ദീപാവലിക്ക്​ മൺവിളക്കുകൾ തെളിഞ്ഞു; മതസൗഹാർദത്തി​െൻറ വേദിയായി ഡൽഹി ഹസ്രത്ത്​ നിസാമുദ്ദീൻ ദർഗ

ഏതാനും ദിവസങ്ങളായി രാജ്യമെങ്ങും ദീപാവലിയുടെ ആഘോഷത്തിമിർപ്പിലാണ്​. ഈ ആഘോഷത്തി​െൻറ ഭാഗമായിരിക്കുകയാണ്​ ഡൽഹിയിൽ ഹസ്രത്ത്​ നിസമുദ്ദീൻ ഔലിയ ദർഗയും. കഴിഞ്ഞദിവസം വൈകീട്ട്​ വ്യത്യസ്​ത ലൈറ്റുകളാലും ദീപം തെളിയിച്ച മൺവിളക്കുകളാലും (ദിയ) ദർഗ അലങ്കരിച്ചു. നിരവധി വിശ്വാസികൾ ദർഗ സന്ദർശിച്ച് ദീപാവലി ആഘോഷിക്കുന്നതി​െൻറ ഭാഗമായി 'ദിയ' പ്രകാശിപ്പിച്ച്​ പ്രാർത്ഥന നടത്തി.

'ഹസ്രത്ത് മഹ്ബൂബ് ഇലാഹിയുടെ അനുയായികളായി എല്ലാ സമുദായങ്ങളിൽ നിന്നുമുള്ളവരുണ്ട്​​. ആഘോഷ സമയങ്ങളിലും അല്ലാത്തപ്പോഴും അവർ ഇവിടെ സന്ദർശിക്കാറുണ്ട്​. ഇത്തവണ അവർ ദിയകൾ പ്രകാശിപ്പിച്ചാണ്​ മടങ്ങിയത്​. എല്ലാ മതവിഭാഗങ്ങളെയും ഉൾക്കൊള്ളുന്ന വേദി കൂടിയാണ്​ ദർഗകൾ' -ദർഗ കമ്മിറ്റി അംഗം പീർസാദ അൽതമാഷ് നിസാമി പറഞ്ഞു.

'ദർഗ ദിയകളാൽ അലങ്കരിച്ചിരിക്കുന്നു, ദീപാവലി ആഘോഷത്തി​െൻറ ഭാഗമാകാൻ കഴിഞ്ഞതിൽ സന്തോഷമുണ്ട്​. എല്ലാ വർഷവും ആളുകൾ ഇവിടെ വന്ന് പ്രാർത്ഥിക്കുന്നു. ദർ‌ഗയിലെ ഈ ഊർജ്ജസലമായ അന്തരീക്ഷം കാണുന്നത് ഏറെ ഉത്തമമാണ്' -പീർസാദ അൽതമാഷ് നിസാമി കൂട്ടിച്ചേർത്തു.

സൂഫീവര്യനായ നിസാമുദ്ദീൻ ഔലിയയുടെ (1238-1325) അന്ത്യവിശ്രമ സ്ഥലമാണിത്​. ഡൽഹി നിസാമുദ്ദീൻ റെയിൽവേ സ്​റ്റേഷന് അടുത്താണ്​ ദർഗ. എല്ലാ മതസ്ഥരും ഇവിടം സന്ദർശിക്കാറുണ്ട്. അമീർ ഖുസ്രോയുടെയും മുഗൾ രാജ്ഞി ജെഹൻ ആരാ ബീഗത്തി​െൻറയും ഖബറിടങ്ങൾ ഇവിടെയുണ്ട്. തലസ്​ഥാന നഗരിയിലെ പ്രധാന തീർഥാടന കേന്ദ്രം കൂടിയാണിത്​.