തായ്​ലാൻഡ്​ യാത്രികരുടെ ശ്രദ്ധക്ക്​; ഹോട്ടലുകളെ വിമർശിച്ചാൽ ചിലപ്പോൾ നിങ്ങൾ ജയിലിലാകും

ബാ​ങ്കോക്ക്​​: ഇനി തായ്​ലാൻഡിലെ ഹോട്ടലുകളിൽ താമസിച്ചശേഷം മോശം റിവ്യൂകൾ ഓൺലൈനിൽ എഴുതുന്നതിന്​ മുമ്പ്​ ശ്രദ്ധിക്കുന്നത്​ നല്ലതാകും. ഹോട്ടലുടമയുടെ പരാതിയിൽ ചിലപ്പോൾ നിങ്ങളെ പൊലീസ്​ പിടിച്ച്​ ജയിലിടാൻ സാധ്യതയുണ്ട്​. പ്രമുഖ ട്രാവൽ വെബ്​സൈറ്റായ ട്രിപ്​അഡ്വൈസറിൽ മോശം റിവ്യൂ നൽകിയതിന്​ അമേരിക്കൻ പൗരന്​ രണ്ട്​ വർഷം ജയിൽ ശിക്ഷയാണ്​ വിധിച്ചത്​. റിസോർട്ട്​ ഉടമ നൽകിയ മാനനഷ്​ട കേസിനെ തുടർന്നാണ്​ നടപടി.

തായ്​ലാൻഡിൽ ജോലി ചെയ്യുന്ന വെസ്​ലി ബേൺസിനാണ്​ ദുരനുഭവമുണ്ടായത്​. തായ്‌ലൻഡിലെ കോ ചാങ് ദ്വീപിലെ സീവ്യൂ റിസോർട്ട്​ ഉടമയാണ് സ്​ഥാപനത്തിൻെറ പ്രശസ്​തിയെ ഇകഴ്​ത്തിയെന്ന്​ കാണിച്ച്​​ ഇദ്ദേഹത്തിനെതിരെ പരാതി നൽകിയത്​. കഴിഞ്ഞ ജൂലൈയിലായിരുന്നു ഇദ്ദേഹം റിസോർട്ടിലെത്തിയത്​.

യാത്രക്കുശേഷം ഇദ്ദേഹം ട്രിപ്പ്​ അഡ്വൈസറിൽ ഒരു സ്​റ്റാർ റേറ്റിങ്​ മാത്രമാണ്​ നൽകിയത്​. കൂടാതെ ഇവിടത്തെ ജീവനക്കാർ സൗഹൃദപരമല്ലെന്നും മാനേജർ വളരെ മോശമാണെന്നും കുറിച്ചു.

'ഒട്ടും സൗഹൃദപരമല്ലാത്ത ജീവനക്കാർ ഒരിക്കലും പുഞ്ചിരിക്കാറില്ല. ആരും ഹോട്ടലിലേക്ക്​ വരരുതെന്ന മനോഭാവത്തോടെയാണ്​ അവരുടെ പെരുമാറ്റം. റെസ്റ്റോറൻറ്​ മാനേജറായിരുന്നു ഏറ്റവും മോശം. അദ്ദേഹം ചെക്ക് റിപ്പബ്ലിക്കിൽ നിന്നുള്ളയാളാണ്. അങ്ങേയറ്റം പരുഷമായിട്ടും ധിക്കാരപരമായിട്ടുമാണ്​​ പെരുമാറ്റം. താമസത്തിനായി മറ്റൊരു സ്ഥലം കണ്ടെത്തുന്നതായിരിക്കും ഉചിതം" വെസ്​ലി കുറിച്ചു.

എന്നാൽ, വെസ്​ലി റെസ്റ്റോറൻറിലേക്ക്​ പുറത്തുനിന്ന്​ മദ്യം കൊണ്ടുവരികയും അതിന്​ കോർക്കേജ്​ ഫീസ്​ (പുറത്തുനിന്നുള്ള മദ്യം ഉപയോഗിക്കാനുള്ള തുക) ആവശ്യപ്പെട്ടപ്പോൾ നൽകിയില്ലെന്നും റിസോർട്ടിൻെറ റൂം ഡിവിഷൻ മാനേജർ ടോം സ്​റ്റോറപ്പ്​ പറയുന്നു. കൂടാതെ ജീവനക്കാരോട്​ മോശമായിട്ടാണ്​ പെരുമാറിയതെന്നും മാനേജർ ആരോപിച്ചു.

തായ്‌ലാൻഡിൽ മാനനഷ്​ട കേസിൽ ജയിൽ വാസവും പിഴയുമാണ്​ ശിക്ഷ. ഇമിഗ്രേഷൻ പൊലീസ് അറസ്​റ്റ്​ ചെയ്​ത വെസ്​ലിയെ പിന്നീട്​ ജാമ്യത്തിൽ വിട്ടു.