കാഴ്ചകളും അനുഭവങ്ങളും അനവധി; ലോകത്തിലെ ദീർഘമേറിയ ട്രെയിൻ യാത്രകൾ ഇവയാണ്​

ട്രെയിനുകൾ സഞ്ചരിക്കുന്നത്​ വ്യത്യസ്ത സ്ഥലങ്ങളിലേക്ക്​ മാത്രമല്ല, വൈവിധ്യമാർന്ന ജീവിതങ്ങളിലേക്ക്​ കൂടിയാണ്​. ജീവിതത്തെക്കുറിച്ച് വ്യത്യസ്തമായ വീക്ഷണങ്ങൾ നൽകി ഓരോ ട്രെയിനുകളും അജ്ഞാതവും അതിശയകരവുമായ സ്ഥലങ്ങളിലൂടെ കടന്നുപോകുന്നു. അതിൽ പലവിധ ഭാഷകളുണ്ടാകും, സംസ്കാരങ്ങളുണ്ടാകും, രുചിവൈവിധ്യങ്ങളുണ്ടാകും, ഭൂപ്രകൃതികളുണ്ടാകും, മനുഷ്യ ജീവിതങ്ങളുണ്ടാകും. ഇത്തരത്തിൽ വ്യത്യസ്ത കാഴ്ചകളും അനുഭവങ്ങളും നൽകുന്ന ലോകത്തിലെ ഏറ്റവും ദൈർഘ്യമേറിയതും സാഹസികവുമായ ട്രെയിൻ യാത്രകളിൽ ചിലത്​ പരിച​യപ്പെടാം.

ഈസ്റ്റേൺ ആൻഡ്​ ഓറിയന്‍റ​ൽ എക്സ്പ്രസ്

തെക്കുകിഴക്കൻ ഏഷ്യയിലെ ക്ലാസിക്​ അനുഭവമാണീ യാത്ര. മിക്കവർക്കും ഇതൊരു സ്വപ്​ന സാക്ഷാത്​കാരം കൂടിയാണ്​. വിശാലമായ കാഴ്ചകളും മനോഹരമായ അനുഭവങ്ങളും ഇടകലർന്ന കിഴക്കൻ ഏഷ്യയുടെ ചാരുത പകർത്തുന്ന യാത്രയാണിത്.

നാല് ദിവസം നീളുന്ന യാത്രയിൽ സിംഗപ്പൂർ, മലേഷ്യ, തായ്‌ലൻഡ് എന്നിവിടങ്ങളിലൂടെ ട്രെയിൻ നിങ്ങളെ കൊണ്ടുപോകും. എത്തിപ്പെടുന്ന സ്ഥലങ്ങളിലെ പ്രധാന ആകർഷണ കേന്ദ്രങ്ങളിലേക്ക്​ യാത്രക്കാർക്ക്​ പോകാനുള്ള അവസരവുമുണ്ട്​.

ട്രാൻസ്-സൈബീരിയൻ എക്സ്പ്രസ്

ലോകം കണ്ടിട്ടുള്ളതിൽ വെച്ച് ഏറ്റവും ഐതിഹാസികമായ ട്രെയിൻ യാത്രയാണിത്​. ആറ്​ ദിവസം നീളുന്ന യാത്ര വ്യത്യസ്ത നാടുകൾക്ക്​ പുറമെ വിവിധ സമയ മേഖലകളിലൂടെയാണ്​ കടന്നുപോകുന്നത്​. റഷ്യയുടെ പടിഞ്ഞാറിനെ കിഴക്കുമായി ബന്ധിപ്പിക്കുന്ന യാത്രയാണിത്​. മോസ്കോയിൽനിന്ന് ആരംഭിച്ച് ആറ് ദിവസത്തിന് ശേഷം വ്ലാഡിവോസ്റ്റോക്കിലാണ്​ യാത്ര അവസാനിക്കുക. ഈ യാത്രക്ക്​ സമാനമായ മറ്റൊന്നു കണ്ടെത്താൻ ബുദ്ധിമുട്ടാണ്​. ഏതൊരു സാഹസിക സഞ്ചാരിയും ഒരിക്കലെങ്കിലും ആസ്വദിക്കേണ്ട യാത്രയാണിത്​.

കാലിഫോർണിയ സെഫിർ

അമേരിക്കയിലൂടെ നടത്താവുന്ന ഏറ്റവും ദൈർഘ്യമേറിയ ട്രെയിൻ യാത്രയാണിത്​. ചിക്കാഗോക്കും സാൻ ഫ്രാൻസിസ്കോ ബേയ്ക്കും ഇടയിലാണ്​ ട്രെയിൻ ഓടുന്നത്​. 51 മണിക്കൂറിലധികമാണ്​ യാത്രാദൈർഘ്യം. മനോഹരമായ കൊളറാഡോ മലയിടുക്കുകൾ, റോക്കീസ്, സിയറ നെവാഡ എന്നിവ അനുഭവിക്കാൻ സഞ്ചാരികൾക്ക് അവസരം ലഭിക്കും. ഒമാഹ, ഡെൻവർ, സാൾട്ട് ലേക്ക് സിറ്റി എന്നിവയിലൂടെയും ട്രെയിൻ കടന്നുപോകുന്നു. തികച്ചും മനോഹരമായ സാഹസിക യാത്രയാകും ഇതെന്ന്​ ഉറപ്പിക്കാം.

ദെ കനേഡിയൻ

മൂന്ന് ദിവസം നീളുന്ന ഈ യാത്ര കാനഡയുടെ അതിമനോഹരമായ ഭൂപ്രകൃതിയിലേക്ക്​ സഞ്ചാരികളെ ആനയിക്കും. ടൊറന്‍റോയിൽ തുടങ്ങി വാൻകൂവറിലാണ്​ അവസാനിക്കുക. യാത്രയിൽ ജനൽവാതിലിൽനിന്ന്​ കണ്ണുകളെ മാറ്റാൻ സമ്മതിക്കാത്ത വിധത്തിലുള്ള അനുഭവങ്ങളാണ്​ ഈ യാത്ര സമ്മാനിക്കുക. മൂന്ന്​ വ്യത്യസ്ത ക്ലാസ്​ ടിക്കറ്റ്​ ഇതിൽ ലഭ്യമാണ്​ - എക്കണോമി, സ്ലീപ്പർ പ്ലസ്, പ്രസ്റ്റീജ്. ഭക്ഷണം കഴിക്കാനുള്ള ഡൈനിംഗ്​ കോച്ചുകളും ഇതിലുണ്ട്​.

വിവേക് ​​എക്സ്പ്രസ്

ഇന്ത്യയെ സംബന്ധിച്ചിടത്തോളം റെയിൽ‌വേ രാജ്യത്തിന്‍റെ ജീവനാഡിയാണ്. അതിനാൽ, ലോകത്തിലെ ഏറ്റവും ദൈർഘ്യമേറിയ ട്രെയിൻ യാത്രകളിലൊന്ന് ഇന്ത്യയിലാണെന്ന്​ പറയുന്നതിൽ അതിശയിക്കാനില്ല. നാല്​ ദിവസം നീളുന്ന യാത്രയാണിത്​. രാജ്യത്തിന്‍റെ വടക്കുകിഴക്കൻ ഭാഗത്ത്, ആസാമിലെ ദിബ്രുഗഡിൽനിന്ന് ആരംഭിച്ച് തെക്കേ അറ്റത്തുള്ള കന്യാകുമാരി വരെ നീളുന്നു. ആകെ 59 സ്റ്റേഷനുകളുണ്ട്. ഇതിൽ എട്ടെണ്ണം കേരളത്തിലാണ്​.

രാജ്യത്തിന്‍റെ മാറിക്കൊണ്ടിരിക്കുന്ന ഭൂപ്രകൃതി മാത്രമല്ല, വൈവിധ്യമായ സംസ്കാരങ്ങളും ഭാഷയും ഭക്ഷണവും മനുഷ്യരെയും തൊട്ടറിയാനുള്ള മികച്ച അവസരമാണിത്.