18 മാസങ്ങൾക്കുശേഷം റോഹ്​ത്തങ്​ പാസിൽ സഞ്ചാരികൾ എത്തിത്തുടങ്ങി

മണാലി: ഹിമാചൽ പ്രദേശിലെ സഞ്ചാരികളുടെ ഇഷ്​ട ​കേന്ദ്രമായ റോഹ്​ത്തങ്​ പാസ്​ 18 മാസങ്ങൾക്ക്​ ശേഷം സഞ്ചാരികൾക്കായി തുറന്നു. ദേശീയ ഹരിത ട്രൈബ്യൂണലിൻെറ മാർഗനിർദേശപ്രകാരം 150 പ്രാദേശിക ടാക്​സികൾക്കാണ്​ ദിവസവും ഇവിടേക്ക്​ മണാലിയിൽനിന്ന്​ പെർമിറ്റ് നൽകുന്നത്​.

കോവിഡ് വ്യാപനത്തെ തുടർന്ന് കഴിഞ്ഞ വർഷം മുതൽ ഈ പാത വിജനമായിരുന്നു. കൂടാതെ അടൽ തുരങ്കം യാഥാർഥ്യമായതോടെ യാത്രകൾ കൂടുതലും അതിലൂടെയായി.

ഏകദേശം 18 മാസത്തിന് ശേഷമാണ്​ വിനോദ സഞ്ചാരികൾക്കായി റോഹ്​ത്തങ്​ പാസ്​ തുറന്നത്​. മേയ് 29ന് ബോർഡർ റോഡ്​ ഓർഗനൈസേഷൻ പാതയിൽനിന്ന് മഞ്ഞ് നീക്കിയിരുന്നു.

സംസ്​ഥാന സർക്കാർ കോവിഡ്​ നിയന്ത്രണങ്ങളിൽ ഇളവ്​ വരുത്തിയതോടെ നിരവധി പേരാണ്​ മണാലിയിൽ എത്തുന്നത്​. പുറത്തുനിന്ന്​ വരുന്നവർക്ക്​ കോവിഡ്​ നെഗറ്റീവ്​ സർട്ടിഫിക്കറ്റ്​ ആവശ്യമില്ല. ​

മഞ്ഞ് ആസ്വദിക്കാനായി ലക്ഷക്കണക്കിന് വിനോദസഞ്ചാരികളാണ്​ ഇവിടെയെത്താറ്​. വരും ദിവസങ്ങളിൽ സഞ്ചാരികളുടെ എണ്ണം വർധിക്കുമെന്നാണ്​ പ്രതീക്ഷ. കോവിഡ് പ്രതിസന്ധിയെത്തുടർന്ന് കനത്ത നഷ്ടം നേരിട്ട ടൂറിസം മേഖലയിലുള്ളവർ പുതിയ പ്രതീക്ഷയിലാണ്​. ഒക്ടോബർ മുതൽ ഫെബ്രുവരി വരെയുള്ള ശൈത്യകാലത്ത് 6,54,622 സഞ്ചാരികൾ മണാലിയിൽ എത്തിയിരുന്നു.

ഇത്​ കൂടാതെ താഴ്വര സന്ദർശിക്കാൻ ആർ‌.ടി.പി‌.സി.‌ആർ നെഗറ്റീവ്​ റിപ്പോർട്ട്​ ആവശ്യമില്ലെന്ന്​ ലാഹുൽ - സ്​പിതി ഭരണകൂടം കഴിഞ്ഞദിവസം വ്യക്​തമാക്കിയിരുന്നു. വിനോദ സഞ്ചാരികൾക്ക് റോഹ്​ത്തങ് ചുരത്തിൽ നിന്ന് ലാഹുൽ താഴ്‌വരയിലേക്ക് കടന്ന് അടൽ ടണൽ വഴി മണാലിയിലേക്ക് മടങ്ങാം.

ഗതാഗതക്കുരുക്കിന് കാരണമാകുമെന്നതിനാൽ കോക്‌സാർ ഭാഗത്ത് നിന്ന് റോഹ്​ത്തങ് ചുരത്തിലേക്ക് വാഹനങ്ങൾ പോകാൻ അനുവദിക്കില്ല. സുരക്ഷാ നടപടിയായി ഹോട്ടലുകൾ, റെസ്റ്റോറൻറുകൾ, ധാബകൾ എന്നിവയിലെ ജീവനക്കാർക്ക്​ പ്രതിവാര ആർ.ടി.പി.സി.ആർ പരിശോധന നടത്തുന്നുണ്ട്​.