90 രൂപക്ക്​ വീട് വാങ്ങാം, അതും ഇറ്റലിയിലെ മനോഹരമായൊരു ഗ്രാമത്തിൽ!!

യൂറോപ്പി​ലെ ഗ്രാമത്തിൽ ​ഒരു നാളെങ്കിലും താമസിക്കുക എന്നത്​ പലരുടെയും സ്വപ്​നമായിരിക്കും. എന്നാൽ, അവിടെ ഒരു വീട്​ തന്നെ സ്വന്തമാക്കാനായാലോ, അതും 90 രൂപക്ക്​!! വെറും തള്ളാണെന്ന്​ പറഞ്ഞ്​ തള്ളിക്കളയേണ്ട. സംഗതി സത്യമാണ്​.

സഞ്ചാരികളുടെ പ്രിയപ്പെട്ട ഡെസ്​റ്റിനേഷനായ ഇറ്റലിയിലാണ്​ സംഭവം. മോളിസ് മേഖലയിലെ കുന്നിൻ പട്ടണമായ കാസ്ട്രോപിഗ്നാനോയിലാണ്​ വീട്​ സ്വന്തമാക്കാനാവുക​. ഇവിടെയുള്ള ഒഴിഞ്ഞ കെട്ടിടങ്ങൾ കുറഞ്ഞ തുകക്ക്​ നൽകി​ ജനങ്ങളെ ഇവിടേക്ക്​ തിരിച്ചെത്തിക്കാനാണ്​ അധികൃതരുടെ ലക്ഷ്യം​.

റോമിനും നേപ്പിൾസിനും ഇടയിൽ സ്ഥിതി ചെയ്യുന്ന ഈ പ്രദേശം മനോഹരമായ ഗ്രാമങ്ങളാലും ഭൂപ്രകൃതിയാലും സമ്പന്നമാണ്​. അപെനൈൻ പർവതനിരകളിൽ പുരാതന ഇറ്റാലിയൻ ജനതയായ സാംനൈറ്റുകളുടെ താമസസ്ഥലത്തിന് മുകളിലായാണ് കാസ്ട്രോപിഗ്നാനോയുള്ളത്​. അധികം സഞ്ചാരികൾ വരാത്തതിനാൽ തനിമയും സംസ്കാരവും ചരിത്രാവശിഷ്ടങ്ങളും പോറലേല്‍ക്കാതെ ഇവിടെ സംരക്ഷിക്കപ്പെട്ടിട്ടുണ്ട്​.

പുരാതന കോട്ടയുടെ അവശിഷ്​ടങ്ങൾക്ക്​ പുറമെ ഒരു റെസ്​റ്റോറൻറ്, ബാർ​ എന്നിവയും ഇവിടെയുണ്ട്​. അതേസമയം, ഒരു യൂറോക്ക്​ ആളുകൾ കെട്ടിടങ്ങൾ ലേലം വിളിച്ച്​ എടുക്കുന്നതോടെ ഇതിനെല്ലാം മാറ്റം വരുമെന്നാണ്​ പ്രതീക്ഷ.

വിൽപ്പനക്കായി ഏകദേശം 100 കെട്ടിടങ്ങൾ ഇവിടെയുണ്ട്​. ഇവ കച്ചവട സ്​ഥാപനങ്ങളാക്കി മാറ്റാനുള്ള അവകാശവും ഉടമകൾക്കുണ്ടെന്ന്​ മേയർ നിക്കോള സ്കാപില്ലാട്ടി അറിയിച്ചു. വീട്​ വാങ്ങാൻ ആഗ്രഹമുള്ളവർ തങ്ങളുടെ വിശദ പദ്ധതിയടക്കം മേയർക്ക്​ മെയിൽ അയക്കുകയാണ്​ വേണ്ടത്​. കൂടുതൽ പണം മുടക്കുന്നവർക്കല്ല, നല്ല ആവശ്യത്തിനായ വാങ്ങുന്നവർക്കാണ്​ മുൻഗണന.

അതേസമയം, ചെറിയ ഗ്രാമമായതിനാൽ കാറുകൾക്ക് വരാനുള്ള വഴിയൊന്നുമില്ല. കെട്ടിടങ്ങൾ ഏറ്റെടുക്കുന്നവർ ഇതി​െൻറ അറ്റകുറ്റപ്പണികളും സൗന്ദര്യവത്​കരണവും നടത്തേണ്ടതുണ്ട്​​.