുന്നുണ്ട്​.

ആംനസ്​റ്റി ഇൻറർനാഷണൽ അനധികൃതമായി ഫണ്ട്​ സ്വീകരിക്കുന്നുണ്ടെന്നും 'ഫോറിൻ കോൺട്രിബ്യൂഷൻ റഗുലേഷൺ ആക്​റ്റ്​' പ്രകാരം സംഘടന ഇതുവരെ രജിസ്​റ്റർ ചെയ്​തിട്ടില്ലെന്നുമാണ്​ സർക്കാർ വാദം.

നേരത്തെ, ആംനസ്​റ്റി സ്വീകരിക്കുന്ന പല ഫണ്ടുകൾക്കും കൃത്യമായ കണക്കും ഉറവിടവും ഇല്ലെന്ന്​ കാണിച്ച്​ എൻഫേഴ്​സ്​മെൻറ്​ ഡയരക്​ടറേറ്റ് (ഇ.ഡി) കേസെടുത്തിരുന്നു.

വിദേശ ഫണ്ട്​ സ്വീകരിക്കാനാവാതെ ഇന്ത്യയിൽ പ്രവർത്തിക്കാൻ കഴിയില്ലെന്ന്​ സംഘടന മേധാവികൾ അറിയിച്ചു. തങ്ങളുമായി ബന്ധപ്പെട്ട്​ പ്രവർത്തിക്കുന്ന​വർ​ പ്രവർത്തനം അവസാനിപ്പിക്കണമെന്നും അവർ നിർദേശം നൽകി. നിരവധി വിഷയങ്ങളിൽ ആംനസ്​റ്റി നടത്തുന്ന വിവിധ ഗവേഷണങ്ങളും ഇതോ​െട അവസാനിക്കും.

കഴിഞ്ഞ പാർലമെൻറ്​ സമ്മേളനത്തിലാണ്​ വിദേശ ഫണ്ട്​ സ്വീകരിക്കുന്നതുമായി ബന്ധപ്പെട്ട്​ പുതിയ നിയമം പാസാക്കിയത്​. ഇതോടെ വിദേശത്തു നിന്നുംഫണ്ട്​ സ്വീകരിച്ച്​ പ്രവർത്തിക്കുന്ന സംഘടനകൾക്കും എൻ.ജി.ഒകളും കടുത്ത പ്രതിസന്ധി നേരിടുകയാണ്​.