പറക്കുന്നതുപോലെ നീന്താം; ഇതുപോലെയൊരു സ്വിമ്മിങ്​ പൂൾ ലോകത്താദ്യം

പലവിധ നീന്തൽക്കുളങ്ങൾ ഈ ലോകത്തുണ്ട്​. പ്രകൃതിദത്തമായ കുളങ്ങളും ഇൻഫിനിറ്റി പൂളുകളുമെല്ലാം ആരെയും മോഹിപ്പിക്കുന്നതാണ്​. എന്നാൽ, പൂർണമായും ട്രാൻസ്​പെരൻറായിട്ടുള്ള സ്വിമ്മിങ് പൂൾ​ തുറന്നിരിക്കുകയാണ്​ ലണ്ടനിൽ. ലോകത്തിലെ തന്നെ ഏക സുതാര്യമായ പൂളാണിതെന്ന്​ ഇതിൻെറ ഉപജ്​ഞാതാക്കളായ എംബസി ഗാർഡൻസ്​ അവകാശപ്പെടുന്നു.

എംബസി ഗാർഡൻസിൻെറ​ രണ്ട് റെസിഡൻഷ്യൽ​ കെട്ടിടങ്ങ​​​​​ളെ ബന്ധിപ്പിച്ചാണ്​ ഇൗ അത്​ഭുത പൂൾ ഒരുക്കിയിരിക്കുന്നത്​. വായുവിലൂടെ നീന്തുന്ന അനുഭവമാണ്​ ഇത്​ സമ്മാനിക്കുക. 115 അടി ഉയരത്തിലുള്ള ഈ പൂളിൻെറ നീളം 82 അടിയാണ്​. സ്​കൈ പൂൾ എന്നാണ്​ ഇതിൻെറ​ പേര്​. രണ്ട് കെട്ടിടങ്ങളുടെ പത്താം നിലകൾക്കിടയിലാണ് പൂളുള്ളത്​.

സൗത്ത്​ വെസ്​റ്റ്​ ലണ്ടനിലെ നൈൻ എൽമ്​സ്​ എന്ന സ്​ഥലത്ത്​ യു.എസ്​ എംബസിയുടെ​ സമീപത്താണ്​ ഈ കെട്ടിടങ്ങൾ സ്​ഥിതി ചെയ്യുന്നത്​. ഇവിടെനിന്ന്​ പാർലമെൻറ്​ ഹൗസിൻെറയും ലണ്ടൻ ഐയുടെയും മനോഹരമായ കാഴ്ചകൾ പ്രദാനം ചെയ്യുന്നു എന്നത്​ മറ്റൊരു പ്രത്യേകതയാണ്​. നീന്തൽക്കുളത്തിൽ 50 ടൺ വെള്ളം ശേഖരിക്കാൻ കഴിയും. ഇതിന്​ സമീപത്തായി സ്​പായും ബാറുമെല്ലാം ഒരുക്കിയിട്ടുണ്ട്​.

സ്ട്രക്​ചറൽ എൻജിനീയർ എക്കേർസ്ലി ഓ കലാഗനാണ് ഇതിൻെറ രൂപകൽപ്പന നിർവഹിച്ചത്​. നീന്തൽക്കാർക്ക് കുളത്തിൽ മുങ്ങുമ്പോൾ പറക്കുന്നതായുള്ള അനുഭവം നൽകുമെന്ന്​ അദ്ദേഹം അഭിപ്രായപ്പെടുന്നു. നിലവിൽ ഈ കുളത്തിലേക്കുള്ള പ്രവേശനം ഇവിടത്തെ താമസക്കാർക്കും അവരുടെ അതിഥികൾക്കും മാത്രമായി പരിമിതപ്പെടുത്തിയിട്ടുണ്ട്​.