ദി ഗ്രേറ്റ്​ ഇന്ത്യൻ വിക്​ടറി

ബ്രിസ്​ബേൻ: മുൻനി​രയെ മൊത്തം കരക്കിരുത്തിയ പരിക്കും കംഗാരുക്കളുടെ പുറംകളിയും വില്ലൻവേഷം കെട്ടിയാടിയിട്ടും ആദ്യം ശുഭ്​മാൻ ഗില്ലും പിന്നെ ഋഷഭ്​ പന്തും തേരുതെളിച്ച ഗാബ മൈതാനത്ത്​ വലിയ ടോട്ടൽ അനായാസം കടന്ന്​ ഇന്ത്യക്ക്​ ചരിത്ര വിജയം. അവസാന 20 ഓവറിൽ 100 റൺസ്​ ആവശ്യമായിരുന്ന കളിയിൽ അതിവേഗം ബാറ്റുവീശി പന്തും കൂട്ടുകാരും ഇന്ത്യയെ വിജയ തീരത്തെത്തിക്കുകയായിരുന്നു. ചരിത്ര വിജയത്തോടെ ഇന്ത്യ ബോർഡർ ഗവാസ്​കർ ട്രോഫി നിലനിർത്തി.

സ്​കോർ ആസ്​ട്രേലിയ 369, 294, ഇന്ത്യ 336, 329/7.

വിധി നിർണയിക്കുന്ന​ ഓസീസ്​- ഇന്ത്യ ടെസ്​റ്റ്​ പരമ്പരയിലെ അവസാന ടെസ്​റ്റി​െൻറ അവസാന നാളിൽ നാട്ടുകാരായ താരങ്ങളെയും കാണികളെയും ഒന്നിച്ച്​ നിശ്ശബ്​ദമാക്കിയായിരുന്നു ഇന്ത്യൻ ബാറ്റിങ്​ ചരിത്രം തൊട്ടത്​. പുറത്താകാതെ 89 റൺസുമായി അജയ്യനായി നിന്ന ഋഷഭ്​​ ലക്ഷ്യത്തിലേക്ക്​ മൂന്നു റൺസ്​ മാത്രമിരിക്കേ, പന്തിനെ അതിർവരയിലേക്ക്​ പായിച്ചാണ്​ ആഘോഷ ജയം എത്തിപ്പിടിച്ചത്​. ഇതോടെ കംഗാരു മണ്ണിൽ ഇന്ത്യ നേടിയത്​ 2-1​െൻറ തുടർച്ചയായ രണ്ടാം പരമ്പര വിജയം​. 2018-19ലായിരുന്നു നേരത്തെ പരമ്പര പിടിച്ചത്​. മറുവശത്ത്​ ഗാബ മൈതാനത്ത്​ മൂന്നു പതിറ്റാണ്ടിനിടെ ടെസ്​റ്റിൽ ആദ്യ പരാജയമായി ആതിഥേയർക്ക്​. ഋഷഭ്​ പന്തിനു പുറമെ വാഷിങ്​ടൺ സുന്ദർ, ശുഭ്​മാൻ ഗിൽ, ഷാർദുൽ താക്കൂർ, സെയ്​നി എന്നീ ഇളമുറക്കാർക്കും അവകാശപ്പെട്ടതാണ്​ ഗാബയിലെ പുതുചരിത്രമെന്നതും സവിശേഷത.

ചൊവ്വാഴ്​ച വലിയ സ്​കോർ ലക്ഷ്യമിട്ട്​ രണ്ടാമത്​ ബാറ്റിങ്ങിനിറങ്ങിയ സന്ദർശകർക്കായി ശുഭ്​മാൻ ഗിൽ മുന്നിൽനിന്ന്​ നയിച്ച ദിനത്തിൽ താരം സെഞ്ച്വറിക്കരികെ ലിയോണിന്​ വിക്കറ്റ്​ സമ്മാനിച്ച്​ മടങ്ങി. രണ്ടാം ഇന്നിങ്​സിൽ 21 പന്ത്​ നേരിട്ട്​ ഏഴു റൺസുമായി രോഹിത്​ ശർമ നേരത്തെ മടങ്ങിയിട്ടും പതറാതെ നിലയുറപ്പിച്ച ഓപണർ ശുഭ്​മാൻ ഗിൽ നങ്കൂരമിട്ട്​ കളിച്ച്​ 91 റൺസെടുത്തു. 146 പന്ത്​ നേരിട്ടായിരുന്നു മാസ്മരിക പ്രകടനം. വൺഡൗണായി എത്തിയ ചേതേശ്വർ പൂജാരയും നാലാമനായി പാഡുകെട്ടിയ നായകൻ അജിൻക്യ രഹാനെയും മികച്ച കൂട്ടുകെട്ടുമായി അനായാസം ഓസീസ്​ ബൗളിങ്ങിനെതിരെ ചെറുത്തുനിന്നത്​ ഇന്ത്യ കാത്തുനിൽക്കുന്ന​ സ്വപ്​നം സാക്ഷാത്​കരിക്കപ്പെടുമെന്ന പ്രതീക്ഷ നൽകി. 211 പന്ത്​ നേരിട്ട പൂജാര അർധ സെഞ്ച്വറി നേടിയപ്പോൾ ഏകദിന ശൈലിയിൽ ബാറ്റുവീശിയ രഹാനെ 22 പന്തിൽ 24 റൺസ്​ എടുത്ത്​ മടങ്ങി​.

ഓസീസ്​ നിരയിൽ പാറ്റ്​ കമ്മിൻസ്​ നാലും നഥാൻ ലിയോൺ ഒന്നും വിക്കറ്റെടുത്തു. രണ്ടാം ഇന്നിങ്​സിൽ ഓസീസ്​ 294 റ​ൺസിന്​ എല്ലാവരും പുറത്തായിരുന്നു. 55 റൺസുമായി മുൻ നായകൻ സ്​റ്റീവ്​ സ്​മിത്ത്​ മാത്രമാണ്​ കാര്യമായി ഇന്ത്യൻ ബൗളിങ്ങിനെതിരെ പിടിച്ചുനിന്നത്​. സിറാജ്​ അഞ്ചും ഷാർദുൽ താക്കൂർ നാലും വിക്കറ്റെടുത്തു. വാഷിങ്​ടൺ സുന്ദറിനായിരുന്നു ശേഷിച്ച വിക്കറ്റ്​.