ഇന്ത്യയിൽ​ ഇതാദ്യം; കാടിന്​ മുകളിലൂടെ ബലൂണിൽ പറന്ന്​ കടുവകളെ കാണാം

കടുവയും പുലിയും വിഹരിക്കുന്ന കാടിന്​ മുകളിലൂടെ ബലൂണിൽ സഞ്ചരിക്കണോ? എങ്കിൽ നേരെ മധ്യപ്രദേശിലെ പ്രശസ്തമായ ബാന്ധവ്ഗഡ് ടൈഗർ റിസർവിലേക്ക്​ വന്നോളൂ. പുതുവർഷ സമ്മാനമായിട്ടാണ്​ അധികൃതർ ഇവിടെ​ ഹോട്ട്​ എയർ ബലൂൺ സർവിസ്​ ആരംഭിച്ചത്​.

മധ്യപ്രദേശ് വനം മന്ത്രി വിജയ് ഷാ ഇതിന്‍റെ ഉദ്​ഘാടനം നിർവഹിച്ചു. ടൈഗർ റിസർവിന്‍റെ ബഫർ സോണിലൂടെയായിരിക്കും യാത്ര. പുള്ളിപ്പുലി, കടുവ, കരടികൾ തുടങ്ങി നിരവധി വന്യമൃഗങ്ങൾ ഈ കാട്ടിലുണ്ട്​. ഇവയെയെല്ലാം ഉയരത്തിൽനിന്ന്​ കാണാനുള്ള അവസരമാണ്​ കൈവന്നിരിക്കുന്നത്​.

ഹോട്ട് എയർ ബലൂൺ സഫാരി നടത്തുന്ന രാജ്യത്തെ ആദ്യ കടുവ സംരക്ഷണ കേന്ദ്രമാണിത്. മധ്യ​പ്രദേശിലെ തന്നെ കൻഹ, പെഞ്ച്, പന്ന എന്നീ കടുവ സംരക്ഷണ കേന്ദ്രങ്ങളിലും ഈ സേവനം ഏർപ്പെടുത്താൻ സർക്കാർ പദ്ധതിയിടുന്നുണ്ട്​.

സ്കൈവാൾട്ട്സ് ബലൂൺ സഫാരി എന്ന കമ്പനിയാണ്​ ഇവിടെ സർവിസ്​ നടത്തുന്നത്​. മൃഗങ്ങളുടെയുടെയും സന്ദർശകരുടെയും സുരക്ഷ ഉറപ്പാക്കിയ ശേഷമാണ്​ സർവിസ്​ ആരംഭിച്ചത്​. പുതിയ ആശയം മേഖലയിലെ വിനോദസഞ്ചാരത്തെ പ്രോത്സാഹിപ്പിക്കാനും സംസ്ഥാനത്തേക്ക്​ കൂടുതൽ സഞ്ചാരികളെ ആകർഷിക്കാനും ഉപകരിക്കുമെന്നാണ്​ അധികൃതരുടെ വിശ്വാസം.