സേതുമാധവനും ദേവിയും നടന്ന വഴികൾ; 'കിരീടം പാലം' ടൂറിസം കേന്ദ്രമാകുന്നു

തിരുവനന്തപുരം: ലോക ടൂറിസം ദിനത്തിൽ കിരീടം പാലം ടൂറിസം പദ്ധതി പ്രഖ്യാപിച്ച് മന്ത്രി വി. ശിവൻകുട്ടി. സിബി മലയിൽ സംവിധാനം ചെയ്ത കിരീടം എന്ന ചിത്രത്തിൽ ഉൾപ്പെട്ട കിരീടം പാലമെന്നും തിലകൻ പാലമെന്നുമൊക്കെ പ്രദേശവാസികൾ വിളിക്കുന്ന പാലം നിൽക്കുന്നത് നേമം മണ്ഡലത്തിലാണ്. ഈ പാലം സ്ഥിതി ചെയ്യുന്ന വെള്ളായണി തടാക പ്രദേശം മാതൃക ടൂറിസ്​റ്റ്​ കേന്ദ്രമായി ഉയർത്താൻ പദ്ധതി കൊണ്ടുവരുമെന്ന് മന്ത്രി പറഞ്ഞു.

മൂന്നു പതിറ്റാണ്ട് മുമ്പാണ് കിരീടം സിനിമ പുറത്തിറങ്ങുന്നത്​. സേതുമാധവൻ എന്ന റോളിൽ മോഹൻലാലായിരുന്നു കേന്ദ്ര കഥാപാത്രം. സേതുമാധവൻ പിന്തിരിഞ്ഞു നടക്കുന്ന രംഗവും സേതുമാധവന്‍റെയും ദേവിയുടെയും പ്രണയ രംഗങ്ങളും അടുത്ത കൂട്ടുകാരനായ കേശുവുമായി സംസാരിക്കുമ്പോഴും ഈ പാലം മുഖ്യകഥാപാത്രം പോലെ സിനിമയോട് ചേർന്ന് നിന്നിരുന്നു. സിനിമയുടെ 25ാം വാർഷികത്തിൽ അണിയറ പ്രവർത്തകർ ഇവിടെ ഒത്തുകൂടിയിരുന്നു.

പ്രകൃതിരമണീയമാണ് ഈ ഭൂപ്രദേശം. വിവിധ ഇനം പക്ഷികൾ ഈ പ്രദേശത്ത് കണ്ടുവരുന്നു. കായലിനോട് ചേർന്ന് കുടുംബത്തോടെ വന്നിരിക്കാനുള്ള കേന്ദ്രങ്ങൾ, ബോട്ടിങ്, കായൽ വിഭവങ്ങൾ രുചിക്കാനുള്ള സൗകര്യം, കുട്ടികളുടെ​ പാർക്ക്​ എന്നിവയെല്ലാം ഒരുക്കി സഞ്ചരികൾക്ക് മികച്ച ആസ്വാദനം ഉറപ്പുവരുത്തുന്ന പദ്ധതിയാണ്​ ലക്ഷ്യമിടുന്നത്. സമീപത്തെ കാർഷിക വിളകൾക്ക്​ സഹായം നൽകാനും പദ്ധതിയുണ്ട്​.