ഊട്ടി അടക്കമുള്ള സ്​ഥലങ്ങളിൽ ബോട്ട് സവാരി നിരക്ക്​ കൂട്ടി

ഗൂഡല്ലൂർ: തമിഴ്നാട് ടൂറിസം വകുപ്പ്​ ഊട്ടി ഉൾപ്പെടെയുള്ള വിനോദ സഞ്ചാര കേന്ദ്രങ്ങളിലെ കൃത്രിമ തടാക ബോട്ട് സവാരിക്ക്​ നിരക്ക്​ വർധിപ്പിച്ചു. ലോക്ഡൗണും ഇന്ധന വില വർധനവും കാരണം കനത്ത നഷ്ടമാണ് ടൂറിസം വകുപ്പ്​ നേരിട്ടത്. വരുമാന നഷ്ടം പരിഹരിക്കാനാണ് നിലവിലെ ചാർജിൽ 25 ശതമാനം വർധന വരുത്തിയത്.

നീലഗിരി ജില്ലയിലെ ഊട്ടി, പൈക്കാറ എന്നീ ബോട്ട് ഓഫിസുകളിൽ തിങ്കളാഴ്ച മുതൽ തന്നെ വർധന നടപ്പിലാക്കി. അവധി ദിവസങ്ങളിൽ പ്രത്യേക ചാർജ്​ ഈടാക്കും. ഡെപ്പോസിറ്റും പുതുക്കിയിട്ടുണ്ട്​.

രണ്ടു സീറ്റ് ഉള്ള പെഡൽ ബോട്ടിന് ശനി, ഞായർ ഒഴികെയുള്ള ദിവസങ്ങളിൽ 250 രൂപയാണ്​ ചാർജ്​. ഡെപ്പോസിറ്റായി 250 രൂപയും ഈടാക്കും. മൊത്തം 500 രൂപ നൽകണം. ശനി, ഞായർ ദിവസങ്ങളിൽ 600 രൂപ ഈടാക്കും. എക്സ്പ്രസ് സർവിസിന്​ 700 രൂപയാണ്​ നിരക്ക്​. നാല് സീറ്റുള്ള ബോട്ടിന്​ സാധാരണ ദിനങ്ങളിൽ 700 രൂപയും ശനി, ഞായർ ദിവസങ്ങളിൽ 800 രൂപയുമാണ്​ നൽകേണ്ടത്​.