ത്രില്ലടിപ്പിക്കാൻ പുത്തൻ ചാലഞ്ച് സോൺ

ദുബൈ മഹാനഗരത്തിലെ സാധാരണക്കാരുടെ ഏറ്റവും പ്രധാന ആകർഷക കേന്ദ്രമാണ്​ ഗ്ലോബൽ വില്ലേജ്​. ഓരോ ദിവസവും ആയിരങ്ങൾ ഈ ആഗോള ഗ്രാമത്തിൽ വിനോദത്തിനായി എത്തിച്ചേരുന്നുണ്ട്​. രണ്ടര ദശാബ്​ദത്തിലേറെയായി പ്രവർത്തിക്കുന്ന ഗ്ലോബൽ വില്ലേജിൽ ഓരോ ഘട്ടത്തിലും പുതിയ സംവിധാനങ്ങൾ ഏർപ്പെടുത്തി നവീകരിക്കാൻ സംഘാടകർ ശ്രദ്ധിച്ചുവരുന്നുമുണ്ട്​. ഇത്തവണത്തെ സീസണിൽ തുടക്കം മുതൽ തന്നെ കുടുംബങ്ങൾക്കും കുട്ടികൾക്കും വേണ്ടി പുതിയ വിനോദ സംരംഭങ്ങൾ രൂപപ്പെടുത്തിയിരുന്നു. അവസാനമായി സംവിധാനിച്ച ‘നിയോൺ ഗാലക്സി എക്സ്​ - ചാലഞ്ച്​ സോൺ’ ഇക്കൂട്ടത്തിൽ ശ്രദ്ധേയമാണ്​.

5,022 ചതുരശ്ര മീറ്റർ വിസ്തീർണത്തിൽ രൂപപ്പെടുത്തിയ കേന്ദ്രം കായിക വിനോദങ്ങളും സാഹസിക പ്രകടനങ്ങളും ആഗ്രഹിക്കുന്നവർക്ക്​ ഇഷ്ടപ്പെടുന്ന രീതിയിലാണ്​ സംവിധാനിച്ചിരിക്കുന്നത്​. ആറു വയസിന്​ മുകളിൽ പ്രായമുള്ളവർക്കാണ്​ ഇവിടേക്ക്​ പ്രവേശനം. 10 വ്യത്യസ്ത രീതിയിലുള്ള സാഹസിക ചാലഞ്ചുകൾ കടന്നുപോകാനുള്ള അവസരമാണ്​ ഇവിടെ ഉൾപ്പെടുത്തിയിട്ടുള്ളത്​. ഓരോന്നും വിനോദവും ത്രില്ലും സമ്മാനിക്കുന്നതാണ്​.

‘നിയോൺ ഗാലക്‌സി എക്‌സ്’ ഗ്ലോബൽ വില്ലേജിലെ ചലഞ്ച് സോൺ മിനി വേൾഡിനുള്ളിലാണ് സ്ഥിതി ചെയ്യുന്നത്. എല്ലാവർക്കും ഹൃദയസ്പർശിയായ വിനോദം പ്രദാനം ചെയ്യുമെന്ന് ഉറപ്പാക്കുന്ന അന്തരീക്ഷത്തിലാണിത്​ സ്ഥിതി ചെയ്യുന്നത്​. 32 മീറ്റർ നീളമുള്ള നിഞ്ച ട്രയൽ ചലഞ്ച്, 15 മീറ്റർ താഴേക്ക് പോകുന്ന സൈക്ലോൺ സ്ലൈഡ്, എയർ കോസ്റ്ററിനൊപ്പം 4-ലെവൽ ഉയരമുള്ള റോപ്പ് കോഴ്‌സ് എന്നിവയും ആകർഷണങ്ങളിൽ ഉൾപ്പെടും. 18 മീറ്ററിലധികം ഉയരമുള്ള ഒരു നെറ്റ് ക്ലൈംബിങ്​ ടവർ, ഡോനട്ട് ആൻഡ് ലോഞ്ച് സ്ലൈഡുകൾ, 8 മീറ്ററിലധികം ഉയരമുള്ള ക്ലൈംബിങ്​ മതിലുകൾ എന്നിവയാണ് മറ്റ് ആകർഷണങ്ങൾ. ബഹിരാകാശം പ്രമേയമാകുന്ന ചാലഞ്ചുകളും ഉൾപ്പെടുത്തിയിട്ടുണ്ട്​. വർണാഭമായ കേന്ദ്രം പ്രായഭേദമന്യേ ആവേശം പകരുന്നതും ത്രസിപ്പിക്കുന്നതുമാണ്​.

മിനി വേൾഡിൽ തന്നെ സമീപകാലത്ത്​ സ്ഥാപിച്ച ഉരുക്ക്​ ഫാൽക്കൺ മറ്റൊരു പ്രധാന ആകർഷണമാണ്​. ഇഫൽ ടവർ, താജ്​മഹൽ, ശൈഖ്​ സായിദ്​ ഗ്രാൻഡ്​ മോസ്​ക്​, ബുർജ്​ ഖലീഫ, സ്​റ്റാച്യു ഓഫ്​ ലിബർട്ടി ഉൾപ്പെടെ ലോകത്തിലെ 25 മിനിയേച്ചർ പതിപ്പുകളും മിനി വേൾഡിൽ സന്ദർശകർക്ക്​ പുത്തൻ അനുഭവം സമ്മാനിക്കുന്നതാണ്​. വിവിധ രാജ്യങ്ങളുടെ പാചക രീതികളും രുചിഭൈവങ്ങളും കൊണ്ട്​ കുടുംബങ്ങളുടെ ഇഷ്ട വിനോദ കേന്ദ്രമായ​ ഗ്ലോബൽ വില്ലേജിന്‍റെ 28ാമത്​ സീസൺ സീസൺ ഒക്​ടോബർ 18നാണ്​ ആരംഭിച്ചത്​​. കഴിഞ്ഞ പതിപ്പിൽ ഏതാണ്ട്​ 90 ലക്ഷം സന്ദർശകരെയാണ്​ ആഗോള ഗ്രാമം സ്വാഗതം ചെയ്തത്​. പ്രവൃത്തി ദിനങ്ങളിൽ വൈകിട്ട്​ നാലു മുതൽ 12 മണിവരെയും വെള്ളി, ശനി, ഞായർ ദിനങ്ങളിൽ രാത്രി ഒരു മണിവരെയമാണ്​ സന്ദർശന സമയം. വാരാന്ത്യങ്ങളും വെടിക്കെട്ടുകളും ആസ്വദിക്കാം.